فني جلسة ناس سعاد بت عثمان الليله جابنها كبيرة مقاسها بالاطنان ......... مشكيات علي الله عندهن راى في سياسة الامريكان ..... قالت ام عزين اتي آبت عثمان ....... الرئبس الامريكي وراقو دا مالو خاتونقرو معانا ..... قالت ليها سعدية هييي خالتي ام عزين وارقو دا لاعب كوره اشتروه بي قروش تملا ليها قندران ......مخير الله هسع يا بنات امي اكان اتبرعوا بي نصهن لي مستشفي الذره البي مرض السرطان مليان ....... واكان بدوروا اللعيبه بلقوا الزيو والاحسن منو في السودان ......... هسع كلامي دا اكان سمعوه ناس فلان بيقولوا انا بشجع هلال امدرمان ...... قاطعتن نفيسه وقالت ليهن عليك الله خلينا من كلام الكورة السجمان .... كدي قلتي لي الرئيس الامريكي سمو منو ؟ يا بنيتي حنان ....... ردت البت حنان بحكم ثقافتها الاعلامية وقالت . انا والله راسي كان بالثقافة مليان لكن لي زمن ما قريت جريدة الوان ..... لكن اظن الرئيس الجديد البتتكلموا عنه دا عنده قرابه وصلة رحم لاهلنا في السودان ..... لكن علي قول المثل ( العرق دساس) (ضل الدليب برمي بعيد انشاء الله يضوي لاهل الزنوج ديل ويبقي ليهم الليدي ديانا وكريم ديانا عشان يقلب لونن ابيض زي لون البيت السكنوه فيه دا ....... قاطعتن سعاد وقالت : اتن يا اخواتي الحكومه دي مش اباحت حرية الراى السياسي ... يلا انتن دايرات النصيحة الحكومه دي غلطانه قولن لي كيف ؟ الرسول الكريم (ص) لمن بدا دعوته بداها سرية بعد ما قوت شوكته حتين بدا ينشرفي دعوته ..... لكن ناسنا ديل من ماجو يشتموا ويسبوا سبا بلا سبب يا امريكا اختينا وروسيا دنا عذابها نختاها كيف ونعذبها كيف ونحنا جعانين في حنكنا .... بعدين ديل ربنا سخر جزء منهم لي خدمتنا .... هسع عليك الله وريني طيارة صنعت في اي دوله غيرهم..... بالله عليك اي واحد في محل اسحق ود نيوتن ما كان اكل التفاحة وصم خشمه ..... لكن الله لي ديل كلام سااااااااكت وشعر وغزل في غزه والفلوجه وطفل الحجارة حجر شنو البعوق ليه تكنلوجيا واكان التكنلوجا دي غلبتنا نقابلا بالكترة مش بقولوا الكترة غلبت التكنلوجيا ؟ يا بنات امي انا ما بايدهم لكن معني كلامي الواحد اول حاجه يملا مصرانه تمام وبعد داك يقوم اناطح ,,,, قالت ليهن زينب هسع دي بقولوا دايرين ياخدوا الرئيس عشان يحاكموه ..... قالت سعاد يمين الله دا بعدهن نموت كلنا ولا يمسوا شعره من الرئيس لكن انا كلامي للناس الجوه ناس خاينه خايفه بقول لهن اكان اتخاينتو البقت في العراق بتبقي قيكم ... ودعتكن الله .... والجبنه لسع مدوره ( بلادي وان جارت علي عزيزة واهلي ان ضنوا علي كرام )
[ الحاج فلسفه - ابوحسام ]