كرعيني مستحرجاتني [الأرشيف]

حرامي السفنجات

19-10-2008, 20:30

كرعيني عاملات لي غلبة شديدة خلاس . . مستحرجاتني اشد الاستحراج قدام خلق الله . . و مستغلات طيبتي و مسكنتي استغلال سيئ . . دايما منكربات و مستعجلات . . و ما بلوكن الصبر . . و لا بقيفن يعرفن الشيئ الصاح من اللعوج . . يعني كان حدث أمر جلل و الامر دا كان يستلزم مني التريث و عدم الاستعجال . . هن ما بتريثن و لا بزبرن . . يكون عندهن فكر و راي تاني . . و عندهن أي حاجة مفروض تتم قوام قوام . . يعني . . كان ساكت كدي لاقاني طين . . و في قرارة نفسي نويت اني أنط الطين دا بعد أصل محلو . . يقومن كرعيني يقررن قبل مني . . و ما يلوكن الصبر . . و يقررن ينطن و ينشبحن قبل أنا ما أصل محل الطين . . و جمبلق يجيبني في بطن الطين . . النصيبة وكت أنا أقع في بطن الطين يقومن يلبدن . . و يعملن أضان الحامل طرشا . . الحكاية دي اتكررت مرات عديدة . . و بقيت كان شفت لي طين . . أقرر أخوضو قبل ما أخوض فوقو بي أمر كرعيني . . و كان كنت نايم . . الزول كان أول ما يصحى من النوم يقوم يفتح عيونو . . أنا أول شيء بصحن فيني هن كرعيني . . وكت أفتح عيوني . . ألقى كرعيني نزلن من السرير و لبسن النعالات . . صاحبي مختار المكنيكي قال لي . . يا فيفيد كرعينك ديل ظنيتن بنومن و هن معشّقات . . الحكاية دي مشيلاني هم كبير خلاس . . خايف يوم . . وكت أصحى ألقى كرعيني ديل لبسن النعال . . و يكون جوة النعال في عقرب لابدة . . تقوم تطقني و تلحقني الرقدوا و ما قاموا . . و كان في زول من ناس البيت ناداني عشان يحدسني عن موضوع . . و الا يرسلني مشوار . . كرعيني ما يخلنو يتم نضميهو . . في نص النضمي . . يقولن لي يا فيفيد ورحكاكا . . و أنا أقوم أسمع كلام كرعيني . . و أمرق في المشوار الرسلوني ليهو . . و بعد ما أصل مكان المشوار . . أقوم أنا العوير أكتشف أني ما عارف الشيئ الرسلوني من أجلو . . و أقوم أرجع تاني عشان يدوني تفاصيل المشوار . . ناس البيت بقوا عازرني في حتة المراسيل دي . . و كان في واحد ساكت قرر أنو يرسلني مشاور . . يقوم يعمل مختصر و صمري لي موضوعو قبل ما أنا أصلو . . وكت أقول أصلو يكون شرح لي نص الحديس . . و يقوم يواصل باقي حديسو معاي مهرولاً أمامي لحدي ما يكمل نضميهو . . النصيحة لله . . في الحتة دي أنا متكيف من كرعيني ديل . . عشان قللن علي المشاوير و التكليف الما منو فايدة . . لكن النصيبة بقت مع بت جيرانا . . حبيت سعاد بت جيرانا . . و نويت أفاتحها في موضوع حبنا . . و الطريق الحا نمشيهو سواء خطوة خطوة بي كرعينا في دروب الغرام . . رسلت ليها جواب يحوي مكنونات قلبي . . لكن كرعيني أحرجني قبل ما أشبح الشبحة الأولى في درب الغرام . . سعاد رسلت لي رد جواب الغرام مع أخوها السغير . . و أخوها صابحني مبتسم و يكرف في مخاتو . . قال لي . . يا فيفيد . . سعاد قالت ليك . . تحبك . . و كرعيني . . سمعن كلمة تحبك . . و ما انتظرن باقي حديث الشافع . . عملن ليهن أجنحة و فررررررررر طارن من السعادة . . و أنا أضنيني ما يسمعن كلمة بقرة عيلا بعد ما أكلن الملف . . و قعدت في الواطة أبكي و اتنهف . . لي شنو سعاد تقول لي تحبك بقرة . . انتي زاتك يا سعاد حباك ورل . . يا شبه الورل . . لكن أنا المشيلني هم . . كان قررت أني أدخل اللدبخانة . . و كان في زول في اللدبخانة . . الزول الجوة اللدبخانة و قبل ما يفكر يقول احم احم و يتحمحم . . يلقاني منصوب قدامو . . الحكاية دي عقدتني و استحرجتني جنس استحراج . . خسوسا أصحابي بقوا كان في واحد نوى انو يدخل اللدبخانة . . يوقفوا ليهن زول يحرس الزول الجوة . . فيفيد دا بقى ما مضمون . . هسع أنا بقول ليكن في النضمي دا و أنا الفار يلعب في عبي . . مديرنا السعودي في المكتب قال لي و هو يمعّط في شعرو من الزعل . . يا فيفيد . . بكرة ما بدي أشوف . . و كرعيني قامن جاريات قبل ما يسمعن باقي نضمي المدير . . و هسع انا ما خابر المدير دا مويتو شنو . . و خايف يكون قال لي يا فيفيد بكرة ما بدي خلقتك دي يا زول يا سوداني . . دحين يا ناس . . الداير مني دين يجو يخلسو هسع . . و الزعلان مني يعفى لي . . بكرة ممكن يرفتوني من الشغل . . شفتو جنس النصايب دي؟؟؟.

www.albahala.org