طبــــقه وأبــو كجنكي لو سمحتو دقيـــقه بس !!! [الأرشيف]

طبقة الأزون

25-02-2010, 10:57

كروان ... تحياتى ....

مره من المرات فى المرحله الابتدائيه وبمدرسة الحارة الرابعه ... ونحنا فى الصف الرابع جانا ناظر المدرسه واسمو فرح ( امد الله فى عمره ) فى حصه فاضيه قاعد يحكى لينا عن زمان وشقاوة زمان ... فقال ( قومت رميت ليك صاحبى فى المصارعه ... واولاد الحله بقو يكوركو البطل البطل البطل .... قعدنا نضحك ... وانحنا ماعارفين الناظر سمعو 500% ... قام قال بكل برود .... القال الباء طالعه منو ؟؟؟؟

يازوله صبت ليك مطره فى الفصل ... وبدأ معانا سياسه لو قلتو حااسامحكم واسامحو ... طبعا" مافى زول فتح خشمو ... قام رسلنى قال لى امشى نادى الاستاذه من كل الفصول يجوا اسع هنا .... جريت لميت ليك الاساتذه كلهم ... اها يااولاد مادايرين تتكلمو ... مافى ولاحس ... محمد امشى نادى غفير المدرسه ... مشيت ناديت الغفير ... استاذ فرح قال ليهو من نيم المدرسه تقطع لى 20 فرع وتنضفهم اسع دا وتجيبها لى .... اها يااولاد فى مسافة مايجيبو النيم راجعو نفسكم ... عشان اسامحكم ... وحاتك مافى زول فتح خشمو ... نص ساعه والجو مكهرب والقيامه قايمه والاستاذه واقفين يعاينو ... استاذ فرح حدد الصوت فى الصفوف الأربعه الاخيره ... ولشقاوتى انا كنته فيها ... جابو ليك النيم وختو فى تربيذة الاستاذ الجنب السبوره ... آخر فرصه يااولاد ... ولا واحد فتح خشمو ...

كل الشكوك كانت تحوم حول كمال عزت لشقاوته ومناقرته للاستاذه ... وكمال دا ... الله يستر منو يدو طرشه وانسان احمق ومابنتظر حقو ... بياخدو فى وقتو والفصل كلو بعمل ليهو الف حساب ...

استاذ فرح قال خلاص ... نبدأ الجلد ...

محمد ... انته بديك فرصه وتورينى مين قال كدا ... انا بعرفك وبعرف ابوك وانته ولد شاطر وممتاز ... وانشاء الله حاتورينى منو العمل كدا ... قلت ليهو ياستاذ انا ماسمعت اى حاجه ...
استاذ عبدالواحد أديهو 20 جلده ... انا غايتو بتذكر لمن انتهى الجلد ماكنته شايف أى واحد فى الفصل وماقادر اقعد فى الكنبه ... قعدته على جنبتى ... وبدأ الجلد بالتناوب كل استاذ يجلد طالب 20 جلده لحدى ماجلدو الفصل كلو ...

بعد نهاية العقاب ... استاذ فرح قال كلكم مفصولين لحدى ماتجيبو اولياء اموركم ... ياالله كل واحد يشيل شنطتو ويمشى بيتو ومايجى راجع الا وابوه معاهو ...

عندنا طالب حلبى حنكوش كدا اسمو اسامه ... ابوه ضابط فى الشرطه ... الود خاف من الجلد قام قال لاستاذ فرح ... انا بعرف القال منو ... قال ليهو ... شاطر يااسامه ورينى ومافى واحد حايجلدك ... قام قال ليهو كمال عزت ... استاذ فرح هنا زعل وقال ليهو ليه من الاول ماقلته كدا ... أجلدو ياستاذ عبدالواحد ( ودا عندو معاهو قصه تانيه ) 30 جلده عشان تسببت فى ضرب كل الفصل ويبدو انو لمن جا يضربو بالنيمه اتلفت ... النيمه ضربتو فى كتفه ... مشى البيت يدو محمره وشو ذى الفشفاش ... تحت حماية الفراش بأمر من الناظر استاذ فرح ... عشان مايهبشو كمال عزت

من الصباح ابوهو جا ليك المدرسه وقال الا يودى استاذ عبدالواحد السجن وبقت مشكله تانيه ... لحدى مااتدخل استاذ اسمو استاذ عبدالقادر كانت ليهو مكانة خاصة فى المدرسه لعطفه وطيب معاملته مع الطلبه ... ووعد بانو كل الطلبه يرجعو والموضوع ينتهى على كدا ...

فى اليوم التالى لعودتنا للمدرسه وأثناء حصه الفطور ... كمل عزت لبد لأسامه وبمجر مااسامه بقى فى نص الميدان فى المدرسه مانسمع ليك الا الصريخ ... كمال عزت اشترى سوط عنج وجابو المدرسه ووقع ليك فى ود الناس ضرب والود جارى فى المدرسه وكمال عزت وراهو ... والاستاذه طلعو وياالله الله مسكو كمال عزت من الولد ....

طبعا" كمال عزت انفصل من المدرسه لمدة اسبوع ... تتخيلو الرجعو منو ؟؟؟؟ والد اسامه ... مشى لاستاذ فرح وقال ليهو ... يستاهل اسامه ليه يفتن فى كمال عزت ماالفصل كلو عارف ومافى زول إتكلم ...

قبل ثلاثه سنوات وأثناء اجازة عيد الاضحى .. ذهبت للسودان وأثنا مرورى بالطريق التقيت الاستاذ فرح ... الا ان الدهر اخذ منه مااخد ... وقفت العربيه وسملت عليهو عرفنى طوالى ... محمد ازيك ياابنى ... اخبار والدك واخبارك وكيف عامل فى الغربه ؟؟؟ المهم طقينا الحنك والضحك لحدى ماوصلتو باب بيتو ...

بعد مانزل قلت ليهو استاذ فرح ... تتذكر قصة البطل ... ضحك وقال لى ... الله يجازى محنك متذكرها لحدى اسع ... قلت ليه عندى طلب ممكن تنفذو لى ... قال لى ... انشاء الله يإبنى ... قلت ليهو ... أعفى لى لله والرسول أنا القلت الباء طالعه ....

لم اتمالك نفسى فى تلك اللحظه ... طوالى دورته العربيه وانفجرت فى موجة شديدة من البكاء ... وتركته فى حيرة من أمره ....