دنيا غريبة


ناس ضايقاها ماكنتوش
وناس دافساها صحنين بوش
ناس نادوها ناريمان نهى وإيمان
نزار هيثم أسامي رشوش
وناس نادوها يا كلتوم ويا فطوم
وود بعشوم أبو طربوش أسامي بروش
ناس في الحب بتدخل توش
بدون تقديم بدون تلميح معاها قروش
شبح موديل سنة ألفين بيملى الحوش
وناس بتريد بكاها يزيد وما بتوصل
دوام يدوها بالشاكوش
عشان تعبان مفلس تب ما عندو ماكنتوش
وتسمع لب لب لب
وراسو يدوش ويبقى عموش
يقولوا عليهو شهيد في الحب ومات مغشوش
وحالي البي أصبح كيف
ده من شفتك غشاني خريف
مطر من جسمي نازل شو
ويوم سيرتك يجيبوها
أبقى أخاف أكون رجاف
بدل رفدور أرش بف باف
قميصي الساوي لي غلبة
مسكتو لبستو بالقلبة
أدور أنضم أتمتم زين
أمرق الكلمة من علبة
واتلخبط
كراع جزمة واعين التانية ألقى شبط
وأكون ملخوم ..
أشوف سنير .. أقول برلوم
أمش شمبات .. أقول أم دوم
أشوف شندي .. أقول خرطوم
أقلب الحال .. ليلي سهر .. صباحي أنوم
واحلم يوم
تكوني معاي ونطلع في مكاناً هاي
تشربي كولا واقعد ساي
أتوه واسرح وانم دوباي
وا أسفاي وا أسفاي
على قلبي الصبح بكاي
وشن بنسوي لما نشوف قمر ضواي
يطلق النار يشع جواي
ويبقى مناي .. أعاين ليك صباح ومسا
واجر السبحة أقول مدحة
سراي سراي
مناي ألقاك يا السمحة
مناي تجودي بي عينيك قد لمحة
ولمن تلبسي الطرحة .. تصاب معدتنا بالقرحة
ويجربوا فينا كل علاج :
هستامين .. كلودكوين
دة لا ينفعنا إنتستين
ولا يشفينا دربكينين
وما عارفين إنو علاجنا كافلجين
وكافلجين علاج لكل مرض خطري
علاج للبشري والبطري
وأشوف قدري
أكان حبيت وشاع خبري
أكان كفت الهموم كفري
وقبل أموت .. أقول كلمات
أوصي بدفني في الأحفاد
ويبقى فراشي في شمباتsss1

الله ليكم يا العزابة

متين يا الله ألم الفكه
أجيب الشيلة واسوي الشبكه
وأمي تزغرد بي طول صوتها
وأنا مبسوط وظابط الشكة
هدومي معطنة بالأرياح
ريحة الخمرة وريحة الدلكة
واطبع للعيزومة كروت
حاشاها الما زي كرت البنزين
جميله زاهية في ورق التوت
وتحت الإمضاء مشكورين
لأنها لحظة ما بتفوت
وإلا تكونوا مبسوطين
ويجوا الأولاد بوجوهاً نادية
يقشوا الفسحة الواسعة وهادية
نرًكب فيها الصيونات
ونعمل حفلة بود البادية
ولازمن حفلة تكون صباحي
أشفي غليلي وأداوي جراحي
من زمن العذابة الأغبر
السًود عيشتي وزاد لنواحي
أفك القيد من قلبي وأغني
حبيب الروح وغني يا صاحي
وفي العصرية نمرق سيرة
خلوق منتظمة ماشة مسيرة
زي صف دكانأً ناصية
فيه سجاير بالتسعيرة
بناتنا يغنن مبسوطات
دور بينا البلد ده
يلفن يدورن العربات
ولمن أصل بالسيف اتقدم
زي الفارس ماشي ملجم
وشي بينضح لمعه ونضرة
قميصي نضيف وماه مجلبط
بملاح خدره
أهز في البنوت بي سيفي
وابخبخ فيهن لبن البدرة
وفجأة يدق صوت الدلوكة
وتبقى الناس بالجد مربوكة
واحدة تصفق واحدة تزغرد
وواحدةتلوك في لبان بازوكة
جابوا عروسي وبدت الوقفة
سرحت بعيد في حق القفة
جابت قون بي رقة وخفة
ما اتجرست كلا وحاشا
الا هناك واقفين شماشة
قالوا اكيد شارب حرباشة
زعلت شديد وغلبني اللعب
لانو كلامن كلو كضب
قاموا اصحابي بصوت عالي
يا عبد الله اطلع بره إشاعة إشاعة
وحتماً يوم لي أمك عايد
قونها حقيقي ما اوف صايد
صوت أصحابي أثر فوقي
بحركة ذكية جبت القون
وانا والحلوة بقينا درون
وفجأة أضفت الهدف الثاني
وغمر الساحة فرح رباني
مرقوا اصحابي يكوركوا ويهتفوا
فاتوا الفسحة وسدوا الشارع
صوتهم طاغي ظاهر وطالع
يا عبد الله هايل ورايع
جبت القون في الزمن الضايع

كو كو ككو .. يا ناس سلام ما تردو هوى
كو كو ككو .. والله بحدث ليك أبوي
كشلو كشو .. كشلو كشو .. سكيك كرب بابهم فتح ..
وقيلبي فرّ وسوه شح ..!!
عايز منو ..؟؟
عايز أبوك ..؟؟!!
أبوي مسافر من زمن ولليلة لسع مارجع ...!!!
طيب أخوك ..؟؟
والله يا أخي أخوي طلع ...!!!
وإتبسمت وسرحت في البرق الشلع..
شلع مثل نور الفلاش مع الخواطر إنطبع
ووقفت قدام الجمال شبعان شبع ...!!!
إييييك من الخدود البشبهن نبق الصعيد
والقومة قومة عود قنى قايم كويس وإنفتح
واللون فنون .. ذات مين جنون
أخدوه من لب القرع
خلطوه برقة وجمال
في اللحظة حسيت بأنو سكوتي طال
وقصة أفوت دي بقت محال
قالت واقف ليه ..؟؟ بالله خش
بالله عليك أنا كيف أخش في التسعة دي ..
وما بصح أخت في الدش دا بش
قالت خلاص مادام أبيت خليك كده
وسكيك كرب بابهم قفل:trrr6:

لاقيتو فى الماسنجر
خلانى زول كسمبر
كتبت ليه رسالة
وعملت ليها إنتر
أدانى كلمة حلوة
تكتل قليب عنتر
قال لى سمح حديسك
ينقط عسل وسكر
قُت ليه عايز أشوفك
قال لى بلاش تهظر
أنا مابشوفنى زولن
فى الكى بورد يفرفر
أنا بت جميلة خالص
بدور لى زول غضنفر
كدى رسل لى صورتك
بعدين براي بقرر
كتلت قليبى خالس
واحساسي صار مدمر
رسلت ليها صورة
شينة وكمان مصنقر
وقعدت راجى كلمة
من الحليوة سكر
وانا فى قليبي راسم
صورة الدهب مجمر
واحساسي بى جمالها
زى مدفعن معمر
جاني الخبر صقعني
بلوك فظيع مدمر
ومن يومي داك أفتش
فى كل ايميل ماسنجر
وما لقيت غير هامر
فى الحوش قاعد فى بنبر
شين شناتو مرة
زى مرفعين فى بربر
ما بكوس غير المشاكل
وبين السطور بيهظر
مديدة حارقاني
وفى الشكل بيحرر
ومازلت كل يوم أحلم
أن الحبيبة تغفر
لو مرة بس تقول هاي
وترجعني للماسنجر

بووووبي!
احيييييييييييينا!
أحي أنا ! ويا بختنا ! ويا حظّنا!
وأحي أنا!
قالوا في تعليمة في حيّنا
اتلمن أُمات عيون فيهن هَنا
وأُمات جضوم حديهن هِنا
سيقاناً زي القَنا ..
والله أخير حقاتي أنا!
ديل كمان منو الجابوم هِنا!؟
وبدت التعليمة ..
يا بِنيّة يلاّ .. فرفشي وما تختشي
"أدوك فلّة؟" نحمد الله
"أبوكي في؟" متوفّي!
"ماما في؟" ما بتقول شي!
"أخوك في؟" ده لي شنو، ما بسو شي!
وإظنّك كمان بتكفّتي!
"كلبكم في؟" ما بعضّي!
هو كيف يعضّي..
هو زاتو من عمايلك يا فلانة
عقلو منّو طشّ فرّ
بقى لا بفرز الجوّة جوّة ،
لا بعرف البرّو برّة
هو زاتو استغفر الله
وسط كلاب الحِلّة ليهو زِلّه
اتلمّوا ليو كلاب الحِلّّة
يا بوبي "هَو" بي الجنبة دي!
ويا بوبي "هَو" بي الجنبة دي!
واحنا بنقول يا بوبي لأ ، حبّة إختشي
لو إنت سِتّك ما بتختشي
إنت إختشي
يا بوبي "هَو" أهما شي
وا خسارة مجتمعنا
وا خسارتك يا قيمنا
والما بقول "بي الجنبة دي"
هم فقط فيهم أملنا
ويلاّ أكبر يا أملنا
ويلاّ فرهد يا أملنا

الحكاية شنو يا جماعة كلكم شعراء ولا شنو لكن كلام ظريف وشعر جميل

والله ماشاء الله شعر حلمنتيشى 100%

طارق سيد احمد وسمرا
لقيتكم خطرين عديل كده

قالت ليهو: ما لك بتاكل السندويتش حفار حفار
انت فار؟؟
قال ليها: بقيت مجنون بقيت محتار
بعد ما زول طويل عريض انا فار؟
يا احلى كديسه في الدنيا
عليك ربك تبلعيني
وماتفضلي شي..وكان ده حصل بكون يا بُرّه اسعد فار
وانطط جوه في بطنك وانغص فيها للاسرار
واقيف اتـأمل الكبده والطوحال..تقول رادار
واخزن جوه في المعده
وافتش لي لكسره ما القى
واقبل جاي ده همبرغر
وكمان بي جاي جلي وكاستر
وكمان بهناك عصير مانجا..
وكمان اصفــــر
مصارينها مستّفه بي عسل سكر
مش زي مصارين السماني ملفلفه زي حبال بمبر..
واطير ليك فو وفي الفشفاش اتحكر
وانط طوالي جنب قلبك واشوف الدم هداك احمـــــر..
ابحلق جوه في بطنك اعاين القى صورتي انا..؟؟صورة الفار!!
اها يا عالم ده ما سبب البلع زاتو
اقول يا بره خارجيني..تقول لي نياو
عليك ربك تخارجيني..تقول لي نياو
بحبك ياخي خارجيني..تقول لي نياو
وتتوكل تتطلعني من اجمل فيلا واحلى سجن
يمين من جوه فيها بطن...مفرهده زي زهور الفل
بتعمل نكهة النعناع مطعمه بي طعم ليبتون
وفيها نسيم يجيك بــــــــــــــارد ..مكندشه بس تقول هيلتون
ده من جوه..
ومن بره
تحلف بس تقول يازول واحد شل ليهو حبل وربطه وفي القمر جره
ولما تجي وهناك تقعد
تقوم من تاني تنفره
واشوف الخاشي ماشي بره
واحس بي قلبي فرّ فرّ
سجنتيني وجاري وراك مابنساك وما بتخلّى
حتى لو الزمن عاند
حتى لو السهم جلّى
بموت فيك موت ياسكرانه يابت القرد

هههههههههههههههههههههههههههههههههههههههههههههههههه هههههههههه
مبالعة عديل كده

شغل عديل ....