صباح مخسـتك [الأرشيف] - منتديات حب النيل

كل النجوم

15-03-2006, 08:51

بسم الله وصباح الله بي خيروا
اها تقوم ماشة على شغلك ويحصل ليك دا كلو
أول ما تفتح عينك وبعد الصلاة تجي لي الشاي يقولو ليك الغاز قطع وما في فحم الا الدكان الفي الظلط والاولاد قالو ما بمشوا تجلي موضوع الشاي
تقول تتسحم وتتقيف بعد ما تدخل وتنضرب بي الصابون الموية تقطع تكورك وتكورك لمن حسك ينقرش تسمعك الحاجة وتجي أها في شنو النبيح من الصباح الموية قطعت تقو لي هي سجم خشمي انت بتستحم انا فتحت الخرطوش في الزير خلاس النقفل الماسورة تجيك الموية وتطلع من الحمام بعد ما تكون قعدت ليك ساعة الا ربع طبعا طريقة مكوة مافي لانو الكهرباء قاطعة وما عندكم فحم تلبس اي حاجة من طرف الدولاب ( وطبعا نحن البنات تلقي ليك لبسة مكوية تسالي من الطرحة حقتا اختك تقول الله شالتا فلانة صحبتي ما مشكلة بجيبة ليك منها بكرة انا الليلة ما عندي جامعة البسي اي حاجة في النهاية تلتبسي تكتشفي انك طلعتي زي صحن السلطة شئ أخضر وشئ أحمر وغايتو بي البركة بتمشي
وتصلي الظلط وتلقى كل الامة مستنية المواصلات بعد حرب داحس والغبراء تلقى ليك مقعد أها يا قعد جنبك بتاوق لي القاعد قدامو عشان يقرا الجريدة وكل ما سيد الجريدة يقلب الصفحة داك يميل معاهو يا ابو الشباب ما ممكن لكن زح شوية معليش يا اخت بس اقرا الخبر دا او قعدت جنبك واحدة سمينة وسايقة ليها روضة بتاعت شفع وانتي جنب الشباك والشافع داير يعاين بي الشباك وبي جزمو في الاسكيرتي حقك الله يطولك يا روح بعد ما تنزلي ما تعرفي روحك ويلحقوك الشنطة بي الشباك اها تصلي المكتب واخلاقك في راس نخرتك تلقى المدير قالو جا من الصباح وشال دفتر الحضور وهاك يا سين ويا جيم وجيتي متاخرة وامس طلعتي بدري وبكرة لو اتاخرتي حا نخصم منك هي كلها الماهية كم عشان تخصموها نحنا باقي الشهر بنتمو موية تجي ساعة الفطور ويلمو القروش ويجيبوهو بوش وصاحبتك معاك في المكتب يجوها 3 من بنات خالتا ويفطرو معاكم وتقومي نص بطن الساعة 2 ناس البيت يتصلو عليك فلانة بعد حبوبتك فلانة ولدت في مستشفى سوبا امشي ليها شوفي العنبر الراقدة فوقوا ونحنا بكرة بنمشي تحاولي تتملصي ما في طريقة لانو لمن اخوك اتخرج هم جوكم والولادة موت ودي ولدت بي فتح بطن في النهاية ما عندك حل غير تمشي وطبعا لازم تشيلي كيس حلاوة لانو ابوها ما بقصر وجاب يوم داك 10ارطال سكر يوم ابوك جا من الحج ( طيب هو ابوي الحج والجابو ليهو السكر يشيل الحلاوة هو ) تمشي تفتشي ليك طريقة دين بعد تعب تلقى زول يدين عشرين الف جنيه تقولي مكسب اركب منها واجيب منها الحلاوة تصلي المستشفى بعد موت وتلقى غفير وشوا اسوا من اخر عبس يعمل معاك شكلة ويقول ليك بطاقتك دي ما بدخلك المستشفى الا تكوني دكتورة ولا ممرضة المهم في النهاية تدفعي حق التذكرة الفين جنيه وتحومي المستشفى بي رجل كلب ما تلقى بت حبوبتك دي تقولي تتصلى على ناس البيت الموبايل تلقايهو بالسالب في النهاية بعد ما تقنعي تركبي وترجعي البيت
ونواصل

طارق سيد احمد

15-03-2006, 09:08

على الطلاق ما تكملى
حدو هنا
اكتر من ده دايره تقولى شنو

زورق الألحان

15-03-2006, 09:29

تواصلي شنو تاني يا كل النجوم؟؟؟؟؟!!!!!!:eek: :( :o

أبوعادل

15-03-2006, 09:42

سمرا

15-03-2006, 10:10

يا كل النجوم مالك على الجنيات بتدورى تتطفشيهم خليهم يجوا ويعرفوا براهم ويعيشوا معانا حلاوة المشوار

يا ابو عادل بطل فصاحة هسى كان ادوك اجازة بتجى متلب هو السودان دا حلاوته وين غير فى بهدلته دى على الاقل بتحس بطعم الحياة وانت ماشى شغلك وانت طالع مجاملة تقيف لمن راسك يسخن عشان بس تصل الكبرى وتعدى للجهة الماشى ليها ووجع المفاصل دا زاته ليهو طعم لمن تجى بالليل ترقد وما تعرف تنوم على ياتو جهة من الالم ولا تخلى زيت سمسم ولا تخلى ابو فاس البكسر الراس وما فى فايدة شويتين وتلقى الاذان ناداك تقوم تصلى وتلبس وتتطلب الله لانه وقت ذاتو للشاى مافى وكان ما بتبقى شينة الحمام دا ذاته ما لازمنا عشان لمن تصل المكتب بتكون اتكتحت من رشرش عيونك لى مفاصلك الواجعاك ديك واخرتها راجعين راجعين يا المغتربين وانشاء الله ربنا يرد غربتكم بالخير

كل النجوم

15-03-2006, 10:19

طارق - زورق الألحان - أبو عادل قولوا بسم الله
سمرا يديك العافية ما قصرتي
في يوم حلو ويوم مر
أها بعد ما وصلت البيت هلكانة وتعبانة وعيني ما بشوفن وزهجانة من ناس البيت الادوني مشوار لي سوبا اول ما دخلت ليك المطبخ شكلو زي الكانو الناس عندهم عزومة سالتهم في شنو قالو لي الناس جوا من البلد يشوفوا المرة الولدت وجوا اتغدوا معاهم قلت ليهم طيب ما انتو قلتو في سوبا هيييييي نسينا والله نقول ليك حولوهو مستشفى بحري معليش طيب ختوا لي غدا انا من الصباح في المستشفى وفطور ما فاطرة زي الناس والله الغدا كمل هي ذاتا اللحمة الجابوها كلها شحم وعضام وانتي ما بدوريهو غايتو في طرقة كسرة سويها بي طماطم في زيت اللحمة خليناهو ليك في الحلة:( المهم بي جاي وجاي مسافة اخت الغدا المغرب آذن صليت وسويت لي كباية شاي يادوب ما رقدت في السرير الباب فتح واسمع ليك الله يسلمك الله يعافيك الله يبارك يطيب معانك الله يسلمك لمن رفعت راسي لقيتو فريق كورة نسائى عديل كمية من النسوان وكل واحدة ماسكة ليها شافع والما عندها شافع جابت ود بتها تفسحوا في الخرطوم قالو ديل الجوا اتغدوا هنا مشوا المستشفى وجوا يبيتوا معنا اها قمنا ما خلينا سرير ولا عنقريب بارك الله في الحوش الكبير بعد ما فرشنا ليهم قامت واحدة هوي يا بت الشيخ عليك الله سوي لينا الجبنة راسنا دا داير يطير قمت وانا بطنطن جات واحدة تانية لاحقني في المطبخ هوي حبوباتك ديل قهوة البتجاز ما بدورنها وبدرون يشمن ريحة البن اخير تسويها ليهن في الفحم قلت ليها ما عندنا فحم امي قالت لي ابوك جابو قبيل شوال اها ولعت النار ومرقت عدة القهوة كلها برة في شان حبوباتي يتكيفن وبعد داك دخلت في البرندة قلت احضر التلفزيون اها جن قعدن والله ما سمعن شئ من المسلسل اجي عاد سماحن ما سماح شوف الشعور اريتو شعر البنات لي حدهن لكن شوف ديك مداينة الله كان تشبه بت بابكر عاد جنس شئ ولغاية ما المسلسل انتهى اتعشوا بعد داك وكلو واحدة لزمت ليها سرير ولا عنقريب وبقت الونسة هي بت فلان ديك ما طلقوها وهي ود فلان ما كشوهو من السعودية لي الساعة اظنوا 2 صباحا انا اتقلب وما قادرة انوم من نضميهن

طارق سيد احمد

15-03-2006, 10:28

لا حولا
انتى عديت ايوب فى صبرو

كملى يا عبد الصبور عبد الشكور :D

كل النجوم

15-03-2006, 10:35

أها ومن النباه الأول صحن النسوان ينضمن التقول بالعت ليهن رادي وكملن ونسة الليل جاهن الولد الجابن اها يا حاجات ما تقومن تجهزن لي السفر قالن ليهو وكتين جينا هنا بت فلان عرسوها عمنول وما جنها تاني من العرس وفلان داك رحل فوق بيتو الجديد وما باركنوا ليهو وفلانة طهرت وليدات في المولد وهن ما جنها في شان كدي بدورن يكمان المشوار وبدورن يتفسحن في سعد قشرة
وطبعا ما حا يمرقن الا يفطرن ويشربن جبنة الفطور ولانو الحاجة براها اضطريت اقعد معاها في شان اساعدا وطبعا هن قاعدات لي التنظير نضفت البرندة كلو واحدة خمت كيسة ودخلت جوة زول ساي شال ليهو ملاية فرشة معاي مافي هوي يا بت الشيخ النبي فوقك كان ما سويتي لينا عصيدة بي ملاح ويكاب باقي نحن الفول دا ما بندور ولا بي الحيل عليهو قالت ليهم الحاجة هنا الويكاب ما عندنا خلاس سوي لينا ملاح ام بقبق طيب يا نسوان ما تخافن الله ام بقبق دي هسي يلقوها ليكن وين ووين الخريف انا خايفاهن يقولن دايرة خدرة حقت خلا غايتو الحاجة ما قصرت سوت ليهن عصيدة بي ملاح روب وجابت ليهن فول والله صحن الفول التقول مغسل مسحنو مسح والعصيدة ديك كان لقمتن الشالنهن منها غايتو جنس محن أها فطرن ولبسن ودعننا ومرقن على أساس أنهن مسافرات
الله يوصلن بي السلامة
وطبعا غيبني يوم من المكتب وبدل استيضاح وخصم يوم بقى خصم 3 يوم الله يديهن العافية

أبوعادل

15-03-2006, 10:41

والله أهل العوض ديل مشكلتهم مشكلة sss1

واصلي ما تقيفي .. كلامك سمح بلحيل

جاييك بروااااقة .. أفضى شوية بس ..

طارق سيد احمد

15-03-2006, 10:44

حسبى الله ونعم الوكيل

حقوق انسان مافى
امم متحدة مافى

ولا بس فالحين لى دارفور دى

لكن الغلط عليكى انتى

يعنى مع الجبنة الاولى ديك كان رميتى ليك كرضمتين
حقت صبغة حجرية وغطستى حجرنا
كان ارتحتى باقى الايام وبدل الخصم كان ادوك بدل عزاء

ميويه

15-03-2006, 10:48

عاااااااااااااااااااااافيه منهن السون فيك دا كلو

العنقاء

15-03-2006, 10:50

كل النجوم
صباحك زين
صدقيني بجيك بي رواقه

st alnas

15-03-2006, 11:03

st alnas

15-03-2006, 11:06

كل النجوم والله كفاره شديدة،بس يا بت امى دى حال الدنيا،نقول شنو:D

زورق الألحان

15-03-2006, 11:45

وطبعا هن قاعدات لي التنظير نضفت البرندة كلو واحدة خمت كيسة ودخلت جوة زول ساي شال ليهو ملاية فرشة معاي مافي
غايتو يا كل النجوم النسوان ديل كان فيهن واحدة بتدخل (حب النيل) دا ... شيلي شيلتك:D :D :D

شنــداوي

15-03-2006, 12:00

http://skins.hotbar.com/skins/mailskins/fun/070003/070003_4_Funny%20picture_prv.jpg

وهاااااااااادي قعدة
يا كل النجوووووم..

http://www.top-greetings.com/v/2003/05/bedtime.jpg
:c030: :c030: :c030:

كل النجوم

15-03-2006, 14:35

أبو عادل يديك العافية : كدي اصبروا لي النرقع الميزانية الاتخرمت بي الخصم دي واجيكم راجعة
ود سيد احمد قول سويتلهن الصبغة وما ماتن ورقدن في المستشفى ما ياها الحلة كلها الاتكسرت فينا وياني الرفدوني عديل كدا اخير الخصم
ميوية : يستاهلوك كلاب لهب يا بت أمي ما ياها عينتك دي الجايبة لينا البلا
حباب العنقاء وراجين مزاجين قهوة الضهر وفاتت
ست الناس : كفر الله سئياتك لكن يا بت أمي مستنين الكشف وكدا راجيكم انا
زورق الألحان : هن كان بعرفن حب النيل كان دا حالن ينومن النجمة ويقومن الهجمة
شنداوي : لكن مزاجك لقيتو عالي الله لا جاب ليك نسواين زي حقني يخربنوا عليك

سحر القلوب

15-03-2006, 15:15

متشرد

15-03-2006, 15:28

ود سيد احمد قول سويتلهن الصبغة وما ماتن:eek:
الله يجازي محنك!!!:D
بجيييك راجـــــــع

Ashraf Salih

15-03-2006, 15:47

بسم الله وصباح الله بي خيروا
اها تصلي المكتب واخلاقك في راس نخرتك تلقى المدير قالو جا من الصباح وشال دفتر الحضور وهاك يا سين ويا جيم وجيتي متاخرة وامس طلعتي بدري وبكرة لو اتاخرتي حا نخصم منك هي كلها الماهية كم عشان تخصموها نحنا باقي الشهر بنتمو موية
ونواصل
خليها ساي نحن خرطوش الموية فاتحنو من اول اسبوع دا كان تمت اسبوع:D

الفارس

15-03-2006, 16:08

والجماعة قالو لينا أحسن ترجعو السودان
الحياة هناك حلوة وبقت ساهلة
حلاة لِقْلِق ..
والله ياكل النجوم ..
كلامك القلتيه دا بس يخلي الواحد عشرة سنة تاني ما يفكر يمشي السودان
وكمان قالت (نواصل) ونعمل وجع مفاصل :eek:
كان واصلتي تاني يانا الماجايين تب :D
السلام عليكم ورحمة الله
اولا الحياة في السودان بقت اسهل واكثر تطورا بكثير من السابق
ثانيا السودان يتميز بحاجات ما بتلقاها في اي حتة تانية
حلات لمن ترجع من المواصلات والشغل تعبان وهلكان وتلقى قدامك صينية الغداء وكل الحبان مجتمعين .
وتطلع العصرية على الاهل ولا اولاد الحلة وتلقاهم متلمين
سماحة تمشى مع الشباب وتاكل الفول في الواحةو المحلات الجنبها
سماحة لمن تهاجر للكوارع في الصحافة ولا تمشي الموردة للسمك
كان عديت ليك لبكرة ما بنتهي من الحاجات الحلوة الما بتلقاها الا هنا
هنا في اعز مكان وطني السودان

طارق سيد احمد

15-03-2006, 16:17

السلام عليكم ورحمة الله
اولا الحياة في السودان بقت اسهل واكثر تطورا(تورطن) بكثير من السابق
ثانيا السودان يتميز بحاجات(بلاوى) ما بتلقاها في اي حتة تانية
حلات لمن ترجع من (معركة)المواصلات والشغل تعبان وهلكان وتلقى قدامك صينية الغداء وكل الحبان مجتمعين .
وتطلع العصرية على الاهل ولا اولاد الحلة وتلقاهم متلمين
سماحة تمشى مع الشباب وتاكل الفول في الواحةو المحلات الجنبها
سماحة لمن تهاجر للكوارع في الصحافة ولا تمشي الموردة للسمك
كان عديت ليك لبكرة ما بنتهي من الحاجات الحلوة الما بتلقاها الا هنا
هنا في اعز مكان وطني السودان
كلامك ده بقول انك لسع ما بقيت صاحب قفة ملاح
بالعربى كده بى اولادك وفارز عيشتك
عشان كده خليها بالنية يا حبيب

Ashraf Salih

15-03-2006, 17:07

السلام عليكم ورحمة الله
اولا الحياة في السودان بقت اسهل واكثر تطورا بكثير من السابق
ثانيا السودان يتميز بحاجات ما بتلقاها في اي حتة تانية

100% It is going to the best
وكلامك دا ما بحس بيهو الا زول قاعد برة

حلات لمن ترجع من المواصلات والشغل تعبان وهلكان وتلقى قدامك صينية الغداء وكل الحبان مجتمعين .sss1

و الله لا وراك كيف بتكون الحياة لمن تفقد لمة الغداء:o

وتطلع العصرية على الاهل ولا اولاد الحلة وتلقاهم متلمين

بس ما يجي زول يجدعليهو قنبلة قرنيت:(

سماحة تمشى مع الشباب وتاكل الفول في الواحةو المحلات الجنبها
سماحة لمن تهاجر للكوارع في الصحافة ولا تمشي الموردة للسمك

ودي بالغتها فيها والله الواحد لو مسك روحو كان ......d44564543

ويا طارق خليها بالنية لكن مهما فرزت عيشتك و ضاقت بيك الحياة ذي البلد دي مافي و مهما زادت مشاكلها::122::

كان عديت ليك لبكرة ما بنتهي من الحاجات الحلوة الما بتلقاها الا هنا

ولو عدينا اسبوع برضو ما بكفي

و فعلا

اعز مكان

أبوعادل

15-03-2006, 17:32

يا ابو عادل بطل فصاحة هسى كان ادوك اجازة بتجى متلب هو السودان دا حلاوته وين غير فى بهدلته دى على الاقل بتحس بطعم الحياة وانت ماشى شغلك وانت طالع مجاملة تقيف لمن راسك يسخن عشان بس تصل الكبرى وتعدى للجهة الماشى ليها ووجع المفاصل دا زاته ليهو طعم لمن تجى بالليل ترقد وما تعرف تنوم على ياتو جهة من الالم ولا تخلى زيت سمسم ولا تخلى ابو فاس البكسر الراس وما فى فايدة شويتين وتلقى الاذان ناداك تقوم تصلى وتلبس وتتطلب الله لانه وقت ذاتو للشاى مافى وكان ما بتبقى شينة الحمام دا ذاته ما لازمنا عشان لمن تصل المكتب بتكون اتكتحت من رشرش عيونك لى مفاصلك الواجعاك ديك واخرتها راجعين راجعين يا المغتربين وانشاء الله ربنا يرد غربتكم بالخير

الله عليك ياسمرا .. صدقتي والله
صدقيني دي الحياة والا بلاش
وما بحس بي طعمها إلا زول فاقدها
ملينا من الحياة الكلها رتوش ونفاق دي
وربنا يسمع منك ويرجعنا سالمين ويرد غربتنا ..

بس سؤال كدة على الطاير ..
إذا كان دا الصباح العادي .. طيب الماعادي كيف ؟؟؟ :c030:

عثمان إدريس

16-03-2006, 14:33

صباح االخير يا أختى كل النجوم ...
يا أختى غيري العنوان من صباح عادي لـ (خيال عالي) عشان ده لو صباحك الله يرحمك من هسه[/B]

:c030: :trrr3: ;) :eek:

mohsenco

16-03-2006, 14:53

الله عليك ياسمرا .. صدقتي والله
صدقيني دي الحياة والا بلاش
وما بحس بي طعمها إلا زول فاقدها
ملينا من الحياة الكلها رتوش ونفاق دي
وربنا يسمع منك ويرجعنا سالمين ويرد غربتنا ..

بس سؤال كدة على الطاير ..
إذا كان دا الصباح العادي .. طيب الماعادي كيف ؟؟؟ :c030:

الما عادي يا أبو عادل
أنك تقول دي الحياة ولا بلاش
دي حياة أخير منها الخدمه الوطنيه
لكن يا صباح عادي ده ما صباح عادي ده منيل بستين نيله
مع أني كنته قايل الزول بيفرح لأنه جيناه من البلد
أتاريه بنعمل فوقو قدر ده
عاد نمش وين بس ورونا
وإمك دي تاني بنلقاها وين ما لازم نتونس معاه لحدي الساعة أتنين
والجبنه الزول كان ما شرب الجبنه من الصباح بعرف يسو شي
والزول الفي المستشفى ده ما لازم يجوه عاد كيفن الكلام ده كل صح لكن نسو شنو ورونا بس

الابنوسي

18-03-2006, 10:03

والله يا كل الهموم اقصد النجوم

دا ولو صباحك العادي كدي ياها الشقاواة زاتها:D

كل النجوم

18-03-2006, 10:27

العزيزة الرايعة روعة كل النجوم

كل النجوم :
بادياً بالتبادي .. تآمني بالله أنا عشان أقرا موضوعك ده .. فتحت الصفحة وقفلت النت ( بخل شديد مع اضافة ملح الفلسة وكده :D ) وجبت لي فول سوداني واتحكرت وقعدت اتلذذت بموضوعك ده :c030: ........ وعندي معاك كلام كتير بالحيل
واحد : انت يا بت امي متاكدة كده تماماً انه صباح عادي :confused:
كدي ما غلطت والا حاجة :بصراحة كان دي صباحاتك عايني يا بت امي شوفي أقرب بحر ليكم ونطي فيهو : .. دي ما بقت كل النجوم .. دي بقت كل البشتنة عديييييييييل

اتنين : اب سلعة الفاكة منو ده يقول ليك ختي ليهم حجرين صبغة تقومي تتميها ليهو الحكاية :eek:
ما خاتين فيك الجماعة :trrr3:

يلا آخر سؤال :
حياتي ما سمعت بملاح ( أم بقبق ) ده غايتو شيتاً كدي يشبه لي ( جق جق ) اها تمي جميلك ووريني ده شنو ؟؟؟؟!!!!!

وأخيراً أثبتي أن اجمل الابداعات تأتي من رحم المعاناة ... تشكري يا غالية
الغالية سحر القلوب يديك العافية ويحل ليك مشكلة الفلس وبدل ما تقزقزي بي فول سوداني تتحولي لي لوز وبندق واسماء تانية ما معروف كبسولات ولا حقن
أم بقبق يا سحر نوع من أنواع البامية وبتكون صغيرة في الحجم وسمانة يعني زي انبوبة الغاز بتقوم في الجزيرة في الخريف وبتتاكل مفروكة بي الكسرة ولا العصيدة يعني الزول يكون جا من الحواشة والمطر داقاهو يلقاها بي كسرة ياكل وما يدي المعاهو
متشرد في انتظارك بي الجبنة
أشرف كان كدي أخير نحنا والبشوف مصائب غيرو تهون عليهو مصيبتو فاتحين الخرطوش السنة كلها وانا أقول الموية عندنا ضعيفة ليه :trrr3:
الفارس : برغم صعوبة المشوار ورغم ضراروة التيار عزيز أنت يا وطني
وبنرجع وبنقول أحلى شئ في السودان اللمة لكن وين لمة الغدا مع الناس الكل زول بجي براهو وشايل ليهو سندوتش حق طعمية في يدو والله الزول بقى ما بتذكر اخر مرة اكل فيها ملاح متين
ود سيد أحمد يديك العافية بس ما قلت لي انت متين شلت القفة
أبو عادل الصباح الماعادي اول ما تطلع تلقى مواصلات حافلة فاضية وكمساري ما يعمل شكلة وتصل المكتب وانت رائق وتلقى المدير برضو رائق والفطور على حساب الشركة sss1
عثمان إدريس أها عرفت الصباح الما عادي كيف
محسنكو : بس حالنا معاكم البعدو يحنن وقربو يجنن بندور جيتكم ونستكم وما بندروا الله يصبركم علينا زي ما صابرين عليكم
الأبنوسي الله يجازيك

ابوسجود

18-03-2006, 14:22

الله عليك ياسمرا .. صدقتي والله
صدقيني دي الحياة والا بلاش
وما بحس بي طعمها إلا زول فاقدها
ملينا من الحياة الكلها رتوش ونفاق دي
وربنا يسمع منك ويرجعنا سالمين ويرد غربتنا ..

كل النجوم ...صباحك ده مااعتيادى وليوم عادى حيرتينا والله ...كان ده الحال كيف بنرجع من الغربة تانى ...كدى عليك الله شجعينا شوية افتحى نفسنا عشان نرجع

كل النجوم

18-03-2006, 14:29

يديك العافية أبو سجود
ومشكور على المرور
لازم تتشجعوا وتجوا وضوق الحلاوة حقت صباحنا

كل النجوم

02-04-2006, 12:51

كل سنة وانتو طيبين بي مناسبة المولد
ونحنا مسافرين نقضيهو في البلد عشان ما يجونا هنا:trrr3:

كل النجوم

12-08-2006, 09:50

صباحكم زين ما هو مبغض ولا شين
نحن الليلة ما شاء الله ننسحر في الصباح دا
عندنا جو إبداع غيم ورزاز مطر
ومفكرين نفطر فول بي زيت سمسم
اتفضلو معانا :D :D :D

الأغبش

12-08-2006, 13:11

عبارة إتكررت كتيير لكن بالجد انتي دايره ليك قعدة بي مزاااااااااااج . عشان نحكي ليك قصة الديك الكبر وحسي بالمسؤلية..
تحياتي

ودبامسيكا

12-08-2006, 13:56

الله يسعد صباحاتك
وصباحك العادى يبقى زى صباحاتنا الخريفية الرائعه فى هذه الايام

الأغبش

12-08-2006, 14:45

يا شباب يا شباب دقيقة .. انا سأتكلم عن نفسي فقط وهنا بقول انو الحياة الحقيقية هي التي نعيشها هنا في السودان وده موضوع بوست كامل فكما قال الفارس والجماعة أجمل من اللمه مافي وانا عن تجربة شخصية أقول لا يوجد أحلي وأجمل من العيش وسط الأهل واللمه ياخي والله بيت عزاء عندنا ولا بيت عرس عند ناس تانية ..والناس الما حاسه بي لمة الغداء دي أكيد ما جربوها والله انا بكون جيعان من الساعة ثلاثة وبنتظر ابوي وأخواني بعد المغرب لما يجو من الزراعة عشان آكل صاح وبي مزاج ولو اكلت براي ما باكل كتير .. وحلاوة شاي المغربية وأصحابك وأحبابك حواليك وتجي اختك بي شفعا الصغار ويجي صاحبك توش وبدون تلفون ولا ضرب جرس وبي هناك بت الجيران عاملة فيها عايزة أدوها حصة رياضيات وهي جاية تشوفك بس.. ولما تشحد من أختك الصغيرة حبة تسالي وتقول ليك ده تسالي المسلسلة.. والعصرية وما أدراك ما العصرية بعد يوم شغل متعب ومدافرة مواصلات تكب في رأسك جردل موية ولا دش وتقشر وتديها لفه علي الميدان وتشاغل ده وتزوغ من ده .. ولما ما يكون عندك موضوع يجيك واحد يقول ليك أرح معاي ناس فلان ديك نبارك لي ولدهم ولا نكفر لي فلان .. بإختصار هنا الحياة كاملة بمعني ان الشغل والكد والتعب موجود لكن ايضاً الترويح وإن إختلفت طرقه موجود .. والله نحن غربة داخلية تاعبانا وما بنغيب اكثر من أيام ..أما الخارجية دي ما تشكروا لي الراكوبة في المطرة جربتها مرتين في الدوحة وفي المرتين لم تذيد الفترة عن شهر ومن أول يو كل التفكير متين الرجعة وما عارف الناس دي هناك عايشه كيف..
اما السادة المتزوجون فسأحكي لكم قصة واقعية لزوجة جارنا بنتها تخرجت من الجامعة وعندما حسبنا لها فترة زواجها الحقيقة أي بوجود زوجها وجدناها ثلاثة سنوات وشوية.
يعني يكون ما سمع أول كلمة قالوها أطفالوا كانت شنو وما شاف واحد منهم بيحبي الا إذا صادف إجازة .. وما ساهر معاهم أيام التسنين والتطعيم ( الجرعة التالتة).. وما حضر نتائجهم لما تفوقوا في المدرسة وما سمّعوا ليهو نشيد العلم و.............
وكفاية كده

كل النجوم

13-08-2006, 13:53

الله يسعد صباحاتك
وصباحك العادى يبقى زى صباحاتنا الخريفية الرائعه فى هذه الايام
وصباحك يا ود بامسيكا
وكل صباحتنا تكون ندية وخريفية
:trrr6: :trrr6: :trrr6:

كل النجوم

13-08-2006, 13:58

جوبتر دمانيوس

14-10-2006, 04:57

upppppppp

......

طبقة الأزون

14-10-2006, 10:20

ومزيدا" من الإبداع كل النجوم ... ونحن بالإنتظار ... مع هذا الجمع المبدع

كل النجوم

15-10-2006, 11:47

جوبتر
كدي احكي
اول انت عن معاناتك في السودان
من سوبا لي الحاج يوسف والكلاكلات
بعدين نرجع لي صباحاتي :c030:

كل النجوم

27-11-2006, 14:43

جوبتر في انتظار حوامتك
ورحلتك لي السودان
عشان نشوف صباحاتك

جوبتر دمانيوس

19-03-2007, 14:12

يوم يجئ وأيام تمضي ..

للرفع لحين نعود ،،
.
.
.

ظلال وارفة

19-03-2007, 14:15

http://www.asmilies.com/smiliespic/smiliestxt/003.gif (http://www.asmilies.com)

لمزيد من الصباحيات الزاهية الباهية

كل النجوم

19-03-2007, 14:22

يوم يجئ وأيام تمضي ..

للرفع لحين نعود ،،
.
.
.

ترجعو بي السلامة

في انتظاركم

كل النجوم

19-03-2007, 14:25

http://www.asmilies.com/smiliespic/smiliestxt/003.gif (http://www.asmilies.com)

لمزيد من الصباحيات الزاهية الباهية

ربنا يزهي كل أيامك يا ظلال
وما ضوقي زي صباحاتنا

ود السجانة

19-03-2007, 14:40

صباح الخير انا جيت الحاصل شنو

كل النجوم

19-03-2007, 14:43

صباح الخير انا جيت الحاصل شنو

صباح الخير الساعة 2
انت جاي منشول تاني ولا شنو

شايقية نجيضة

19-03-2007, 20:56

fulla

19-03-2007, 21:44

هههههههه .. والله ضحكتني .. ورجعتني للخلف
لحقبة سابقة .. الله يعينك يا بتي ويعين الجميع ..

همس الشوق

20-03-2007, 08:08

همس الشوق

20-03-2007, 08:21

تعرفي يا كل النجوم بالمجاملات دي زكرتيني موقف مع عمتي ربنا يطراها بالخير

مات واحد من اهلهم وجاتني انا عدييييييييييييييل لازم تمشي معاي زمااااااااااااااان لمن ابوك اتوفى المره جات وجابت بنيتها معاها (ركزو معاي في بنيته دي ) المهم قدر ما حاولته اتملص مافي طريقه اخواتي حلفن ما يمشن معاها .... قلته عيب برضو اجر .... المهم اها يا عمتي الناس ديل ساكنين وين ..... قريييييييب هنا بي كرعينا بنمشي ..... قلته يا بت انعلي الشيطان وما تحرجي عمتك .................. اها اليوم داك اتلبسنا العصر بدري ومشينا .... ندخل في شارع ونمرق في زقاق .... هيا عمتي لسه .......... يا بت قريب شفتي الشجره ديك بس هم بي ضهرها ............. عدت ثلاثه شجرات والبيت ما ظهر ..... اها لسه .... يا بت ما تشوفيني انا المره الكبير ما تعبته .... غايتو انتو يا بنات الزمن ده .... المهم على هذا المنوال لحدي ما وصلنا ............... يا الله بجيك وتسالني البيت قايلاهو بين الخليفة من شدة ما تراثي ونفس باب الخشب داك ........... دخلنا زي صاله كده .... وحياة الله مافي مره اقل من 80 سنه كلهم عجااااااااااااااايز ... قلته النصبر لحدي ما تجي البنيه وشويه الواحد يعرف يتجاوب .............. تصبر شويه وتقول لي مرت الميت .... بنيتك وينها اصلو بت اخوي دي جايه تعزيها .... بتجي كانت في المطبخ .......... بعد نص ساعه جات واحده عمرها قريب الخمسين سنه ............ الساعه عمتي تقول لي هدي بنيتها ونقوم تعذي وانا في زهول .... وينها البنيه .............. عاد قلبتني القعده .......... قومي انا عندي واجب ... وهن بتكلمو ويتونسوا عن التركية السابقة ............... في النهاية مشينا اول ما طلعته الشارع ................ عمتي ده شنو تقولي لي بنيه ؟.........اسه دي بنيه ؟....... دي تلدني الحتاله ................. قالت لي يا بت مسكينه ما بنيه لسه ما عرسوها .... اتخيلوا
يا حليلك يا عمتي ليك وحشه .....................

ابو عبد الباقي

20-03-2007, 08:27

كل النجوم

20-03-2007, 08:31

كتر خيرو الرفع الموضوع اللذيذ دا...
عارفة يا كل النجوم ..بي الموية البتقطع في نص الحمام دي زكرتيني بيت جدي ... قضيت فيه اخر اجازة في السودان... المشكلة في بيت جد الحمام اخر الدنيا...يعني لو قطعت ليك تكوركي لما حسك يتقرش ما في زول يسمعك... عشان كدا من الاول كل زول شايل جردلو الملايان موية وخاشي بيه الحمام...لزوم الاحتياط.... اختك عتلت عتالة!!!
بس برضو ايام لذييييييييييييييييييييييييييييييييذة....
كمان النسوان البيجو هاجمين بالدستين والتلاتة...وما بعجبهم العجب...
يديك العافية.

الشايقية اللذيذة
يعني مسأة الحمام دي جماعية ما عندنا برانا
غايتو نسوي لينا حزب نسميهو حزب أعداء الحمام sss1

النسوان يديهن العافية كان جن 10 وكان جات واحدة زي ما قلتي ما بعجبن العجب
أمي الله يديها العافية بتقول يجوك ضيوف 100 راجل وما تجيك مرة واحدة

مشكور على المرور

كل النجوم

20-03-2007, 08:33

هههههههه .. والله ضحكتني .. ورجعتني للخلف
لحقبة سابقة .. الله يعينك يا بتي ويعين الجميع ..

هي بالله دي كانت حقبة
نحن في بعض المناطق في السودان عندنا واقع معاش

يديك العافية يا فله

همس الشوق

20-03-2007, 08:34

اها يابنيتي تاني بتمشي مع عمتك المشوار الجاي متين00000

لمن ارجع السودان
بس عمتي عزيزه علي وما بقدر احرجها

شخصية لذيذه شديد

كل النجوم

20-03-2007, 08:37

والله يا كل النجوم لكن مشكلتك كبيره

بس زكرتيني حمام الحي وب ده ومهما تستحمي بتطلعي وسخانه ................... تعرفي انا زمان كنت بحضر مويتي من بالليل ولازم اغطيها عشان الحشرات وتجي الصباح تلقيها بااااااااااارده لمن قلبك يقيف ........... وده الطير الننو من الحمام ... ما ليهو حق؟

لكن اهل العوض ما سوهو اشتر معاكم ...............................
موضوع شيق رجعنا للسودان

هموسة حمام الحي وب وبالذات في الشتاء
بكون غايتو مسيح ساكت من برة برة

أهل العوض بقت حالتم معانا القربو يجنن وبعدو يحنن
كان جو ووب وكان ما جو ووبين وبنشتاق ليهم

تسلمي

كل النجوم

20-03-2007, 08:40

همس الشوق

20-03-2007, 08:46

الله يدي عمتك العافية
قلت لي البنية المشيتي تجامليها عمرها 50 سنة بختك يا همس

صدقي ذكرتني موقف برضو حصل لي
مشت مع أمي ععزاء لي ناس كانو جيرانا قبال ما انا اتولد
ونحن قاعدين جات مرة كبيرة وآخر حنة رسم داخلة وآخر سلام وبعتذرو لي امي انو ما عزموها العرس
قلت قطع شك المرة المتجوهلا دي رسمت الحنة لي الساق عرس بتها ولا ولدا
لمن سالت أمي قالت لا عرسا هي زاتا

حرام عليك يا كليله خلي المره تعيش ايامها ما عروس جديده ..ههه

لكن انا المحيرني فكرت عمتي في انه البت الما متزوجه اسمها بنيه يعني حتى ما بت
غايتو اليوم داك قطعته مصارين ناس بيتنا ............ قالو لي تعالي تمشي ......sss1

سيزيف

20-03-2007, 08:48

كل النجوم
لميتي لي ناس القصة وقعدتي
ابو عادل وسمرا والجنا اب رويس طارق
وقعدتي تحكي ليهم في المغايص
اصلو طارق مكنكش في الدمام ولمن تقولي كدا ما برجع
انا ابو عادي الفيه مكفيه
والعجب زورق الالحان

بالمناسبو ناس التايه بت حمد قالو بكرة جاينكم استعدي . . . .

كل النجوم

20-03-2007, 08:58

حرام عليك يا كليله خلي المره تعيش ايامها ما عروس جديده ..ههه

لكن انا المحيرني فكرت عمتي في انه البت الما متزوجه اسمها بنيه يعني حتى ما بت
غايتو اليوم داك قطعته مصارين ناس بيتنا ............ قالو لي تعالي تمشي ......sss1

كان تعيش اياما ما بعرف والله
مرة اتصل خالي من السعودة على الوالدة في نص الكلام دا فجاة
قالت ليهو هي يا منعم ست عشة ما عرسوها
وداك طوالي عليك الله والعرسا منو ومتين
انا طبعا الشمار حرقني عشة دي منو وعرسوها متين
بس يارب امي تكمل المكالمة اها يا حجة عشة دي منو
قالت لي دي درستنا في الابتدائية
اشهدت واستغفرت
في ست عشة الدرست أمي وهسي هي حبوبة امي
ويادوب عرسوها

كل النجوم

20-03-2007, 09:13

قرقور

21-03-2007, 06:21

ناس الصباح المخستك صباحكم كل قشطة

كل النجوم

21-03-2007, 08:11

ناس الصباح المخستك صباحكم كل قشطة

صباحك فل وياسمين
قرقور
طلتك علينا
بتصلح لينا الصباحات المخستكة

قرقور

21-03-2007, 08:33

كل النجوم صباحك خالي من اي عوارض

كل النجوم

21-03-2007, 08:39

كل النجوم صباحك خالي من اي عوارض

... آمين يا قرقور ...
وصباحك أنت كمان

عضو هادئ

21-03-2007, 11:56

كل النجوم

21-03-2007, 12:00

عادي كتير بيحصل:D :D

خليك دايماً ريلاكسsss1 sss1

تسلم على المرور هادي
ونحن رلاكس وسرلاك زاتو

nanyy

21-03-2007, 12:25

كل النجوم ازيك الليلة جيتك بى صباحى المخستك ده

written in stars

22-03-2007, 02:34

هههههههههههههههههه لا مباااااااااااااااااااااااااااااااااااااااااااااااا ااااااااااااااااااااااالغة يا نجووووووووم !!!!!!!!!!!!!!

قرقور

22-03-2007, 06:42

صباح الجمال

كل النجوم زكرتينى بالصباح المخستك ده عندنا زول في حلتنا عارض شديد يعنى تقابليهو من الصباح يومك يكون يوم مخستك موش صباحك

اها في واحد في حلتنا قال لما تقابل فلان ده الا ترجع تنوم وتصحى تاني عشان يومك يستعدل

حقيقي تباين المزاج شي وارد في حياتنا حسب الحالة النفسية

والله يكفينا شر العوارض

همس الشوق

22-03-2007, 06:52

ناس الصباح المخستك

اها الليله الخميس ده صباحكم كيف ما انعدل شوية

قرقور

25-03-2007, 06:30

صباح الجمال صباح الانوار

صباحكم ورد وياسمين لا معكر لا طين

صباحكم كده زاد وجدي

الفارس

25-03-2007, 07:05

صباح الخير يا شباب
ان شاء الله تكونو اصبحتو تامين ولامين
ما يكون فيكم زول غشا المهندسين

كل النجوم

25-03-2007, 08:06

كل النجوم ازيك الليلة جيتك بى صباحى المخستك ده

صباحك فل يا ناني
مالك صباحك مخستك زينا
قولي بسم الله

كل النجوم

25-03-2007, 08:08

هههههههههههههههههه لا مباااااااااااااااااااااااااااااااااااااااااااااااا ااااااااااااااااااااااالغة يا نجووووووووم !!!!!!!!!!!!!!

نونو صباحك امتحان ساهل
والتوقعات كلها تضرب معاك :D

كل النجوم

25-03-2007, 08:10

كل النجوم

25-03-2007, 08:11

ناس الصباح المخستك

اها الليله الخميس ده صباحكم كيف ما انعدل شوية

هموسة يوم الخميس صباحنا كان ابداع
كنا نتمنى تكوني معانا:trrr6:

كل النجوم

25-03-2007, 08:13

صباح الجمال صباح الانوار

صباحكم ورد وياسمين لا معكر لا طين

صباحكم كده زاد وجدي

كده دا كيف يا قرقور

عموما صباحك نور

كل النجوم

25-03-2007, 08:15

صباح الخير يا شباب
ان شاء الله تكونو اصبحتو تامين ولامين
ما يكون فيكم زول غشا المهندسين

صباحك فال يا فارس
غايتو المهندسي امبارح بالغت معانا
ضرب النهار كلو
لكن الحمد لله تم إجلاء كل القوات حسب الافادات

شهاب

25-03-2007, 08:16

صباح النور وخير مدفق قفف قفف

محمد أبوعاقلة

25-03-2007, 08:18

فعلا مخستك ... كميات من الخستكة وصرة الوش وزي الما فاهم حاجه ...

قرقور

25-03-2007, 08:22

كتاحة فردتي المابستغنى عنها رغم مساختك

صباحك معدول

هندويه

25-03-2007, 08:24

كتاحة فردتي المابستغنى عنها رغم مساختك

صباحك معدول

صباحكم ماعارفه اقول شنو ؟؟؟؟ خليهو حلو

كل النجوم

25-03-2007, 08:24

فعلا مخستك ... كميات من الخستكة وصرة الوش وزي الما فاهم حاجه ...

عاوز تفهم شنو
ونحن نوضحو ليك

طبقة الأزون

25-03-2007, 08:26

صباحنا عسل ... كتاحه وصل ....

كل النجوم

25-03-2007, 08:27

صباح النور وخير مدفق قفف قفف

صباحك أحلى صباح يا شهاب

سنابل

25-03-2007, 08:27

صباحكم ورد وفل وياسمين والله يبعد عننا الخستكه

كل النجوم

25-03-2007, 08:28

كتاحة فردتي المابستغنى عنها رغم مساختك

صباحك معدول

حمدا لله على سلامة فردتك
يا قرقور

وصباحتنا كلها معدولة

قرقور

25-03-2007, 08:29

صباحكم ماعارفه اقول شنو ؟؟؟؟ خليهو حلو

طبقة صباحك ديمة جميل زي جمال الخبر الاديتو ليك

لقيتنيى كيف ؟؟؟؟؟؟؟؟؟؟

قرقور

25-03-2007, 08:30

حمدا لله على سلامة فردتك
يا قرقور

وصباحتنا كلها معدولة

تسلمي يا كل النجوم لكن صدقينى
كتاحة لو ما اتماسخ زي الزول
الجاء من السفر وعفشو اتخلف :c030:

كل النجوم

25-03-2007, 08:30

صباحكم ماعارفه اقول شنو ؟؟؟؟ خليهو حلو

حلو بي طلتكم

سنابل

25-03-2007, 08:31

كتاحه حمده لله علي سلامتك والمنتدي منور بيك:trrr6:

كل النجوم

25-03-2007, 08:32

صباحنا عسل ... كتاحه وصل ....

صدقت
صباحنا عسل
بي وصول كتاحه
وبي زيارتك صباحتنا تحلى

كل النجوم

25-03-2007, 08:33

صباحكم ورد وفل وياسمين والله يبعد عننا الخستكه

آمين يا سنابل

طبقة الأزون

25-03-2007, 08:40

طبقة صباحك ديمة جميل زي جمال الخبر الاديتو ليك

لقيتنيى كيف ؟؟؟؟؟؟؟؟؟؟

لقيت .. زول بيهاتى الليل
ويتوجع يقول ياليل ..
يجينا صباحا" شكلو كل جميل ..
جمال عينيك .. جمال النيل ...

لقيتك والله قرقور .. إتربى فى المورده ... وإتجدع فى البحر .... وبدأ يدافر فى الحياه ..
شىء رغيف حار .. شىء سمك .. شىء شطه حمراء قروها تولع ... وفوق دا كلو ... عسل .. عسل .. عسل .... ينقط .. الكلام الحلو من خشمك ....

همس الشوق

25-03-2007, 08:47

فعلا مخستك ... كميات من الخستكة وصرة الوش وزي الما فاهم حاجه ...

بسم الله هو ده جاء متين

وبدا في ...........................

قول يا هادي :trrr1:

والله الشوق ............................. (اكمل )

الننو دا

25-03-2007, 09:47

كل النجوم

25-03-2007, 09:56

غايتو احلي حااااااااااااااااجة عجبتني في الموضوع دا كلو :D

لمن تدخل الحماااااااااااااااااام وتلقي الموية قااااااااااااااطعة :D

ايه الحلاووووة دي :D ايه الحلاوووووة دي sss1 sss1

:c030:

عجبتك قطعت الموية عشان ما تستحمى

يخسي عليك يا ننو :mad:

طارق صديق

25-03-2007, 10:11

صباحاتكم ندية .. تقطر ..ندى .. ندى..ندى !!

كل النجوم

25-03-2007, 10:18

صباحاتكم ندية .. تقطر ..ندى .. ندى..ندى !!

صباحاتك عسل يا طارق

الننو دا

25-03-2007, 11:34

عجبتك قطعت الموية عشان ما تستحمى

يخسي عليك يا ننو :mad:

:eek: :eek: :eek:

إنتي قاصدة منو :D

إنتي قلبتي شايقية :D

طبعا مقصود كلمة تستحمي في السطر الاول علي يدك الشمال sss1

كل النجوم

25-03-2007, 11:36

:eek: :eek: :eek:

إنتي قاصدة منو :D

إنتي قلبتي شايقية :D

طبعا مقصود كلمة تستحمي في السطر الاول علي يدك الشمال sss1

بقيت محسية
هههههههههههه

كل النجوم

07-05-2007, 12:52

قلنا دائما الخستك بتبدأ مع الصباح لكن اليوم داك بدات نهاية اليوم
اليوم كلو كويس لغاية ما نزلت في محطة البيت دخلت الصيدلية اشتري
حبوب وسكر لي الحاجة ربنا يديها العافية قلت لي بتاع الكاشير اديني اسكراتش
قام قال لي في اسكراتش بي 50 الف بس خمسين دي سمعتها خمسة الف من الاسعجال قلت ليهو هاك نزلو لي نزلو وانا مشيت لي الدكتورة شلت منها الحاجات وجيت راجعة احاسبو اديتو 5 الف قال لي لا دا بي خمسين اها يا ود الناس خمسين كيفين خلاص رجعو قال لي اوديهو وين موبايل ما عندي غايتو عندي خمسين أمانة ( هوي يا سيد الهناي تعال شيلا :c030: ) قمت اديتا ليهو وما عرفت اتصرف كيف ركبت لي رقشة ومشيت البيت نزلت في الدكان قبال البيت وقلت لي بتاع الدكان اديك رصيد قال لي ما عندي قروش بي جاي وبي جاي حنستو قال لي خلاص اديني رصيد بي 20 امشي بيهو حالة قلت ليهو بي عشرين انت عوير انا رصيد بي تلاتين الف اوديهو وين يا بي اربعين ولا ما في المهم قال لي حوليهو وانا بديك القروش بعد يومين وصلت البيت وانا ما بعرف احول موبتل مستنية اخوي يصحى من النوم اول ما صحى قبال يصلي العصر قلت ليهو حول لي الرصيد حولو وبقى فاضل رصيد بي عشرة الف وانا محتاجة ليها اكمل الخمسين حقات الزول امي بقت تسوي لي النضرب لي خالتك والنشوف ناس اختك بس قفلت موبايلي وختيتو في الدولاب عشان زول يضرب منو مافي لمن نبيع ال 10 الف دي وتاني رصيد زاتو ما عاوزاهو
جيت المكتب اول زول وحرست ليك الاستقبال اول زول جا المدير المالي وانا بكجنو كجنت السنين استنيتو لمن طلع مكتبو وشرب الشاي ومشيت بس الزينة جات تتبسم قال لي غريبة تجي في مكتبي من الصباح انتي لو عندك طلب بترسلي بيهو زول عشان ما تشوفيني قلت وكتين هو ناقش اني ما بدورو النكون واضحة معاهو اسمع انا دايرة ابيع ليك رصيد قال لي اسف امبارح شحنت بي 25 وزوجتي جابت اسكراتش بي 10 ما نزل في موبايلا نزلتو في حقي وابا يتحول يعني عندي رصيد بي 35 الف ما هبشتو ، لعنت ابو اليوم الطلعني
قلت ما مشكلة بجي المحاسب وهو ما بقصر معاي حرستو في مكتبو وداك شايقي مقطع المساخة اها قال لي اصبحنا بي الله مالك من الصباح ما تقولي عندك مشوار ما بسوقك معاي قلت ليهو ابدا دايرة ابيع ليك رصيد وعشان خاطرك ال 10 بي 9:30 قصرت معاك قال لي موبتل ما شغال بيها سوداني لو عندك اشتري
حمت المكتب كلو بي رجل كلب يا شايلين سوداني ولا اريبا
في النهاية ما فضل لي الا المراسلة وانا مشاكلاهو قبل يومين وغرمتو حق البارد قلت ما مشكلة هو مسكين وببيع ليهو ان شاء الله بي الفين والباقي بتصرف فوقو
اول ما جاب لي حفاظة الموية عاينت ليهو وين يا فتحي بقت بس تجيب الموية وتزوغ ولا حتى بتوريني اخبارك واولادك كيف استغرب طبعا قال البت جنت لكن هو عشان مسكين وطيب قعد في الكرسي وبقى يحكي لي انو بتو حا تمشي سنة تانية ولدو دخل الروضة وقصص كتيرة لكن اتحملت عشان ابيع الرصيد في النهاية قال لي اولادي في القضارف طولت ما اتصلت عليهم قلت ليهو خلاص انا ببيع ليك رصيد بي 5 الف قال لي ما عندي ممكن بي 3 قلت ليهو طوالي وفرحت فرح شديد
بس بالله المحاسب الشايقي جا ماشي قدام مكتبي هو وبتاع الاعلام قال ليهو شوف زولتك دايرة تبيع لي فتحي الليلة غتاتة كدا كان اخسر ليها البيعة جو داخلين وين يا فتحي مالك هنا قال ليهم دايرة اشتري رصيد منها قالو ليهو تشتري منها كيف انت ناسي يوم غرمتك حق البارد وقالت ليك اشربو انت
ولا متذكر يوم شاكلتك لمن كسرت المق حقها
ولا ناسي يوم ودتك البلابل بي كرعينك
المهم حمشوهو شديد وفي النهاية قالو ليهو
ما تشتري منها وكيتن عليها حا نديك اسكراتش بي 5 الف هدية مننا عشان بس ما تشتري منها
المهم زعلة مني حا ارسل بي ال 10 الف مسجات لي جوبتر :c030: