كل ورده...وكل قمحه
--------------------
كل ورده...وكل قمحه
كل ساعه وكل لمحه
كل تايه وكل سمحه
كل شى..راجع لخالقُه
والزمن لو فات بخطوه
ما بْتعود ترجع دقايقه.
ونحنا قاسينا وشقينا
وآخر الرحلة الحزينه
غِبنا فى الحسره وبكينا
وقلنا دنيا ..وحى علينا
نِحنا فيك ضِعنا انتهينا
راح زَمَنَّا
وغاب أملنا
ولو بتقدر- وما حتقدر-
أبكى يا شارع المدينه.
يا زمننَا الختّ رَحلهُ
فى صحارى المستحيل
بالغموض لفّح ألَمنا
وضارى من عينَّا السبيل
وين مُثُلنا
ووين قيمنا
ووين صِحاف ناسنا القبيل
ومالو حالك يا زمننَا
ديمه تِتجبَّر تشيل
يا سنين عمر المثالى
الماها زى كل السنين
فيكِ
نجم الإلفة غرّب
وضاع معاك سِر اليقين
حتى أحلام الصداقة
الكانت العِز للجبين
مات ضياها
وراح شذاها
ورنّح اغصانها الحنين
لى مُثُلنا
ولى قِيَمنا
ولى صفا الماضى الأمين
ويا هو حالك يا زمَننا
ديمة تِتجَبّر تشيل
الوهم فيك انه نحيا
واليقين هو المستحيل
وكل ساطع...وكل ضايع
كل شى..
راع لخالقُه
والزمن لو فات بخطوه
ما بتعود ترجع دقايقُه

حروف اسمِك
-----------
حروف اسمِك
جمال الفال
وراحة البال
وهجعة زول بعد ترحال
وتنّية حلوة للشبال
ودنيتنا ومشاويرنا
وغنواتنا الى ما بتِنقال
حروف اسمِك
نجوم ركّت على الياسمين
فرح فى عين جمالها حزين
أساور فى إيدين طفلة
بتحفظ فى كتاب الدين
زَفَافَ عاشقين بعد فرقه
وسط باقات دُعَا الطيبين
حروف إسمِك
عقد منضوم بخيط النور
وطلة وردة من السور
ونغمة تنادى من طمبور
وشُعلة فرحة فى الوادى
تَشِع جَذلانه ليها شهور
حروف إسمِك
وَكِت أشتاق وأرحل ليك
وأسرح فى عسل عينيك
بِتَحضِنّىِ......
قَبُل ألمسَ حرير إيديك
تأرجِحنى..وتَفَرحنى..وتخلينى
أدُق سدرى
وأقيف وسط البلد واهتف
بريدك يا صَباح عمرى

شكراً لك اخي المصير على هذا الإهداء

مشكووووووور وبس