قصة حقيقية من الواقع القريب ونهايته هذه اللحظة التى اكتب فيها ....
كنت قادما من امدرمان بتاريخ 17 /6/2010 والشمس فى كبد السماء بعد اجتماع طويل وممل وتفكيرى يسبقنى للوصول الى البيت رغم تكييف العربة ....وعند نزولى من الكبرى القديم قاصدا البيت رايت رجلين وامرأة وبنت واحسست بمدى تعبهم وهم فى هجير الشمس وانا رغم التكييف احس بالضجر ..
فوقفت لهم حيث طلب رجل وامرأة بأن وجهتهم شارع الجمهورية مما غير مسارى والاخرين ممكن ينزلو قبل شارع الجمهورية والبنت فى جامعة الخرطوم رضخت للامر والشارع ليس ببعيد عن مقصدى ...
نزل الجميع ماعدا البنت لانها لم تصل الجامعة بعد...وبشوية ظرافة منى حاولت الطف الجو شوية سألتها بتقرى شنو وفى سنة كم والاسئلة التقليدية دى ...وعند وصولى الجامعة توقفت لتنزل وفعلا بدأت تنزل بهمهمات وثقل شديد ..فسألتها مالك فى شنو ..فردت هسى ادخل الجامعة يقولو الرسوم حتى الداخلية طردونى منها...سكتت ولم اجب لان ليس لدى رد ...
فقالت ليه ساكت قلت ليها ماعندى قول اقولو قالت لى شكرا ليك وسحبت كرت من جنب الطفاية ومشت ...
عند الساعة السادسة مساء اتصلت تلفون وهى تنوح ...ابوبكر ...قلت نعم انا ابوبكر ...قالت لى توسمت فيك خير وانا مطرودة من الداخلية لانى مادفعت الرسوم وما عارفة امشى وين ممكن تساعدنى ...قلت ليها ماعندك زميلات او صديقات او اهل ...قالت اهلها مغتربين وقدر العندها استلفتو زميلتها ومصروف الشهر لسه بعيد عشان يرسلو قلت ليها اوكى بحاول اساعدك واتصلى على اهلك يرسلو ليك طالما اهلك مقتدرين قالت لى مابرسلو الا اول الشهر ...قلت ليها اوكى اشوف وارجع ليك
وفعلا اجتهدت كثيرا لمساعدتها مع قريباتى او احدى معارفى ولكن خفت ان يحصل اى مكروه واتحمل تبعات ذلك لاننى لا اعرف عنها شيئا...وتناسيت الموضوع وهى لم تتصل ...وفى تمام التاسعة والنصف اتصلت وقالت هى بالنجيلة جوار صينية برى ولاتعرف اين تذهب ...وذهبت اليها وسلمتها رسوم الداخلية 250 جنيه على ان تستردها عند وصول المصروف وفعلا اوصلتها داخليتها ببرى حسب وصفها ورجعت للبيت وتفكيرى يدور بعشرة اتجاهات ...
ونواصل
ابو عواطف
22-06-2010, 00:23
اها وتاني نحن متابعيييين ياخ
ما تدينا الليل ثمح
فى يوم 18/6/2010 بعد الساعة 12 ظهرا طلبت مقابلتى لامر ضرورى ولما لاقيتها قالت عندها بحث مفترض تسلمو وبكرة اخر يوم للتسليم وعايزة اللاب توب بتاعى باقى الليلة وبكرة اجى استلمو وقلت بالحرف الواحد بجيك الساعة 8 صباحا لانى شغال بى وكل شغلى فى الجهاز ...قالت لى قبل 8 تعال شيلو ...اديتها الجهاز مع السلامة مع السلامة ...
فى يوم 19/6/2010 صحيت بدرى عشان اقدر اوزن الزمن لمشوار غير معتاد وانا بسخن فى العربية قلت اتصل تجهز وتجهزو ...ولكن وجدت التلفون مغلق...حاولت مرارا حتى الساعة 11 رن جرس التلفون ولكن دون رد ...وللمرة الثانية دون رد ...وانا فى حيرة من امرى وصلتنى منها رسالة (جهازك بجيك اليوم المساء) رجعت اتصل واقول ليهاوعدتينى الصباح وده شغل ولكن وجدت التلفون مغلق حتى الواحدة صباحا رن التلفون ..وردت بانها متأسفة وبكرة من الصباح بكون معاى...
فى يوم 20/6/2010 من الصباح بدرى اتصلت لقيتو مغلق ...عرفت اننى تعرضت لعميلة نصب مع انى عامل فيها زول مفتح ...وذهبت فورا للداخلية وسألت عن رهام الطاهر حسن قالو لى مافى بت بالاسم ده هنا ياجماعة انا نزلتها هنا قبل يومين حوالى الساعة كده وكانت مشكلتها كده قالو مواعيدنا حدها 8 ونص بعدها مافى بت بتتدخل مهما كان ...ذهبت الكلية القالتها وقالو مافى طالبة بالاسم ده حاولت اتصل على الاغبش قلت امكن يكون بعرف الاساتذة ولم اجد تلفونه محفوظ عندى ...
فتأكدت من عملية النصب تماما ...رجعت للتلفون حتى الثالثة ظهرا فتح التلفون وردت اعذرنى للمرة التانية التلفون كان عطلان...قلت ليها خليك واضحة معاى عشان اكون واضح معاك ومابحب زول يوعدنى ويخلف لانى ببنى الكتير على ضوء الوعود دى احسن تقولى لى مافى من انك توعدينى وخليك واضحة ...قالت والله بصراحة اديتو لصاحبتى تطبع البحث وشالتو قالت مابترجعو لانها عايزة منى مليون ونص وانا بقول ليها ده ما جهازى وهى رافضة ترجعو لى ولو مامصدقنى ده رقمها كلمها...قدرت اجمع بعض خيوط اللعبة واتصلت وكأننى لا اعرف شيئا عن الحياة وقلت ليها عندى جهاز معاك شلتى من فلانة ...كوركت ونبزت فلانة ونبزتنى انا وكنت بارد جدا ظاهريا اغلى داخليا ...قلت ليها انا عندى حاجات مهمة فى الجهاز ولازم يكون عندى... فى امكانتى اشترى واحد تانى وانسى الموضوع لكن الجهاز ده فيه مستندات واوراق مهمة ورينى القروش العايزاها كم وانا بديك ليها...قالت لى انت قايلنى غبية ادى القروش ليها وهى تجيبهم لى...قلت ليها ماعندى فيها ثقة ممكن تشيلهم قالت لى والله فعلا بتشيلهم...قلت ليها انتى وين بجيك فى محلك اديك قروشك واخد جهازى ...قالت لى مستحيل ...انت تعال الحتة الفلانية ونكون بالتلفون اشوفك اول واليوم البعدو احدد ليك نتلاقى وين والبجيك منو...قلت ليها اوكى
رجعت البيت ونمت قمت اليوم الصباح واستفرت كمية من البنات وحكيت ليهم الموضوع ...قالو لى ديل اسمهم (اللبش) بكونو قاعدين فى سبعة اماكن فى الخرطوم ...قلت ليهم جيبو بنات زيادة هسى وكل اتنين تلاتة يكونو فى حتة وانا بكون لافى بين السبعة اماكن...البنت اوصافها كده واى واحدة تقرب من الوصف ده اتصلو بسرعة اجى اشوفها ...واتوزعو حسب ماهو مرسوم تماما وفى تمام الساعة الثامنة مساء اتصلت على وقالت لى مابقدر الاقيك الليلة نتلاقى بكرة ولازم الزولة الاولى تجى معاك امكن تكونو عاملين مخطط ومتفقين مع بعض...قلت ليها انا اصلا ما لامى فيها وجها لوجه بس بالتلفون بكلمها وهى نفسها هاربة منى عشان ما اقبضها..قالت لى ده شرطى الوحيد ...اتصلت على البت الاولى قالت لى خلاص جهز القروش وانا بلاقيك نمشى ليها تديها القروش وتشيل جهازك واعتبرو دين برجعو ليك بداية الشهر...قلت ليها اوكى نتلاقى بكرة ...
قفلت منها واتصلت على واحدة تكلم البنات يمشو بيوتهم دخلت فى الخط واحدة من البنات قالت لى فى واحدة دخلت هسى بنفس المواصفات ...جريت هوا للمكان ...اشوف البت لمحت واحدة واقفة فى محل ايسكريم وشايلة لاب توبى المابختانى مدروع فى كتفها ومشيت عليها رن تلفونى قالت لى الحق البت المقصودة من شافتك طلعت..ايوااااااااا يعنى لما كنت بكلم دى ودى هن كانو مع بعض وسامعين كلامى كلو ولاعبين اللعبة مع بعض مافى دين ومافى قروش عايزين يقبضو المليون ونص ويتقاسموها ...قلت ليها النمسك لاب توبى ده اول شئ...ناديتها لوسمحتى ممكن لحظة ...جات معاى ..اركبى ركبت العربية ركبت وامنت الابواب ودورت وقلت ليها انا الزول البتكلم معاك وصاحب الجهاز ...قالت لى مابديك لى انا شلتو من فلانة ومابرجعو ليها الا تدينى قروشى...قلت ليها ساهلة نمشى نلاقى فلانة ...قالت لى كويس...وقفت العربية واتصلت على صاحبى ينتظرنى جنب قسم الرياض وفهمتو الموضوع...قلت ليها فى امانة اسلمها لزول ونمشى ليها ...وصلنا قسم الرياض جانى صاحبى ..قلت لى مرحب جنابو...قال لى ياها دى المتهمة قلت لى لا دى صاحبتها شالت الجهاز لانو عايزة منها قروش...قال لى نزلها هى اول شئ لانو دى ضبط مسروقات بحوزتها ونقفلها هنا لى بكرة لما يجى زول يضمنها ونحنا نمشى نقبض التانية ...البت قعدت تجقلب وانا اهلى بعملو لى وعندى بتى صغيرة بترضع واك واك وبكى قلنا ليها الحل شنو طيب ..قالت مش ده جهازكم هاكم لى وانا بتصرف مع صاحبتى وبطلع قروشى من عينها...فى اللحظة اتصلت على البت الحارسة المكان وقالت لى زولتك دى لما طلعت فى اتنين وقفوها وهسى راكبة معاهم فى عربيتهم...قلت ليها راقبيها لما اجى ...وهنا شلت اللاب توب ختيتو فى الضهرية وقلت للبت يلا اتوكلى على اهلك
مشيت للبت النصبت على فى المكان سألت البت قالت لى جوه العربية البيضاء دى ...مشيت للعربية فتحت الباب وسألتهم بتعرفو البت دى قالو لى مابنعرفها انت بتعرفها ...قلت ليهم بعرفها سرقت منى لاب توب ...طوالى واحد فيهم قطع فيها كف صاح وقال ليها انتى حرامية متمرسة وده دليل تطلعى المحفظة والقروش هسى ...التانى قال لى ركبها الزول ده امس وفى قروش ومحفظة فى العربية لما نزلت لقاهم مافى ...قلت ليهم مع السلامة اتولو امرها انا جهازى ولقيتو وشلتو...
ومنها جيت البيت فتحتو اشيك ما ناقص حاجة وقلنا نشد لينا موضوع بى سلامة الرجعة
شلهتة بركة اللميت في لابتوبك
هههههههههههههههههههههههههههههههه
ياخ ده سلوك اجرامي محترف
ابو عواطف
22-06-2010, 01:12
والله قمة النصب والإحتيال والجراء
بالله ديل بنات لاحوله ولاقوه إلا بالله
معقوله وصل الإجــرام عندنا إلي هذه الدرجة
وحتي عند الجنس الذي كنا نعتقد انه ناعم؟؟؟
الدوام لله بس؟
دي عائزه ليها كــــرامة ياخ
عثمان إدريس
22-06-2010, 02:09
حق تغير عنوان البوست لي :
شلهته .. مروة مافي !!
:D:D:D
غايتو القصة دي عاوزها ليها سينارست يطلع منها فلم مجنون :c030:
.. صحي عشنا و شفنا ..
:rolleyes::rolleyes:
شلهته اولا حمد لله علي السلامة
وغير ده كتير من السلوكيات والممارسات الاجرامية بقت تحصل ياخي ديل وصلو حتي انتهاك حرمة الموتي
يازول والله حمدلله علي السلامة وبركة الجات علي قدر كده
ابوكجنكي
22-06-2010, 12:56
حمد لله علي السلامه
والله نحن نحمد الله
علي ايامنا ما كانت في حاجات زي كده
وبجيك راجع
ابراهيم فرح
22-06-2010, 12:58
شلهته حمد الله علي السلامه وانت الوداك تملح شنو واحمد ربك علي انو الموضوع انتهي علي كدا
همس الشوق
22-06-2010, 13:37
لكن يا شلهته ما كنت قايلاك مسكين كدا
لكن شكلك كنت رامي لبعيد
هههههههههههههههههههه
هههههههههههههههههههههههه
معقولة الاحتيال وصل للدرجة دي...
البركة في اللابتوب الرجع...