مشاهدة النسخة كاملة : كلاكيت تاني مرة ** لف وتسكع في حواري وزقاقات امدرمان**


الصفحات : [1] 2 3

قرقور
27-06-2006, 07:40
البوست ده عبارة عن اجترار ذكريات جميلة عشناها في حضن امدرمان

عشنها اطفال وعشناها شباب

ياريت يجي كل زول يحكي لينا عن منطقة في امدرمان

نتكلك عن ثقافة امدرمان - فن امدرمان - ادباء امدرمان - كورة امدرمان

طبقة الأزون
27-06-2006, 08:07
أنا أمدرمان .. أنا السودان .. كدا كفايه جدا" ..

دار الرياضه أمدرمان .. كان مدرسة نتعلم منها الضحك ونتعلم منها فنون الكرة الجميله .. كانت دائما" وأبدا" مباراة بيت المال وأبوروف حربا" بين داحس والغبراء ومباراة التاج والزهره المانيا الغربية والمانيا الشرقيه قبل إتحادهما ..

الهادى الضلالى .. ودالخولى .. كشك .. وغيرهم ..

تلك البدايه .. ولى متابعه .. ودمتم سالمين

قرقور
27-06-2006, 08:21
طبقة الاوزون

طالما بديت ببيت المال

نتذكر خرستو الشخصية المرحة التى طالما اثرت المرح والقفشات لرواد دار الرياضة امدرمان

بيت المال ميدان الكداوية وساحة بيت المال

حوش الدعيتا

طبقة الأزون
27-06-2006, 08:32
قرقور

تتذكر المجروس .. كان عامل فيكم شنو .. فى كل مباراه .. لاحظ المجروس دا كان بجى من الشغل لدار الرياضة مباشرة ..


ههههههههههى زمن يادنيا ..

قرقور
27-06-2006, 08:40
يازول انتا زول قديم

انتا من زمن المجروس

المجروس ده نحنا سمعنا بيهو سمع

يازول انتا من سنة شخطة شكلك

طبقة الأزون
27-06-2006, 08:51
يازول انتا من سنة شخطة شكلك


ماهى المشكله ذاتها إنك عايز تعرف أمدرمان من زمن شخطه .. يعنى أقول ليك شنو .. العجب سجلوه ب 90 مليون .. زمـــان الناس كانت بتتسجل بعصير ليمون وعند عمك كرار وأتحداك تعرف لى كشك كـــــرار دا وين فى أمدرمان .. داير
خيارات ؟؟ ولاتستعين بصديق .. أديك رقــــــم واحد فى ( قهوة الفكى ) ؟؟؟؟؟؟؟

قرقور
27-06-2006, 08:59
ود الفكي

ولا ود اللغا

حدد الاتنين قريبين لي بعض يا منقة

يازول ما قلت ليك انتا قديم

طبقة الأزون
27-06-2006, 09:40
ود الفكي

ولا ود اللغا

حدد الاتنين قريبين لي بعض يا منقة

يازول ما قلت ليك انتا قديم


ود اللغا دى بتقع وين لجورج مشرقى .. أكيد زمن الحب القديم كنت بتشترى سجاير KENT من هناك

قرقور
27-06-2006, 09:49
اي يا اوزون

جورج مشرقي والسجاير الفاخر

صيدلية ابراهيم وتمشى قدام تلف يمين سوق الحرامية


عارفك يا مان هدومك كلها مشتريها من هناك

هوي ده طبعا قبل ما تجي الدوحة وتقع ملك الموضة وسبلاش

ندى السودان
27-06-2006, 10:14
والله يا فرد لقيتكم لذيذين وخطيرين عديل كدا... وقدام جدا في نفس الوقت ... لكن كدى أمشو لي كدا على جهة بانت والفتيحاب ... عشان أشوف قدمكم دا من بتين ... أبدو إنتو وأنا حا أكمل .......
لكن خلينا نسمي البوست دا ... تجمع ناس أم درمان والدوحة

قرقور
27-06-2006, 10:18
الاخت ندى السودان

اها نبدا ليك بانت من عابدين عوض

محطة الاحمر وعابدين شرف وبانت اخر محطة

نخش جوة على سوق امدفسو وبتاع اللبن والباسطة الجنب السينما
حليل سينما بانت .

اها نبدا ليك من بانت غرب ولا شرق يا ندى

ندى السودان
27-06-2006, 10:26
بانت غرب يا فردة .. من استاد الموردة ... قوقل إيرث بث

قرقور
27-06-2006, 10:31
بانت غرب

صبري ..... بسم الله كلامي خفيف

بانت غرب صحبى الكمندان امين التجاني وصلاح صاموتي

بانت غرب بيتا ودارنا استاد الموردة

وتربيزة الكوشتينة وشراب الشاي بالببن في النادي

ورقصتنا في ميدان السلة لما نغلب الرشاشات والصهاينة

والمابي الغلب يبقى عاشق هلب يا ناس

بانت غرب دار الارقم - وبقالة النتيفة

وبجيك تاني ...............

ندى السودان
27-06-2006, 10:37
لقيتك خطيييييييييير عديل كدا ... صلاح صاموتي قالو جاهو اللوتري خلاص وشتت ... عقبالك يا فردة ....
والنتيفة المشهور بالنبقة طبعا على راي حبوباتنا العزيزات .... كان كدا بنبقى جيران والله ...

طبقة الأزون
27-06-2006, 10:41
بانت غرب يا فردة .. من استاد الموردة ... قوقل إيرث بث


فى عندك .. حى الصقور .. مرفعين الفقرا .. حله بون .. ميدان الربيع ..

ولف شمال يالله بس قوم بينا .. تعرف شارع الفيل دا وين ؟؟؟ وجائزة كبيره لمن يعرف أين يقع زقاق العمايه بالعباسيه .. حى الشوايقه .. زاوية شيخ الزين ؟؟؟؟؟

بحتو .. أمدرمان دى وورونا كنتو بتجكسوا فى ياتو حى .. وياتو زقاق

قرقور
27-06-2006, 10:45
ههههههههههههههههههههههههه
زقاق العماية جنب جامع الفلاتة في محطة عابدين

مرفعين الفقرا في العباسية

اولادبون واغاني شرحبيل احمد


شارع الفيل دي حلتنا

ناس عقارب وناس الامين حامد

والشاعر عوض احمد خليفة الكوتش صلاح ليبيا - صلاح الدين الفاضل

كشك حجة نفيسة

ناس الجاك الماظ

بجيك تاني

ندى السودان
27-06-2006, 12:08
شكلنا كدا يا طبقة ويا قيقة في النهاية حا نطلع أخوان ... زي الأفلام الهندي بالضبط ...
بس ما شايفة ناس تاني من الدوحة ... يلا يا جماعة خلو التجمع يكتمل ... يمكن في النهاية نطلع لينا بنظرية ......

قرقور
27-06-2006, 12:13
شكلنا كدا يا طبقة ويا قيقة في النهاية حا نطلع أخوان ... زي الأفلام الهندي بالضبط ...
بس ما شايفة ناس تاني من الدوحة ... يلا يا جماعة خلو التجمع يكتمل ... يمكن في النهاية نطلع لينا بنظرية ......


اكيد يا ندى

يلا دي بداية جلسة لقاء لناس الدوحة

اها يلا تعالو

اوزووووووووووووون تقل جيبك الناس بقت تكتر

بكرى الامين
27-06-2006, 12:16
والله يا فرد لقيتكم لذيذين وخطيرين عديل كدا... وقدام جدا في نفس الوقت ... لكن كدى أمشو لي كدا على جهة بانت والفتيحاب ... عشان أشوف قدمكم دا من بتين ... أبدو إنتو وأنا حا أكمل .......
لكن خلينا نسمي البوست دا ... تجمع ناس أم درمان والدوحة

انا من ناس الجزيرة الخضراء وجميلة

اها كان ناس الدوحة معاكم ياها دى القعدة

ووناس امدرمان تحية وشوق انا درست جامعة امدرمان الاهلية

وسكنت فى داخلية بانت

اها اجر بنبرى ولا اتخارج

قرقور
27-06-2006, 12:20
انا من ناس الجزيرة الخضراء وجميلة

اها كان ناس الدوحة معاكم ياها دى القعدة

ووناس امدرمان تحية وشوق انا درست جامعة امدرمان الاهلية

وسكنت فى داخلية بانت

اها اجر بنبرى ولا اتخارج


بكور حبابك الف


حللت اهلا ونزلت سهلا


وبيك يتواصل عقدنا الجميل

st alnas
27-06-2006, 12:31
:trrr6: ندى السودان،طبقة،قرور،واكيد معاكم عنقوية العسل ناس امدرمان،انا خرطومية بحتة ومابعرف فى بلدكم دى غير مستشفى امدرمان وسوق امدرمان وبيت ناس عنقوية،لكن عجبتنى حكاويكم شديد وحبيت اسلم وكدا

قرقور
27-06-2006, 12:36
:trrr6: ندى السودان،طبقة،قرور،واكيد معاكم عنقوية العسل ناس امدرمان،انا خرطومية بحتة ومابعرف فى بلدكم دى غير مستشفى امدرمان وسوق امدرمان وبيت ناس عنقوية،لكن عجبتنى حكاويكم شديد وحبيت اسلم وكدا


ست الناس حبابك الف

ناس امدرمان بيرحبو بيك وياريت تشاركينا كلامنا ده

بالنسبة للخرطوم بنجيها نحكي عن ضهبنا في الخرطوم طبعا الود اوزون كبير المضهبين
النوع البيكون من اول يوم في العيد مضهب في حدائق مايو وبيكون لافي مابين القاعة وحدائق مايو

برضو ايام الهابي لاند ورحلاتنا للغابة والري المصري يعنى بنصلك في الخرطوم بس جهزي جك العصير

تحياتي واحتراماتي

ندى السودان
27-06-2006, 12:40
تحية ليك يا بكور .. حللت أهلا ونزلت سهلا .. أهلا بيك وبناس الجزيرة .. وطالما إنك مشيت في بانت ولفيت فيها وأكيد جيت ماري ببيتنا .. فأهلا" بيك ومرحبتين والله ...

بكرى الامين
28-06-2006, 00:38
تحية ليك يا بكور .. حللت أهلا ونزلت سهلا .. أهلا بيك وبناس الجزيرة .. وطالما إنك مشيت في بانت ولفيت فيها وأكيد جيت ماري ببيتنا .. فأهلا" بيك ومرحبتين والله ...


مش مارى ببيتكم انا عرفت ناس بانت كلهم

اها دى قعدة

قرقور
28-06-2006, 06:02
يوم جديد وصباح جديد

يسعد صباحكم

اها الليلة اللف والحوامة في سوق امدرمان

بس اشرب لي كباية شاي واجيكم

طبقة الأزون
28-06-2006, 07:55
قرقور .. صباح الخير

والله سوق أمدرمان دا كان حاجه عجيبه شــــــــديد .. وأجمل حاجه كانت ميامى وخيرات .. شلقامى .. النقطه ( مش نقطة عريسنا محمد الصادق ) العدنى .. أبومرين .. وسوق الجلود ورحم الله الوالد أحمد عالم .. فقد كان علما" فى هذا المجال

بحت معاى .. وبجيك راجع

قرقور
28-06-2006, 08:11
قرقور .. صباح الخير

والله سوق أمدرمان دا كان حاجه عجيبه شــــــــديد .. وأجمل حاجه كانت ميامى وخيرات .. شلقامى .. النقطه ( مش نقطة عريسنا محمد الصادق ) العدنى .. أبومرين .. وسوق الجلود ورحم الله الوالد أحمد عالم .. فقد كان علما" فى هذا المجال

بحت معاى .. وبجيك راجع

سوق امدرمان

جورج مشرقي - الجامع الكبير - المحطة الاسطى - مطعم الرياضيين - شارع العناقريب
نرجع لبداية السوق
ميدان البوستة - ميدان الاسكلا- عباس رشوان -

سوق امدرمان عادل الاطرش بتاع الباسطة - عبدالرحمنقشي بتاع الليمون

مكتبة امدرمان - المكتبة الوطنية

اها مستنيك تجي بالباقي

مايا
28-06-2006, 08:44
يا حلوين انا الفترة القعدتها في السودان كانت في امدرمان..
ويا سلام على المهندسين وايامها..
ويا حليل الجري في بانت لي المعهد....والشحطه للمواصلات..

قرقور
28-06-2006, 08:50
يا حلوين انا الفترة القعدتها في السودان كانت في امدرمان..
ويا سلام على المهندسين وايامها..
ويا حليل الجري في بانت لي المعهد....والشحطه للمواصلات..


مايا حليل امدر وحليل ناسها

طبقة الأزون
28-06-2006, 09:04
سوق امدرمان
ميدان الاسكلا




ميدان الاسكلا .. والأغنية الجميله جدا"

من الاسكلا وحلا .. قام من البلد ولى .. دمعى للتياب بلا

قرقور .. كدى ورينا الميدان دا كان وين .. والاغنيه الجميله دى سببها شنو ..
نور لينا الجكس دا بالمعلومات الحلوه دى

كشك عمك صالح كرار .. والليمون الأخضر فقط .. إنته داخل من زقاق إجزخانة أبو نخله ومتجه نحو الجنوب والاجزخانه على يمينك وبعد مسافه 200 متر تلقى الكشك دا .. أجمل
عصير فى السوق .. وكان نقطة تجمع للناس الماشين دار الرياضه والرياضين واللاعبيـــن
يعنى قبل المباراه كباية عصير تجرى دمك ذى الحصان ..

ههههههههههههى يازمن .. بجيك راجع

قرقور
28-06-2006, 09:09
سوق امدرمان

شارع كرري النقادة بتاعين الطعمية والمخلل

شارع كرري بتاعين التلج ووقف الصفوف في رمضان للحصول على لوح تلج

الدانوب بتاع الباسطة الطيب خوجلاي بتاع العجلات

استديو الوادي

طبقة الأزون
28-06-2006, 09:26
أمدرمان .. وسوق أمدرمان

شارع الصاغه .. سوق الدهب وأولاد مله .. سوق العناقريب .. زنك الخضار واللحمه ..
حاجات الفول وشفع الفلاته وأكياس ورق الاسمنت .. سوق الجلود وسيطان العنج .. ياربى أبوك مادقاك بسوط العنج ياقرقور .. أولاد الزمن دا .. الواحد بيدقوه بعصايه الحلاوه ( حلاوه عصايه ) .. بتعرفها ولا أرسل ليك ولدى مؤيد يعرفك بيها )

ندى السودان
28-06-2006, 09:27
صباح الخير يا فرد أم درمان ... والله إنتو رائعين بروعة أم در ذاتها .... تعرفو إني سافرتا السودان ثلاث مرات بس ... في 83 ... و88... وأخرها في 2003...
لكن أم در ما بتتنسي ... بي نيلها وناسها الحلوين

قرقور
28-06-2006, 09:29
http://shahss.com/mus/hashem-omdor.wma

اغنية امدر بصوت المرحوم هاشم ميرغني ود ابوروف

نسخن بيها البوست

طبقة الأزون
28-06-2006, 09:31
صباح الخير يا فرد أم درمان ... والله إنتو رائعين بروعة أم در ذاتها .... تعرفو إني سافرتا السودان ثلاث مرات بس ... في 83 ... و88... وأخرها في 2003...
لكن أم در ما بتتنسي ... بي نيلها وناسها الحلوين

عشان كده إنتى حلوه .. لانك من أمدرمان .. لكن باين الجميل مولود فى الدوحه ..
والأم سليله أمهرا
والوالد من قلب أمدرمان

خليك معانا ..

قرقور
28-06-2006, 09:36
أمدرمان .. وسوق أمدرمان

شارع الصاغه .. سوق الدهب وأولاد مله .. سوق العناقريب .. زنك الخضار واللحمه ..
حاجات الفول وشفع الفلاته وأكياس ورق الاسمنت .. سوق الجلود وسيطان العنج .. ياربى أبوك مادقاك بسوط العنج ياقرقور .. أولاد الزمن دا .. الواحد بيدقوه بعصايه الحلاوه ( حلاوه عصايه ) .. بتعرفها ولا أرسل ليك ولدى مؤيد يعرفك بيها )


اوزون
سوق امدرمان موقف التكسي

ومدرسة الكلية القبطية مكان الجكس الشديد

امدرمان اولاد ملين بتاعين الكدرات

سوق امدرمان الصاغة اولاد تبيدي

اسمع بتعرف بتاع سندوتشات الطعمية الفي اول شارع العناقريب من بدايتو

تضرب السندوتش واقف على حيلك وتشتت

قرقور
28-06-2006, 09:41
صباح الخير يا فرد أم درمان ... والله إنتو رائعين بروعة أم در ذاتها .... تعرفو إني سافرتا السودان ثلاث مرات بس ... في 83 ... و88... وأخرها في 2003...
لكن أم در ما بتتنسي ... بي نيلها وناسها الحلوين



ندى السودان

ناس امدرمان دوما حلووووين وما بنسوها مهما طال اغترابهم

ربنا يرجعك ليها سالمة

طبقة الأزون
28-06-2006, 09:43
إتخيل ياقرقور أجمل حاجه كانت فى السوق موقف الباصات والتاكسى .. أبورجيله .. والتاكسى الصفر الطالعه روحها .. الهنتر .. الموسكوفيتش .. الفولفو .. مش اللكزيس والباجيرو واللاندكروزر والعجيبه والغريبه إنو هذه الأنواع مازالت تعمل .. الفولفو .. تاكسى شندى .. والهنتر والموسكوفيتش متواجده بكثره فى مدنى وعطبره وعمك أحمد ( رحمة الله عليه ) ينظم فى صفوف التاكسى .. الثوره بالنص .. أبوروف .. الخرطوم .. وأى تاكسى طالع يناوله خمسه قروش ( وبالمناسبة ياجكس القرش دا عمله سودانيه ) مش القرش أخو قرقور

قرقور
28-06-2006, 09:54
السوق شارع الدكاترة

دكتور احمد صابر .... دكتور المفتى

شارع الدكاترة صيدلية المدينة ونادي الخرجين

قصادو سوق الحرامية طبعا يا اوزون زمان لبسك كلو من هناك وقشراتك كلها من هناك

mohamed merghani
28-06-2006, 10:33
تعظيم سلام لناس امدر
أها جيناكم يا حبايبنا

mohamed merghani
28-06-2006, 10:39
تعرف يا قرقور عيادة د الهادي أحمد الشيخ بتاع العيون و عيادة د عبد الملك مهدي بتاع الأسنان ? جمبهم طوالي عبد اللطيف أمان الصائغ ونادي الحرية وبرعي المصري والله الزول دا كان بسوي حلات شعير

قرقور
28-06-2006, 10:44
كيف ما بعرفهم يا ميرغني

والدانوب صالون فينوس

وعطا الحلاق

ارح ادينا المزيد

mohamed merghani
28-06-2006, 10:58
ميدان الاسكلا .. والأغنية الجميله جدا"

من الاسكلا وحلا .. قام من البلد ولى .. دمعى للتياب بلا

قرقور .. كدى ورينا الميدان دا كان وين .. والاغنيه الجميله دى سببها شنو ..
نور لينا الجكس دا بالمعلومات الحلوه دى

تعرف يا طبقة يا بلدياتي انو الأسكلة المذكورة في الأغنية ما عندها اي علاقة بامدرمان كمكان ولكن ابطال الأغنية أغلبهم أمدرمانون أقحاح ...
والقصة تقول ان الحاج محمد أحمد سرور كانت له صديقة وحبيبة قد أزعمت الرحيل والسفر إلي الجنوب اسمها ملين أو مليم وكانت بواخر الجنوب تقلع من الأسكلة جوار قاعة الصداقة ومكان معدية توتي ....فاغتم سرور وحب أن يودع محبوبته وداعآ يخلدها به في أغنية فقصد أصدقاءه الشعراء وقال لهم إذا ما قدمتوا لي محبوبتي دي محطة محطة تاني لا بيني لا بينكم
فابتدأ ود الرضي بالمطلع وصار كل واحد يقول مقطع إلي أن وصلوها الرجاف...

قرقور
28-06-2006, 11:14
ود ميرغني

لقيتك خطير

ما تقول لي كنتا شيال مع سرور

تسلم على المعلومة الحلوة دي

mohamed merghani
28-06-2006, 11:18
من نوادر الهادي الضلالي ... طبعآ الزول دا كان صاحب الجان ومرة كدة كان في شباب من الحلة قاعدين يتعشوا عند الجان وكان معهم شاب وجيه اسمه إيهاب وكان الهادي الضلالي متحكر جوة الكشك .. ولما جاء وقت الحساب والدفع حاسبهم الجان بطريقتو الما مفهومة ديك فأسقط في أيديهم عشان قروشهم كانت ناقصة والجان جنو وجن كدة فابتدأوا يحنسوا فيو يخليهم يمشوا يجيبوا ليو باقي القروش وهو رافض وهنا اتدخل الهادي الضلالي وقال ليهم اسمعوا يا شباب كلللكم كدة امشوا جيبوا القروش لكن خلوا لينا إيهاب دا أمنية ..

mohamed merghani
28-06-2006, 11:29
ود ميرغني

لقيتك خطير

ما تقول لي كنتا شيال مع سرور

كان الوالد رحمه الله عضوآ في فرقة السودان للتمثيل والموسيقي - فرقة الرواد المسرحية فيما بعد - وعندما كنت صغيرآ كان يحلو لي الإستماع لونسة الجلاكين ديل لما يتلموا عندنا في البيت فعرفت منهم الكثير وحفظت معهم مسرحية المك نمر ....رحمة الله عليهم جميعآ ...

طبقة الأزون
28-06-2006, 12:28
سوق الحرامية طبعا يا اوزون زمان لبسك كلو من هناك وقشراتك كلها من هناك


والله أتعبتنى معاك ياقرقور .. مافى كشه قايم بيها إلا القاك أول واحد مركبينو فى البوكس .. عليك الله ياجنابو .. دى آخر مره .. نحن عليك وعلى أمك القاعده تلقط فى باقى الهدوم المسروقه .. ياالله شتت عشان خاطر الوليه الطيبه دى ..

مابتتذكر بوسته أمدرمان والحلاقين تحت الشجره .. وهااااااااااااك يالكشه .. واحد نص راسو محلوق .. وواحد باقى صابون الحلاقه فى دقنو .. مناظر مابتتنسى والله

n2010d
28-06-2006, 12:52
ياجماعة انا امدرمانية بحتة وبحب امدرمان مووووووووووووووووووووووووووت الله يخلى اى زول بحب امدرمان واى زول بحب امدرمان القديمة انا عشت بداية حياتى بالملازمين والان فى مكى

طبقة الأزون
28-06-2006, 12:57
والان فى مكى

وين فى مكي .. جنب بيت ناس مجدى لبيب رحمة الله .. ولابيت ناس أحمد خضر ؟؟ ولا بيت ناس بكرى السيد البكرى .. مرحب بك وبناس نادى الإخلاص وشلة ود الخولى

n2010d
28-06-2006, 13:23
وين فى مكي .. جنب بيت ناس مجدى لبيب رحمة الله .. ولابيت ناس أحمد خضر ؟؟ ولا بيت ناس بكرى السيد البكرى .. مرحب بك وبناس نادى الإخلاص وشلة ود الخولى


هووووووووووووووى ياططبقة انا شافعة لسه صغنونة مابعرف ليك ناس بكرى ولا ناس مجدى انا ساكنة جنب بيت اسماعيل الازهرى طواااااااااااااااااااالى

n2010d
28-06-2006, 15:08
ياناس امدرمان القدام وين انتو

قرقور
29-06-2006, 07:20
هووووووووووووووى ياططبقة انا شافعة لسه صغنونة مابعرف ليك ناس بكرى ولا ناس مجدى انا ساكنة جنب بيت اسماعيل الازهرى طواااااااااااااااااااالى


حي السيد المكي

ناس داوؤد - وناس شاكر وطارق وشكري عبدالرحيم اولاد الشوايقة- ناس القرمانية - عمارة كايرو

ناس جادو - نصر الدين كرب - محمد سالمبة

شارع النصارى ناس جنين مانيوس

دكان محمود - ناس الفزاري
اها رايك شنو وصفت ليك حلتكم


ميدان الحلقة - جامع الاسماعيلية - ميدان الحديد

مخازن بن وعمر زمان

قرقور
29-06-2006, 12:08
شباب

الليلة العشاء في العباسية

نمشي نتعشي عند الكوتش فول كبدة ونحلي بالفاخر

ونمشي الشارع البي وراء في حفلة بي ود بون ( بيقلد شرحبيل ومعاو سامي سيمبا )

وربا وجالوا صباحي

قرقور
02-07-2006, 07:49
ما زال اللف والتسكع مستمر

اليوم نخش على على ميادين الكورة في امدرمان ميادين الدافوري

n2010d
02-07-2006, 13:35
حي السيد المكي

ناس داوؤد - وناس شاكر وطارق وشكري عبدالرحيم اولاد الشوايقة- ناس القرمانية - عمارة كايرو

ناس جادو - نصر الدين كرب - محمد سالمبة

شارع النصارى ناس جنين مانيوس

دكان محمود - ناس الفزاري
اها رايك شنو وصفت ليك حلتكم


ميدان الحلقة - جامع الاسماعيلية - ميدان الحديد

مخازن بن وعمر زمان

والله رهيييييييييييييييب عديل كدا فعلا ماخليت حاجة انت وين ساكن

العنقاء
02-07-2006, 23:28
شباب

الليلة العشاء في العباسية

نمشي نتعشي عند الكوتش فول كبدة ونحلي بالفاخر

ونمشي الشارع البي وراء في حفلة بي ود بون ( بيقلد شرحبيل ومعاو سامي سيمبا )

وربا وجالوا صباحي

عباسيه,,,,,,,,,, إيا إيا:D
الدقا منو,,,,,, الدقا منو,,,يا ناس
دقوهو في عابدين دقاهو شمس الدين

البوووووووووووووووووشsss1

الأخ قرقور
أحيك على هذا البوست الرائع
لك التحيه ولكل المتداخيلين


امدر يا ربوع سودانا أحيك وإنتي كل أمالنا

بكرى الامين
03-07-2006, 00:21
:

يافرد بعد تتعشوا تعالو قاشننا

انتظرونى فى المسطبة بتاعة بقالة النتيفة

لانو غاشى صاحبى رضا ودعمك حسن حامد ده وبجى

قرقور
03-07-2006, 06:09
والله رهيييييييييييييييب عديل كدا فعلا ماخليت حاجة انت وين ساكن

انا اهل والدتي من المنطقة دي

قريت بيت المال الابتدائية

والاهلية المتوسطة

انتو ناس منو هناك

قرقور
03-07-2006, 06:13
عباسيه,,,,,,,,,, إيا إيا:D
الدقا منو,,,,,, الدقا منو,,,يا ناس
دقوهو في عابدين دقاهو شمس الدين

البوووووووووووووووووشsss1

الأخ قرقور
أحيك على هذا البوست الرائع
لك التحيه ولكل المتداخيلين


امدر يا ربوع سودانا أحيك وإنتي كل أمالنا


العنقاء شكرا ليك وعلى تشريفك البوست

وعباسية مية المية

سنادة - وعابدين

بت مسيمس - الكوتش

فرن عابين - ميدان الربيع - حي الامراء
فريق العباسية ناس ودالحاجة وسلك
قدح الدم - مرفعين الفقرا
العباسية عمر الشاعر وزيدان والتجاني الحاج موسى والمرحوم محمد جعفر عثمان

اها بجيك تاني

قرقور
03-07-2006, 06:17
:

يافرد بعد تتعشوا تعالو قاشننا

انتظرونى فى المسطبة بتاعة بقالة النتيفة

لانو غاشى صاحبى رضا ودعمك حسن حامد ده وبجى

الحبيب تعال انتا اتعشى قعدتنا هنا ما بتتفات

جلسات امدرمان دايما حلوة

تسلم يا غالي ويلا ارح نلف سوا

قرقور
03-07-2006, 06:41
نسبة لتشريف الاخت العنقاء البوست

عشانها الليلة نلف في العباسية مرة تانية

اها منتظرنك يا عنقاء

mohamed merghani
03-07-2006, 14:06
ما زال اللف والتسكع مستمر

اليوم نخش على على ميادين الكورة في امدرمان ميادين الدافوري
طبعآ في حينا حي الركابية تكاد تنعدم الميادين الفسيحة ولكن هذا لا يمنع دق الدافوري في أكثر الزقاقات اتساعآ .. ولعل ميدان البيان الذي خلده محمد بشير عتيق في أغنية قضينا ليلة ساهرة تضمنت محاسن يعتبر من أشهر ميادين الدافوري .. وقد جار الزمان علي هذا الميدان وأصبح كوشة منصوب أمامها كشك لبسط الأمن الشامل ...
أما الشارع الواقع خلف مدرسة الركابية الإبتدائية ومسجد الأمين عبد الرحمن فهو المكان المفضل لعاشقي الدافوري وكورة الشراب ولا مجال للكفر ... وبالمناسبة كل الدافوري بكورة الشراب فقد حاولنا مرة ودفعنا شيرنق واشترينا كفر من مركز فيصل الرياضي وعند اللعب استهلكنا كل الوقت في الطلوع لرؤوس البيوت عشان نجيب الكفر الطائر وفي مرة طار الكفر واستقر في أحضان حاج المدني في وقت نومه فرماه لنا خلف الحيطة وقد شقاه شق البطيخة ..
أما ميدان صالح جبريل في حي القلعة فكان الدافوري فيه له جمهور يوازي جمهور دار الرياضة أو يقارب خاصة عندما تكون المباراه حلة ضد حلة ..
والميادين القريبة من مقابر احمد شرفي والبكري ومدرسة الست أسماء فوزي دي كنا بنسميها الخلا رغم قربها من منازلنا ... ولعلنا ورثنا تلك التسمية من آبائنا الذين كانوا يحكون لنا بأن حديقة حي العمدة كانت محرقآ للقمامة باعتبارها آخر الدنيا وتقع في أقصي حدود امدرمان الشمالية .. أما المقابر فدي الما كانوا متخيلين إنو في يوم من الأيام حيجي زول يسكن بعد المقابر .. لا ثورات ولا يحزنون .. ويحكي لنا أن عمتي عندما رحلت للثورة الحارة الرابعة ودعها أهل الحي بما يشبه المناحة والمندبة باعتبارها رحلت لمكان بعيد موحش ..

mohamed merghani
03-07-2006, 14:10
معليش ... اتكرر

قرقور
04-07-2006, 08:19
طبعآ في حينا حي الركابية تكاد تنعدم الميادين الفسيحة ولكن هذا لا يمنع دق الدافوري في أكثر الزقاقات اتساعآ .. ولعل ميدان البيان الذي خلده محمد بشير عتيق في أغنية قضينا ليلة ساهرة تضمنت محاسن يعتبر من أشهر ميادين الدافوري .. وقد جار الزمان علي هذا الميدان وأصبح كوشة منصوب أمامها كشك لبسط الأمن الشامل ...
أما الشارع الواقع خلف مدرسة الركابية الإبتدائية ومسجد الأمين عبد الرحمن فهو المكان المفضل لعاشقي الدافوري وكورة الشراب ولا مجال للكفر ... وبالمناسبة كل الدافوري بكورة الشراب فقد حاولنا مرة ودفعنا شيرنق واشترينا كفر من مركز فيصل الرياضي وعند اللعب استهلكنا كل الوقت في الطلوع لرؤوس البيوت عشان نجيب الكفر الطائر وفي مرة طار الكفر واستقر في أحضان حاج المدني في وقت نومه فرماه لنا خلف الحيطة وقد شقاه شق البطيخة ..
أما ميدان صالح جبريل في حي القلعة فكان الدافوري فيه له جمهور يوازي جمهور دار الرياضة أو يقارب خاصة عندما تكون المباراه حلة ضد حلة ..
والميادين القريبة من مقابر احمد شرفي والبكري ومدرسة الست أسماء فوزي دي كنا بنسميها الخلا رغم قربها من منازلنا ... ولعلنا ورثنا تلك التسمية من آبائنا الذين كانوا يحكون لنا بأن حديقة حي العمدة كانت محرقآ للقمامة باعتبارها آخر الدنيا وتقع في أقصي حدود امدرمان الشمالية .. أما المقابر فدي الما كانوا متخيلين إنو في يوم من الأيام حيجي زول يسكن بعد المقابر .. لا ثورات ولا يحزنون .. ويحكي لنا أن عمتي عندما رحلت للثورة الحارة الرابعة ودعها أهل الحي بما يشبه المناحة والمندبة باعتبارها رحلت لمكان بعيد موحش ..


محمد مرغني
فعلا الركابية الزقاق فيها ما بشيل نفرين خلي يكون فيها ميادين

لكن على ما اذكر في ميدان صغير في زريبة الكاشف

بس ناسي اسمو والله

طبقة الأزون
04-07-2006, 09:57
الحاره الرابعه .. المهديه .. ملتقى لجميع الحارات بالمهديه والثوره .. سوق الحارة الرابعة .. مستشفى البلك .. جامع البلك .. قهوه الجعلى .. مطعم الإخلاص .. مطعم درو .. ورحم الله عمنا درو فقد كان يكلف إبنه حسن درو للحساب .. يجى أخونا حسن يعزم شباب الحله كلهم .. والحساب يجمع .. نادى المهديه .. والعاب القوى .. رحم الله الجابرى .. أخونا منقسه .. الذى كان يحمل الموتر الخاص به عندما يتعطل حتى دكان أبكر .. للتصليح ويضحك كل من يشاهده فى الشارع .. أولاد فؤاد وحسن فؤاد وكلابه الاربعه الشهيره التى كانت تنام معه فى نهاية محطة بصات المهديه .. فى الكبرى الذى يفصل بين الحاره الرابعه والسابعه بشارع مستشفى البلك ..

بجيك راجع .. مع ذكريات الرابعه ..

قرقور
04-07-2006, 10:07
الحاره الرابعه .. المهديه .. ملتقى لجميع الحارات بالمهديه والثوره .. سوق الحارة الرابعة .. مستشفى البلك .. جامع البلك .. قهوه الجعلى .. مطعم الإخلاص .. مطعم درو .. ورحم الله عمنا درو فقد كان يكلف إبنه حسن درو للحساب .. يجى أخونا حسن يعزم شباب الحله كلهم .. والحساب يجمع .. نادى المهديه .. والعاب القوى .. رحم الله الجابرى .. أخونا منقسه .. الذى كان يحمل الموتر الخاص به عندما يتعطل حتى دكان أبكر .. للتصليح ويضحك كل من يشاهده فى الشارع .. أولاد فؤاد وحسن فؤاد وكلابه الاربعه الشهيره التى كانت تنام معه فى نهاية محطة بصات المهديه .. فى الكبرى الذى يفصل بين الحاره الرابعه والسابعه بشارع مستشفى البلك ..

بجيك راجع .. مع ذكريات الرابعه ..


العزيز اوزون

الرابعة فعلا قلب الحارات

الرابعة ماسورة علي
الرابعة صيدلية ابونجلة
كبري النص
سوق الرابعة وسينما الرابعة

سوق الرابعة الحدادين والنجارين

بجيك عندي فرد هناك في الرابعة

طبقة الأزون
04-07-2006, 10:19
قهوة الجعلى .. من من ناس المهديه ولا الثورات لايذكر قهوة الجعلى .. فجأه وبدون مقدمات أتى عمنا الجعلى من أحد القرى بالجزيره وقام بإستئجار إحد المنازل بالحاره الرابعه وبجاى وبجاى قام أجر الدكان الكبير والذى أصبح فيما بعد بقهوة الجعلى .. كان الجعلى لايقدم فى هذه القهوه سوى الشاى الحليب الصاموطى .. ولحدى الحظه ماقادر أعرف كلمه صاموطى دى معناها شنو .. وعلى البعد أرسل أحر التحايا والأشواق لأخونا صلاح صاموطى بالولايات المتحده الأمريكيه وتحديدا" واشنطون .. والايام دى متجدع مع أخونا متولى وقال داير يتفرج فى أمريكا بعد نهاية كاس العالم .. نرجع لعمنا الجعلى .. فى مدة وجيزه إنتشر إسم القهوه وأصبح الرواد يأتون اليها من مختلف مناطق أمدرمان وأصبحت منطقة تجمعات لكل شله وكل حله وكل منطقه بأمدرمان .. ولو مواعد واحد تواعده فى الجعلى ولو داير تعزم واحد تعزمه فى الجعلى وتوسعت تجارة الشاى عند عمنا الجعلى والذى فتح الله عليه بالمال الوفير فقام أولا بشراء البيت الذى كان يستأجره ومد رجله كمان شويه وإشترى ليهو كم بيت فى الرابعه والسابعه وأصبح من ذوى الاطيان والاملاك .. سافرت خارج السودان وكنت فى كل إجازتى أتفقد هذه القهوه الى أن وجدت فى أحدى الاجازات بأن القههوه قد تحولت لمحل إسبيرات .. وبالطبع سألت عن عمنا الجميع فلم يشفى غليلى أحد ولاأعلم حتى اللحظه عنه شيئأ" فبمثل ماأتى غاب وإختفى .. أدعو الله إن كان حيا" أن يمد فى عمره وإن كان قد توفى أن يتغمده الله وإيانا بواسع رحمته ..

بجيك راجع ..

طبقة الأزون
04-07-2006, 11:57
ليمون الأطرش .. ودا كمان كشك صغير فى محطه المواصلات ( ودى طبعا" تقع فى الكبرى الفاصل بين الحارة الرابعه والخامسه والسابعه والثامنه / الثوره بالنص ـ لمن لايعرفون الثورات ) خلف كشك الذكريات بتاع الجرايد .. كان يدير هذا الكشك العم .. محمد الاطرش .. وهو مش أطرش ميه فى الميه بس سمعه ضعيف .. من أبناء المنطقه الشماليه وأحلى مافى قلبه تجى ترطن معاهو دنقلاوى .. مستعد يخليك تشرب ذى ماعايز وفى الآخر تمشى وماتديهو أى حاجه وهو يكون مبسوط 24 قيراط .. ( دنقلاوى .. من إندنا ) تخصص عمنا محمد الأطرش فى الليمون والعرديب فقط ولاغير .. والله الكشك دا ملان على طول اليوم والليمون والعرديب .. باااااااااارد حاجه جميله بشكل مامعقول .. كان دائما" يطعم الليمون بالفانيليا وروح الموز .. وتسألو تقول ليهو سر الليمون الحلو دا شنو .. بقول ليك حلو لسانك إنته ..

السينما .. وحبيبنا سمير ود الحكيمباشى مصطفى محمد عبدالعزيز .. لف وتعال ..

عثمان إدريس
04-07-2006, 12:16
عمنا قرقور السلام عليكم ...
شوف يا عمنا الظاهر كدا والله أعلم عمنا طبقا يتشابهن عليهو البيبان :D قام جانا في حوشنا بيهناااك وختا لينا كيس ومرق :D لمن فتحنا الكيس لقيناهوا حقكم إنتو شوفوهو يا هو دا
مطاعم الحاره الرابعه .. حاجه تمام .. فبعد السينما الدور الأول إذا ماحاجز حقك بروح طوالى .. مطعم أركويت وهو مطعم عمنا درو رحمه الله ودا كان مطعم على مستوى كبد .. كلاوى .. قلوب .. لحمه .. دجاج وسلطات .. وحركات كده يعنى كان مطعم طبقه راقيه .. مطعم الاخلاص .. ومطعم جقلاب الذى يديره أبودقن .. فول .. ومرات سمك .. وحاجات غموز كده .. باميه .. عدس .. فاصوليا .. أما مطعم السر .. وحسن خروف ( باع ) فقد كان متخصصا" فى السمك .. المخبر جنب المطاعم .. الرغيف ساخن .. أكشاش العصير.. ليمون .. برتقال .. والشاى فى الجعلى ....

وياالله كلكم معزومين .. تمشوا وين ..؟؟

قلنا نجيبوا ليكم هنا عشان تشوفوا ليكم حل معاهو sss1 وتاني ما يجي دايح بالليل
لحد ما يضهب dd13 ولا شنو :c030:

طبقة الأزون
05-07-2006, 07:54
عمنا قرقور السلام عليكم ...
شوف يا عمنا الظاهر كدا والله أعلم عمنا طبقا يتشابهن عليهو البيبان :D قام جانا في حوشنا بيهناااك وختا لينا كيس ومرق :D لمن فتحنا الكيس لقيناهوا حقكم إنتو شوفوهو يا هو دا


قلنا نجيبوا ليكم هنا عشان تشوفوا ليكم حل معاهو sss1 وتاني ما يجي دايح بالليل
لحد ما يضهب dd13 ولا شنو :c030:


حبيبنا الاولانى .. فلان الفلانى .. عثيمان ود إدريس

من شدة حبى ليكم وقعادى الكتير معاكم .. أخدتنى نومه .. قمت مخلوع عشان أحصل المدام
(ندى السودان ) نسيت الكيس وفيك الخير والله وصلت الامانه ونجازيك انشاء الله فى الافراح ...

قرقور شيل الكيس دا وديهو لشيخنا عثمان وإعتذر ليهو نيابة عنا

الشكر كيمان والشوق بالاردب والشوالات

قرقور
05-07-2006, 08:19
اوزون الرائع

بسردك الرائع اديت البوست طعم

اها يلا نواصل اللف في امدرمان

طبقة الأزون
05-07-2006, 08:49
جدنا عبدالرسول وشجرة النيم

جدنا عبدالرسول علم من أعلام الحاره الرابعه .. وشباب الكوره ديل كلهم بعرفوه عرفه حق .. لانو مافى واحد من فريق الشعله ولا النجمه ولاالشباب حصل ليهو شـق ولا كسر فى رجله الا كان جدنا عبدالرسول المداوى والشافى بإذن الله ..

جدنا عبدالرسول من الشماليه وتحديدا" من منطقة المحس ( أكد ) أتى للخرطـــــــــوم بزوجته الحاجه زينب المرأه الطيبه الحنونه .. وإستقـــــر به المقام فى رابعتنا .. كان قويا" حتى آخر لحظات حياته مربوع القامه ولأنه رفض أن يعيش عاله على أبنه حســـين وإبنتيه آمنه ومريم
فقد أمتهن بيع القش .. وإتخذ من شجره النيم الواقعه فى ناصيه بيت محمد الشايقى مقرا" له
إضافة إلى أنه كان حارسا" لإبناء الحى فقد كان يزأر فى شفع الحله عندما يتســــــــابقون فى الشوارع ( ياولد أعمل حسابك من الشارع ...... العربات ) كنا نخاف من جدنا عبدالرسول ...
ونخاف أكتر وندعو الله أن لايرمينا اليه ورجلنا مكسوره .. فقد كان يعالج الجميع دون خجـل
وإستحياء تحت شجرة النيم ورجال كبار ماقاعدين يثبتو .. ونسوان مرات بطقو السكلى عديل كده .. ورغم هذا العنف العـــــــــــــلاجى فقد كان رجل نكته .. بشوشا" .. ودائما" فى مناقرات ومشاكسات مع أولاد أبا والحاجه حليمه .. بابكر وعباس .. أما أحلى اوقــــــــات الضحك فقد كان يقضيها مع ربيع الذى كان يعرف جدا" مداخـــــــــل النكته والكلمه الحلــوه لجدنا عبدالرسول .. ويشـــــــــــاء القدر أن يرمينى فى يد جدنا عبدالرسول .. فقد أصبت بشق فى رجلى اليمنى بعد دافورى حار فقادنى الوالد اليه .. وبدأ الاثنان رطانه محسيه مافهمت منها أى حاجـه غير إنو أبوى سلمنى لجدنا عبدالرسول وذهب الى منزله وأحضر جريدا" وسعفا" من نخله منزل جدنا عبدالرسول ... ( ود الذين آمنوا أخير وقعت فى يدى ) وكأنه كان على علم بخوفى منه .. وهاك ياجبيره .. وظللت تحت المتابعه والمراجعـه اليوميه إلى أن شفيت وأصبحت من أصدقاء جدنا عبدالرسول ومن الملازمين له ـ مساعد تمرجى ـ تحت شجرة النيم فى ( عنقريبو الصغير .. والبنبر ) الخاصة بالكشف والعلاج ونمت علاقــــة قوية بينى وبين إبنتيه آمنه ومريم فقد كانا يقومان بمراجعة الدروس وتحفيظ للقرآن لكافة من يدق بابهم وبدون مقابل أما أنا فقد كنت من الصفوة المقربه وخاصة فى جلسة الشاى باللبن والزلابية الخطيره حقت الحاجه زينب ..

رحم الله جدنا عبدالرسول وزوجته الحاجه زينب وإبنته آمنه والتى خطفها القدر وهى فى ريعان شبابها فبكاها الصغار قبل الكبار فقد كانت لهم أما" ومدرسة وقبل كل أختا" كبيرة لنا ..

طبقة الأزون
05-07-2006, 09:31
اوزون الرائع

بسردك الرائع اديت البوست طعم

اها يلا نواصل اللف في امدرمان

الحبيب قرقور

إنته بالبوست دا أثرت فينى مشاعر غريبه شديد .. والله ياقرقور أنا كنت بكتب قى بوست ( جدنا عبدالرسول وشجرة النيم وأنا ببكى .. خلينى أنطلق شويه فى الرابعه وخلى ود الخليفه
والعنقاء يواصلوا معاك وبجيك راجع لامدرمان بعد ما أخلص من الرابعه .. ففيها الكثير

mohamed merghani
05-07-2006, 11:28
الحبيب قرقور

إنته بالبوست دا أثرت فينى مشاعر غريبه شديد .. والله ياقرقور أنا كنت بكتب قى بوست ( جدنا عبدالرسول وشجرة النيم وأنا ببكى .. خلينى أنطلق شويه فى الرابعه وخلى ود الخليفه
والعنقاء يواصلوا معاك وبجيك راجع لامدرمان بعد ما أخلص من الرابعه .. ففيها الكثير
سلام يا ناس الرابعة ...
لي فيها ذكريات كثيرة إذ كنت أقضي جزء من الإجازة المدرسية هناك بيت عمتي وأبناء عمتي
كان ابن عمتي مرغني زكريا - رحمه الله - بجينا في الركابية بدراجته ويردفني معه إلي أن نصل الرابعة .... وهو كان يقطع التذاكر بسينما الرابعة فكان يسوقني معاه كل يوم للسينما مردوفآ في العجلة وبعد الفيلم غشوة لسوق الرابعة عشوة مدنكلة وباسطة ....
أحكي لنا طبقة ... عن ( شيخ الحارة ) مصطفي جلال وعمك الشفيع وكثير من الذكريات والطرائف ..

قرقور
06-07-2006, 08:51
العزيز اوزون

في انتظار سردك الرائع عن الرابعة

طبقة الأزون
06-07-2006, 11:25
سمير الحلبى .. وسينما المهديه ( الرابعه )

سمير مصطفى محمد عبدالعزيز أو كما يحلو لناس الرابعه بمناداته بسمير الحلبى .. كان والده ( رحمه الله ) مصطفى محمد عبدالعزيز حكيمباشى مستشفى البلك قبل التوسعه الاخيره .. وقبل أن تبدأ بشرح آلامك تجده قد كتب لك أولا ( حبوب السلفا ) وبعدها يسمع منك ماتريد .. كان الجميع وبدون حياء يقوم بعد صرف هذه الحبوب بقذف المظروف مغلقا" فى الطريق وتمتد الجرأه بأخرين بأن يقوموا بفتح المظروف والبدء فى قذف هذه الحبوب بمستشفى البلك وأمام الصيدليه .. لم ندرك ولم يدرك الجميع قيمة هذا العلاج إلا بعد أن تعلمنا وعرفنا القيمة الطبيه لحبوب السلفا . نرجع لسمير .. والسينما .. قام بإنشاء هذه السينما الوجيه عوض أبوزيد والد الرائد مامون عوض أبوزيد عضو مجلس قيادة ثورة 25 مايو .. ويبدو بأن العسكريه والسياسه قد لعبت دورا" فى تعيين سمير الحلبى مديرا" لهذه السينما .. فقد كان الأديب الشاعر والراحل المقيم سعادة الفريق ايراهيم أحمد عبدالكريم زوجا" لشقيقة سمير الحلبى الكبرى والذى كان سببا" فى تعيين سمير مديرا لهذه السينما .. أفتتحت سينما الثوره فى الربع الاخير من نهاية الستينيات حيث كان حفل الإفتتاح حدثا" أتذكره جيدا" .. كان العرض الأول لسينما المهديه الفيلم الهندى دارسنج والذى إمتد عرضه لثلاثة أيام تلاه الفيلم العربى ليلة الزفاف .. وكان من الصعب جدا" أن تجد فى تلك الأيام مقعدا" خاليا" خاصة فى اللوج والبلكونه والتى إمتلأت بالعائلات وأبنائها .. والتى وجدت المتنفس فى السينما ولكن يبدو أن سمير قد قطع النفس فبدأ الهبوط بمستوى السينما لتعرض الأفلام الهندية وأفلام الكابوى .. ونادرا" مايتم عرض أفلام راقيه سعيا" وراء الربح المادى . وأصبحت السينما مكان إلتقاء لنا ( للضحك والونسه ) خاصة العرض الثانى .. فكنا نحمل المخدات الخاصة بنا ونلبس لسينما الثوره اللبس الذى يليق بها .. الكراسى من حديد والمشاكل اليوميه تؤدى الى تفكك لحام هذه الكراسى مما كان يعرض ملابس الرواد للتمزق الشديد .. التجمعات معروفه داخل السينما فأبناء الرابعه غرب غرب السينما وأبناء الرابعه شرق شرق السينما .. وتبقى أغانى الفنان الجابرى والتى كانت تقدم فى الإستراحه هى الملازم الوحيد للافلام الهنديه وأفلام الكابوى .. فقد حفظها جميع مرتادى السينما كنا نستمع لجمعه إبن الجنوب والذى تربى بمنزل عمنا محمد صالح سليم وهو يغنى لنا هوج الرياح ( بعد أن يكون قد جمع منا من المال مايكفيه للعشاء والبيبسى) بلغة ركيكة مكسره تبكيك أكثر مما تضحكك .. بعد السينما .. العشاء والباسطه عند جقلاب ( ياميرغنى ياود الخليفه )

ندى السودان
06-07-2006, 15:50
لا لا لا لالا ... ما ممكن يا طبقة تكون زول قديم للدرجة دي .. أنا كده حاأغير رأئيي

طبقة الأزون
09-07-2006, 08:45
لا لا لا لالا ... ما ممكن يا طبقة تكون زول قديم للدرجة دي .. أنا كده حاأغير رأئيي


قيل ماتغيرى رأيك .. كدى شوفى ودالامين وودبامسيكا عاملين لينا شنو فى بوست ( شجرة النيم ) ..

وبعدين علماء النفس قالوا .. ذكريات الطفوله أبدا" لاتبارح ذاكرة الإنسان .. كمان معاها متابعه الشغل بيجيب شغل ذى الشغل دا .. وأنا

لسه نونو .. والله نونو .. حولى ناس بالعيد يغنو
ناس متابعينو يهنو ....

سلام للحلوين

طبقة الأزون
09-07-2006, 09:05
العزيز اوزون

الرابعة فعلا قلب الحارات
سوق الرابعة الحدادين والنجارين
بجيك عندي فرد هناك في الرابعة

سوق الرابعه .. الحدادين .. النجارين ..

يمتاز سوق الرابعه بأنه سوق جامع فى ذلك الوقت .. كل الحرفيين متواجدين فيه .. الحدادين .. ودا كان ماسك جهه كامله من السوق .. لاأذكر أسماء محدده فى هذا المجال ولكن يستحضرنى فتحى النجار وهو قريب لأسرة فؤاد الشهيره بالرابعه وهو من النجارين المشهورين بالسوق وكانت له علاقه قويه بأبكر ود محمد الحسن كوكو والذى كان يمتلك دكانا" بالسوق لايجار العجلات .. تطور ليصبح ميكانيكى مواتير .. علم الدين محمد الحسن الميكانيكى الشاطر .. ومن العجائب أن علم الدين كان شاذا" فى الدراسة الا أنه وبعد إمتحان الشهاده فاجأ الجميع برغبته فى العمل مع شقيقه الأكبر بالسوق كميكانيكى وبرغم المحاولات الكتيره التى قام بها الوالد ومجموعه من كبار رجال الحله بعد أن طلب والده ذلك الا أن الجميع لم يتمكن من إقناع نجم الدين بذلك .. ياسر أحمد باشرى .. ميكانيكى وأستاذ كبير فى هذا المجال .. كشك خلف الله بياع الجرايد .. ودا كان ملتقى لجميع الرياضين ..الادباء ..المثقفين ..
وناس السينما وأخونا عبدالرحمن نجدى قبل أن يرحل من المهديه .. والمريخاب خاصة لأنو خلف الله عمود من أعمدة المريخ تعصبا" وتشيجعا" والماما" بالمريخ قديمه وحديثه

وللحديث بقيه .......

قرقور
09-07-2006, 12:54
العزيز اوزوووون

سردك للثورة الحارة الرابعة فعلا جميل وشيق

وفعلا الحارة الرابعة من اجمل حارات الثورة
حارة اجتماعياتها قمة في الروعة

حارة فيها شباب حلووووين مترابطيين

لكن سوالي السر الخلى الثورة الحارة الرابعة وبقية حارات المهدية بالروعة دي

هل هو انهم سكان امدرمان القديمة بعد التوسع رحلو المهدية ونقلو معاهم الشي الجميل ده
مع العلم ان كل سكان الثورة المهدية اصلهم من امدرمان القديمة

fulla
09-07-2006, 15:02
إتخيل ياقرقور أجمل حاجه كانت فى السوق موقف الباصات والتاكسى .. أبورجيله .. والتاكسى الصفر الطالعه روحها .. الهنتر .. الموسكوفيتش .. الفولفو .. مش اللكزيس والباجيرو واللاندكروزر والعجيبه والغريبه إنو هذه الأنواع مازالت تعمل .. الفولفو .. تاكسى شندى .. والهنتر والموسكوفيتش متواجده بكثره فى مدنى وعطبره وعمك أحمد ( رحمة الله عليه ) ينظم فى صفوف التاكسى .. الثوره بالنص .. أبوروف .. الخرطوم .. وأى تاكسى طالع يناوله خمسه قروش ( وبالمناسبة ياجكس القرش دا عمله سودانيه ) مش القرش أخو قرقور

يحليل امدرمان بالرغم من انو الزول اتبهدل وتعب ايام الدراسة
الا انو في زكريات ما بتتنسي ..
ذكرتني التاكسي الاصفر .. الله يجازيهم قطعوا لينا هدومنا ..
من الحديد الطاير .. والله ايام ..

fulla
09-07-2006, 15:12
بوسته في قمة الروعة .. احيك قرقور والاخوة ..
انا برضو من امدرمان لكن ارجعوا كدى للثورات ورى
وتذكروا معاي .. مطعم سماسم .. الفول والبوش والبسيمة بالخشاف
ولا ابو الزهور .. الله ..
في البوسته في زقاق المكتبات .. قدام مكتبة الشروق في محل ليمون رااااااااااااائع
الله على ايام الجامعة .. بالغته معانا قلبته المواجع ..

قرقور
10-07-2006, 06:39
يحليل امدرمان بالرغم من انو الزول اتبهدل وتعب ايام الدراسة
الا انو في زكريات ما بتتنسي ..
ذكرتني التاكسي الاصفر .. الله يجازيهم قطعوا لينا هدومنا ..
من الحديد الطاير .. والله ايام ..

الاخت فلة
شكرا لمداخلتك الرائعة والمواصلة في اجترار ذكريات امدرمان

قرقور
10-07-2006, 06:50
بوسته في قمة الروعة .. احيك قرقور والاخوة ..
انا برضو من امدرمان لكن ارجعوا كدى للثورات ورى
وتذكروا معاي .. مطعم سماسم .. الفول والبوش والبسيمة بالخشاف
ولا ابو الزهور .. الله ..
في البوسته في زقاق المكتبات .. قدام مكتبة الشروق في محل ليمون رااااااااااااائع
الله على ايام الجامعة .. بالغته معانا قلبته المواجع ..
محل الليمون بتاع حسن قرشي

وكمان جنبو عادل الاطرش بتاع الباسطة

فلة لكن لقيتك مقددة محلات الباسطة والعصائر :p :p

طبقة الأزون
10-07-2006, 08:18
العزيز اوزوووون

سردك للثورة الحارة الرابعة فعلا جميل وشيق

وفعلا الحارة الرابعة من اجمل حارات الثورة
حارة اجتماعياتها قمة في الروعة

حارة فيها شباب حلووووين مترابطيين

لكن سوالي السر الخلى الثورة الحارة الرابعة وبقية حارات المهدية بالروعة دي

هل هو انهم سكان امدرمان القديمة بعد التوسع رحلو المهدية ونقلو معاهم الشي الجميل ده
مع العلم ان كل سكان الثورة المهدية اصلهم من امدرمان القديمة


طبعا" سكان الثورات هم فى الأصل سكان أمدرمان القديمه بطيبتهم بحلاوتهم وبترابطهم .. وكان للترابط الإجتماعى أكبر الاثر فى ذلك وكان كل مايجى جار جديد ( والكلام خاص بالثورات القديمه ) يبنى تلقى كل ناس الحله واقفين معاهو فى عمليه البناء .. أما مواسم الخريف فدى كان فيها قمة الترابط الإجتماعى خاصة إنو الثورات كانت عباره عن حفر فالمطر لمن ينزل كان ناس الثوره بتعبوا شديد فى غرف المويه من البيوت وكل بيوت الجيران فى الثورات بيوت أكتر من أهل يعنى تساهر فى أى مكان تجى راجع مع الشله الشله كلها تلقاها نايمه فى بيت واحد من أفراد الشــله ودا زاد من التماسك والترابط الأسرى شديد وكان نتيجه للوضع دا المصاهرات الأسريه التى تمت فى هذه الحارات.

طبقة الأزون
10-07-2006, 08:26
يحليل امدرمان بالرغم من انو الزول اتبهدل وتعب ايام الدراسة
الا انو في زكريات ما بتتنسي ..
ذكرتني التاكسي الاصفر .. الله يجازيهم قطعوا لينا هدومنا ..
من الحديد الطاير .. والله ايام ..

فلافيل .. صباحك ورد وبنفسج

عليك الله مستعده تدفعى كم .. وتلبسى ليك توب آخر موضه ( digital ) sss1 وتركبى تاكسى موديل 1960 .. :confused: الدخان جايك من قدام :( وخاتو ليهو جالون بتاع بلاستيك :mad: موصل فيهو خرطوش البترول للماكينه .. :D والتاكسى ملان .. فى حر وكتاحه السودان دا .... ؟؟؟؟:trrr1: :trrr1:

طبقة الأزون
10-07-2006, 08:40
أسماء .. ومشاهير .. فى الرابعه

إيه رأيكم فى الأسماء دى .. أولاد فؤاد .. عادل أمين .. أولاد إمام .. ود السرف .. ود الجنه .. ودالباشا .. عبود .. خضره .. عيال وراق .. أبكر .. أمين الحلبى .. سليمان غندور .. مأمون ودالشهيد .. جلال الطيب .. أسامه قرشى .. ود ياسين .. صلاح السخيل .. مجدى عثمان (سنتر ) .. بابكر الدنقلاوى ( القصير ) .. حسن الشايقى .. مصدق الصادق .. عوض جلوط .. هاشم عطا المنان ...... وبقية البقيه ؟؟؟؟؟؟

قرقور
10-07-2006, 11:37
اوزون

عادل امين معروف

وسليمان غندور بعرفو

ياريت تكلمنا عن ناس الطرائف في الرابعة

fulla
11-07-2006, 02:36
محل الليمون بتاع حسن قرشي

وكمان جنبو عادل الاطرش بتاع الباسطة

فلة لكن لقيتك مقددة محلات الباسطة والعصائر :p :p


قرقور .. لكن مالقيتك خطير طبعا اختك تخصص زقاق المكتبات
مافي مكتبة ما بعرفه هناك بحكم قراية المعمار .. الشروق والوطنية والوطنية الام
والغروب ايام ..انته عارف اول الزقاق في راجل بيجي باليل بيبيع لقيمات ولبن انا الصورة دي لسه في مخيلتي ..
عليك الله شفته عصير حسن القرشي والكوز الكبير مع التلجة والله ايام
ولا محلات الاطرش انته عارف انا كنته باخد كورس في البناية الجنبة شباك المعهد فاتح في
المصنع الساعة 3 ظهر بكونوا مطلعين الباسطة من الافران وبكبوا فيها السمنة والسكر
انا من ما اشم الريحة ما بفهم حاجة طواااااااااالي بنزل اشتري باسطة
قاموا في الجامعة سموني باسطة .. لكن حقيقة ادفع عمري واكل من باسطته تاني
الناس تقول باسطة ابو جبة والطيب سيد مكي .. لكن حقيقة ما بتجي جمبه ..
على فكرة اي محل سفسفة في امدرمان بعرفة .. يحليل ايام الجامعة ...

fulla
11-07-2006, 02:42
فلافيل .. صباحك ورد وبنفسج

عليك الله مستعده تدفعى كم .. وتلبسى ليك توب آخر موضه ( digital ) sss1 وتركبى تاكسى موديل 1960 .. :confused: الدخان جايك من قدام :( وخاتو ليهو جالون بتاع بلاستيك :mad: موصل فيهو خرطوش البترول للماكينه .. :D والتاكسى ملان .. فى حر وكتاحه السودان دا .... ؟؟؟؟:trrr1: :trrr1:

والله ذكرتني منظر جعان شديد ..
دقيقة نسيت الداردمة من الحاجات قدام الجامعة اساسي في الكراسي ..
ومنظر الكمسري الخاتي المية في اضانه ..
بس بي سوء الحال ده كله والله ايام جميلة ..

قرقور
11-07-2006, 07:58
قرقور .. لكن مالقيتك خطير طبعا اختك تخصص زقاق المكتبات
مافي مكتبة ما بعرفه هناك بحكم قراية المعمار .. الشروق والوطنية والوطنية الام
والغروب ايام ..انته عارف اول الزقاق في راجل بيجي باليل بيبيع لقيمات ولبن انا الصورة دي لسه في مخيلتي ..
عليك الله شفته عصير حسن القرشي والكوز الكبير مع التلجة والله ايام
ولا محلات الاطرش انته عارف انا كنته باخد كورس في البناية الجنبة شباك المعهد فاتح في
المصنع الساعة 3 ظهر بكونوا مطلعين الباسطة من الافران وبكبوا فيها السمنة والسكر
انا من ما اشم الريحة ما بفهم حاجة طواااااااااالي بنزل اشتري باسطة
قاموا في الجامعة سموني باسطة .. لكن حقيقة ادفع عمري واكل من باسطته تاني
الناس تقول باسطة ابو جبة والطيب سيد مكي .. لكن حقيقة ما بتجي جمبه ..
على فكرة اي محل سفسفة في امدرمان بعرفة .. يحليل ايام الجامعة ...


الاخت فلة لقيتك جد تخصص عضة وماكولات

طيب جنب السينما بتلقي عربية التبش بالشطة تاكلي لما تعرقي
وايام بيبيعو قصب السكر
حليل امدر وحليل ناسها
طالما جات سيرة الاكل في امدرمان حا اديك مثال لمطاعم

في الموردة في السكي بتاع السمك اشهر محل سمك في السودان
في العباسية في الكوتش تخصص فول وكبدة وصير والتحلية فاخر (كاستر بالزبادي بالجلي )
في ودنوباوي في عمنا الله يرحمو الجان احسن محل فول
في الواحة برضو في الهجرة
مطعم الرياضيين ورا البوستة
اها بجيك تاني لباقي المطاعم

طبقة الأزون
11-07-2006, 08:12
بنت أمدرمان .. فله باسطه سفسفه

صباحك باسطه .. وداردمه كركدى .. وليمون حسن قرشى .. وفول أحمد سعد .. طبعا" الكلام دا بعجبك شديد خاصة أمور السفسفه .. لكن بالشايفو أنا دا .. مفترض أسع إنتى تكونى ( أذا كنت قصيره ) برميليه الشكل .. من السفسفه العمليتها أيام زمان إضافة الى سفسفة الخليج وترطيب المكيفات .. والراحات اللى ماليها حد ....

شكرا" ليك على المداخلات الجميله دى .. وطبعا" دى أيام جميله نتمنى ربنا يعيدها ونحنا كلنا فى بلدنا الحبيب السودان ..




الأخ قرقور .. تحياتى اليك .. عادل أمين معروف ومعاهو .. مامون ودالشهيد .. وعبودى .. وديل لاعبين كوره مشهورين واحد فى المريخ وواحد فى الهلال والثالث فى ودنوباوى .. أما سلمون .. سليمان غندور فأكيد معرفتك بيهو معرفة سفر لأنو كان شغال فى وكاله السر للسفريات ..

تحياتى ليك ..

طبقة الأزون
11-07-2006, 08:31
sss1 اوزون

ياريت تكلمنا عن ناس الطرائف في الرابعة



من الشخصيات الحلوه بالرابعه أخونا يوسف عبدالقادر .. ويوسف من بلد التسعه وتسعين فكى .. إستقره بالرابعه أثناء دراسته الثانويه بمدرسة محمد حسين العليا وهو صديق ولصيق لأخونا حسن الشايقى الضابط الإدارى حاليا" بمجلس شعبى أمدرمان .... وهو رجل نكته ويحب التعليقات فى كل كبيره وصغيره ...

إعتدنا أن نجتمع يوميا" للغداء فى منزل عمنا الطيب ( رحمه الله ) وعيال الطيب ديل نحن مسمينهم فى الحله بعيال العاتى .. ماشاء الله ربنا يحفظهم السفسفه دى حقتهم .. وكل واحد فينا بيجب صينية الغداء وماشاء الله مابين سته الى ثمانيه صوانى .. بتقرض قرض السواد والرماد .. مره تأخرت المجموعه كلها فى الخرطوم بسبب المواصلات وكان فى يوسف وثلاثه من أولاد العاتى لما تأخرنا أصر أربعتهم على عدم الإنتظار وطلبوا من والدتهم فاطمه مرة الطيب ( الله يرحمها ) الغداء وكان الغداء جاهز بس بقى السلطه .. خالتى فاطمه جابت الغداء ويبدو إنو يوسف طلع الشارع عشان يتأكد من وصولنا فقابله أحد الاخوان فى الشارع وطق ليك معاهو الحنك .. عيال العاتى بغادى نسفوا الغداء فى نفس الوقت دخل بوسف وخالتى فاطمه شايله صحن السلطه يوسف عاين للصينيه .. فاضيه .. مافيها قرمة كسره .. التفت لخالتى فاطمه وقال ليها .. وكمان دايره تفتحى نفسهم بالسلطه والله عيالك ديل يأكلوا السلطه يأكلوك وراها طوالى ....sss1 sss1

قرقور
11-07-2006, 09:49
شخصيات وظرفاء امدرمان

دايرين نقعد نبحت في شخصيات ظرفاء امدرمان

ناس من امدرمان اشتهرو بالظرافة وخفة الدم والنكته

اول زول نبدا بيهو عمنا الهادي الضلالي

اسمو الحقيقي الهادي نصر الدين

من سكان ودنوباوي جنب بيت النميري
مشهور على نطاق امدرمان

قالو يوم مشى الملازمين لقي اولاد الملازمين بيلعبو كورة وخاتين الشباشب بتاعتهم السمحة جنب القون قام عمنا شال الشباشب ومشى الشفع جرو وراهو قالو ليهو الشباشب بتاعتنا يا عمو ... قال ليهم بوديها لاولاد الاشلاق اقول ليهم دي باسطة

طبعا الغرض هنا النكتة وليس التقليل من الاشلاق ( حليل الاشلاق كسروهو)

mohamed merghani
11-07-2006, 12:01
سلام يا طبقة الأوزون يا رائع ...
أحب الرابعة وأهل الرابعة خاصة بعد ما بقي لي فيها نسب ..
وبمناسبة ود الشهيد دي معانا هنا في امريكا عبده ود الشهيد ورغم إنو ليو زماااان مهاجر إلا ان أحاديث الرابعة وسيرتها دايمآ مصاحباه ...
تحياتي لك وعبرك للجميع

fulla
11-07-2006, 19:08
الاخت فلة لقيتك جد تخصص عضة وماكولات

طيب جنب السينما بتلقي عربية التبش بالشطة تاكلي لما تعرقي
وايام بيبيعو قصب السكر
حليل امدر وحليل ناسها
طالما جات سيرة الاكل في امدرمان حا اديك مثال لمطاعم

في الموردة في السكي بتاع السمك اشهر محل سمك في السودان
في العباسية في الكوتش تخصص فول وكبدة وصير والتحلية فاخر (كاستر بالزبادي بالجلي )
في ودنوباوي في عمنا الله يرحمو الجان احسن محل فول
في الواحة برضو في الهجرة
مطعم الرياضيين ورا البوستة
اها بجيك تاني لباقي المطاعم

قرقور بالغته معاي .. مطعم الرياضيين .. دى تسمم طواااااااااالي
والحته مجلبقه ومشغلين ود الامين ..
وفول الاربعين احلى من فول الهجرة .. جربته
بعدين ناس سندباد و فليفر .. فريش .. الشوادي ديل التحلية
لكن تعرف يا قرقور انته مفروض يختوك مكان المدفع في صنية البلدية
دى انسب مكان ليك .. لقيتك في امدرمان موسوعة

fulla
11-07-2006, 19:15
بنت أمدرمان .. فله باسطه سفسفه

صباحك باسطه .. وداردمه كركدى .. وليمون حسن قرشى .. وفول أحمد سعد .. طبعا" الكلام دا بعجبك شديد خاصة أمور السفسفه .. لكن بالشايفو أنا دا .. مفترض أسع إنتى تكونى ( أذا كنت قصيره ) برميليه الشكل .. من السفسفه العمليتها أيام زمان إضافة الى سفسفة الخليج وترطيب المكيفات .. والراحات اللى ماليها حد ....

شكرا" ليك على المداخلات الجميله دى .. وطبعا" دى أيام جميله نتمنى ربنا يعيدها ونحنا كلنا فى بلدنا الحبيب السودان ..



ههههههههههه sss1 sss1 .. حرام عليك يا طبقة ..
القضية وما فيها الجامعة بتاخد كل الوقت بالتالي الاكل
ما في طريقة الا يبقى من برة :c030: .. لكن بحب الباسطة هو في زول ما بحبها .. :D

fulla
11-07-2006, 19:46
سلام يا طبقة الأوزون يا رائع ...
أحب الرابعة وأهل الرابعة خاصة بعد ما بقي لي فيها نسب ..
وبمناسبة ود الشهيد دي معانا هنا في امريكا عبده ود الشهيد ورغم إنو ليو زماااان مهاجر إلا ان أحاديث الرابعة وسيرتها دايمآ مصاحباه ...
تحياتي لك وعبرك للجميع


الاخ ميرغني الخليفة ..
http://www.w6w.net/album/35/w6w_w6w_20050426134722e2eb6eaf.gif

قرقور
12-07-2006, 06:36
قرقور بالغته معاي .. مطعم الرياضيين .. دى تسمم طواااااااااالي
والحته مجلبقه ومشغلين ود الامين ..
وفول الاربعين احلى من فول الهجرة .. جربته
بعدين ناس سندباد و فليفر .. فريش .. الشوادي ديل التحلية
لكن تعرف يا قرقور انته مفروض يختوك مكان المدفع في صنية البلدية
دى انسب مكان ليك .. لقيتك في امدرمان موسوعة

الرائعة فله
ياريت يختوني في صينية البلدية

عشان اسلم على الجاي من الموردة والطالع من السوق والجاي من شارع العرضة
ما حتة موسوعة لكن البوست عبارة عن اجترار لذكريات حلوة ومناقشة وتبادل معلومات عن امدرمان وبتمنى نتكلم عن ثقافة امدرمان وخضارة امدرمان والتركيبة السكانية ومعالم امدرمان
وياريت تواصلي معانا حتى نستفيد من معلوماتك في امدرمان هسي نحنا ماسكين في اوزون وميرغني خليفة لانم شكلهم حاضرين زمن المليم

زقاق صغيروني
لقيتك حنكوشة قولي بسم الله واكلي من مطعم الرياضيين
فلفر بيتزا ده في زمنا كان مافي ارقى شي كان في زمنا باسطة من شريف

طبقة الأزون
12-07-2006, 09:09
سلام يا طبقة الأوزون يا رائع ...
أحب الرابعة وأهل الرابعة خاصة بعد ما بقي لي فيها نسب ..
وبمناسبة ود الشهيد دي معانا هنا في امريكا عبده ود الشهيد ورغم إنو ليو زماااان مهاجر إلا ان أحاديث الرابعة وسيرتها دايمآ مصاحباه ...
تحياتي لك وعبرك للجميع

نسيبنا ود الخليفه .. الشوق براميل وجرادل حديد لمن مدفقه منها المويه .. ولاأسكت الله لك حسا " .. ومناسبنا من وين فى الرابعه .. ؟؟ أبوى كان رئيس المجلس البلدى بتاع الرابعه .. حاج ياسين .. ويبدو لى إنك فى تكساس لانو كل أولاد حله ودالشهيد فى تكساس .. بالله سلم عليهو شديد ولو إنو هو مابعرفنى معرفة أخوه مأمون
وبالله أسأله عن فريق النجمه وأسامه وعبود وعمنا أمين الحلبى والدكاكين الأربعه والحديقة الجديده وشلة الويست .. أهم شىء أسأله عن عبدالرزاق الحلبى .. وقصة شجرة الليمون الشهيره .. ودى أنا منتظر منك بوست خاص بيها .. عيال مكى النور عنقره فارس الثورة المهديه .. مصطفى الأمين وصاحبه زاهر والأهم من دا كلو كشك الخضار الجنب الجمعيه والدكان الناصيه ..سيدو منو ...

راجى ردك .. وإنشاء الله مانكمل الصبر كلو .. سلام ..

mohamed merghani
12-07-2006, 11:12
سلام كتير يا ريحة الحبايب ... يا طبقة ...
ود الشهيد دا كان زمان في تكساس لكنه الان في نورث كارولينا ... ولمن ألاقيه حأسأله من كل شي وهو زول حبوب ووناس وفنان وجميل ...
بتعرف عابدين زكريا وأخوانه عوض والفاتح وهاشم وعمر ?ديل ما اخواني ونسايبي وجيرانهم أصحابي وأحبابي .... ااااه حليلك يا رابعة

mohamed merghani
12-07-2006, 11:17
الاخ ميرغني الخليفة ..
http://www.w6w.net/album/35/w6w_w6w_20050426134722e2eb6eaf.gif
فلة الرائعة ... قدر القول والله .... تسلمي

mohamed merghani
12-07-2006, 11:49
ههههههههههه sss1 sss1 .. حرام عليك يا طبقة ..
القضية وما فيها الجامعة بتاخد كل الوقت بالتالي الاكل
ما في طريقة الا يبقى من برة :c030: .. لكن بحب الباسطة هو في زول ما بحبها .. :D
تعرفي يا فلة الباسطة دي كنت بحبها حب .. أكتر من عيوني ديل .... وزماااان لما كنت في الأهلية المتوسطة كان عمك محمد آدم بتاع البوفيه ببيع لينا الباسطة بالقطعة في الفسحة الصغيرة وكنا لما قروشنا ما بتتم لفطور وباسطة بندك الفطور عدييل كدة ... والله باسطة محمد آدم دي أصلها ما كانت سمحة ولكن كانت الإثارة المصاحبة أكلها كانت عجيبة ... تشتري القطعة بي جاي وكان ما كمدناها بسرعة في الخشم شووفي الختف والسك سك البيحصل ... نحل عجيب ...
ولو كنا مريشين شوية بنتلم 3 , 4 كدة ونعمل شيرنق في نص كيلو بسبوسة من شريف ولكن الباسطة من سلا قطعة الزلط بس ...ويا سلاااااام علي باسطة سلا لما طلعت جديدة ما بتخلص
وكنا شباب الحلة أهم شي عندنا بعد السينما الوطنية الدور التاني طبعآ بعد ما ناس الضواحي ديل يفرتقوا أهم شي الباسطة والجاتوه من مرسي ميامي وللا المحل داك الفي أول شارع كرري جنب استديو الوادي وبتاع التلج والله الزول دا كان عندو جاتوه تتفرج فيهو وهو مرصوص في البترينات تفتكر إنو للعرض فقط ...
ودايمآ محلات الباسطة دي لما تفتح جديدة بكون شغلها نضيف وأذكر هنا حلويات لوزان وحلويات قنجاري في شارع الوادي جوار مسجد الأمين عبدالرحمن ومدرسة الركابية الإبتدائية
ديل كانوا حاجة رهيبة خلاص ...حصل جربتيهم يا فلة في عصرهم الذهبي ?

fulla
13-07-2006, 01:13
تعرفي يا فلة الباسطة دي كنت بحبها حب .. أكتر من عيوني ديل .... وزماااان لما كنت في الأهلية المتوسطة كان عمك محمد آدم بتاع البوفيه ببيع لينا الباسطة بالقطعة في الفسحة الصغيرة وكنا لما قروشنا ما بتتم لفطور وباسطة بندك الفطور عدييل كدة ... والله باسطة محمد آدم دي أصلها ما كانت سمحة ولكن كانت الإثارة المصاحبة أكلها كانت عجيبة ... تشتري القطعة بي جاي وكان ما كمدناها بسرعة في الخشم شووفي الختف والسك سك البيحصل ... نحل عجيب ...
ولو كنا مريشين شوية بنتلم 3 , 4 كدة ونعمل شيرنق في نص كيلو بسبوسة من شريف ولكن الباسطة من سلا قطعة الزلط بس ...ويا سلاااااام علي باسطة سلا لما طلعت جديدة ما بتخلص
وكنا شباب الحلة أهم شي عندنا بعد السينما الوطنية الدور التاني طبعآ بعد ما ناس الضواحي ديل يفرتقوا أهم شي الباسطة والجاتوه من مرسي ميامي وللا المحل داك الفي أول شارع كرري جنب استديو الوادي وبتاع التلج والله الزول دا كان عندو جاتوه تتفرج فيهو وهو مرصوص في البترينات تفتكر إنو للعرض فقط ...
ودايمآ محلات الباسطة دي لما تفتح جديدة بكون شغلها نضيف وأذكر هنا حلويات لوزان وحلويات قنجاري في شارع الوادي جوار مسجد الأمين عبدالرحمن ومدرسة الركابية الإبتدائية
ديل كانوا حاجة رهيبة خلاص ...حصل جربتيهم يا فلة في عصرهم الذهبي ?

والله يا ميرغني للاسف هسه جمب المسجد في سوبرماركت و محل فواكي
لكن ماسسا كده .. لانو اغلى محل في شارع الوادي .. ومحلات سلا هسه قافلين
بس الفاتح ابو جبة وعلى قولتك .. اول ما يفتحوا بكونوا رهيبين لكن بعد كده الله لا يوريك ..
سينما الوطنية لسه نفس اللون والشكل .. ما تغيرت ..
الله على امدر ..

fulla
13-07-2006, 07:57
حي العرب ..

يعتبر من اقدم الاحياء في منطقة امدرمان .. فهواشتهر بالفنون بمختلف انواعها..
فحتوى على الشعراء والادباء والفنانين وحتى لاعبي الكرة ..
من اشهر الشعراء : عبدالرحمن الريح ,سيدعبدالعزيز
سيف الدين الدسوقي, العبادي ...
ومن الفنانين : ابراهيم عوض , احمد الجابري ,ميرغني المامون و حسن جمعة ,
التاج مصطفى , زنقار ( رحمهم الله ) ...
ومن الاعبين : حسن عطية .
من الدكاكين المشهورة : محل لندن عزة, دكان محمدحسين اليماني , دكان انسي ,
دكان النمير ...
ومن بعض الاسر المعروفة : حمد احمد الحاج , محمد علي الناظر , حوش حسن جمعة , حوش عكاري , حسب الرسول عبدالعزيز , قرشي مصطفى , بلاى الخياط , حوش سليمان محمد سليمان , حوش ناس ملا , عمر عبد السلام , القاضي , محمد صالح الشنقيطي
ابراهيم افندي ...

طبقة الأزون
13-07-2006, 08:05
بتعرف عابدين زكريا وأخوانه عوض والفاتح وهاشم وعمر ?ديل ما اخواني ونسايبي وجيرانهم أصحابي وأحبابي .... ااااه حليلك يا رابعة

نسيبنا ود الخليفة .. فردتى من زمن المليم والتعريفه والقرش والشلن والريال والطراده والخمسين والجنيه .. حليلو الجنيه لمن كان الجنيه الواحد بيساوى 25ر3 دولار أمريكى ..
هييييييييييييه يازمن ..

سلام كتير ليك من الرابعه .. ريحة الحبايب .. من مربع بيت ناس ود أيوب .. وإنته متجه لمحطة المواسير .. الناصيه الثانيه .. البيت الزاويه .. البفتح شمال شرق .. ريحة الحبايب الجد جد .. أهلك ونسابتك .. وبالمناسبة دى وين هاشم زكريا .. دا كان صديقنا شديد والله
بالله لمن تتصل سلم عليهو شديد ..

أسع فله باسطه تجى داخله وتقول ليك .. والله أنا بعرف هناك بيت ناس الزرافه .. ولا بيت
ناس كامل متخير ..

غيب .. وتعال .. قرقور .. الحكايه شنو ؟؟ زعلان من ونسة ولاد الرابعه دى ولاشنو ؟؟

fulla
13-07-2006, 08:22
نسيبنا ود الخليفة .. فردتى من زمن المليم والتعريفه والقرش والشلن والريال والطراده والخمسين والجنيه .. حليلو الجنيه لمن كان الجنيه الواحد بيساوى 25ر3 دولار أمريكى ..
هييييييييييييه يازمن ..

سلام كتير ليك من الرابعه .. ريحة الحبايب .. من مربع بيت ناس ود أيوب .. وإنته متجه لمحطة المواسير .. الناصيه الثانيه .. البيت الزاويه .. البفتح شمال شرق .. ريحة الحبايب الجد جد .. أهلك ونسابتك .. وبالمناسبة دى وين هاشم زكريا .. دا كان صديقنا شديد والله
بالله لمن تتصل سلم عليهو شديد ..

أسع فله باسطه تجى داخله وتقول ليك .. والله أنا بعرف هناك بيت ناس الزرافه .. ولا بيت
ناس كامل متخير ..

غيب .. وتعال .. قرقور .. الحكايه شنو ؟؟ زعلان من ونسة ولاد الرابعه دى ولاشنو ؟؟

صباح الباسطة ..
انته عارف انا اجتهته لغاية مالميت المعلومات دي
من الوالد ..
شنو يا طبقة .. حي العرب ما عجباك ..
ولا نحنا واقعين من قفة امدرمان ..
يا زول هواااااااااااااااااي كله ولا حي العرب .. دي حتتنا ..

طبقة الأزون
13-07-2006, 10:11
نسيبنا ود الخليفه

غنى لينا بالله أغنية ..

ديل بيتهم الناصيه .. وشباكهم الأخضر
غداره .. غداره .. سحـــــــرتنا بجمالها

وهاك العسل دا

طبقة الأزون
13-07-2006, 10:22
صباح الباسطة ..
انته عارف انا اجتهته لغاية مالميت المعلومات دي
من الوالد ..
شنو يا طبقة .. حي العرب ما عجباك ..
ولا نحنا واقعين من قفة امدرمان ..
يا زول هواااااااااااااااااي كله ولا حي العرب .. دي حتتنا ..


فله باسطه

إتخيلى أنا قربت الثانوى فى محمد حسين العليا .. يعنى ثلاثه سنين عذاب فى حى العرب
ماتقولى من المواصلات لانو الكدارى شغال طلب .. بس كنا بنستمتع ببصات الشنقيطى نركب من محطة المدرسه ونمشى العرضه ونرجع بنفس البص .. وشوفى سماحة بنات المدارس فى المكان داك وخاصة فى موقف الباصات فى العرضه .. الشهاده والعمل الصالح ..

حى العرب .. المظاهر .. ولى فى المسالمه غزال .. كدى وزيعهم لينا ووقعيهم لينا بالحدود الجغرافيه .. أكيد الشعراء الكبار ديل ماكتبوا كلام الجن دا من فاضى .. ورينا قصص البنات
وخاصة القاعدين يكشحو المويه ويشوفهم واحد ذى سيد عبدالعزيز يتكهرب ويكتب الكلام السمح بتاع الحقيبه داك..

راجيك .. فى حى العرب

fulla
13-07-2006, 10:36
فله باسطه

إتخيلى أنا قربت الثانوى فى محمد حسين العليا .. يعنى ثلاثه سنين عذاب فى حى العرب
ماتقولى من المواصلات لانو الكدارى شغال طلب .. بس كنا بنستمتع ببصات الشنقيطى نركب من محطة المدرسه ونمشى العرضه ونرجع بنفس البص .. وشوفى سماحة بنات المدارس فى المكان داك وخاصة فى موقف الباصات فى العرضه .. الشهاده والعمل الصالح ..

حى العرب .. المظاهر .. ولى فى المسالمه غزال .. كدى وزيعهم لينا ووقعيهم لينا بالحدود الجغرافيه .. أكيد الشعراء الكبار ديل ماكتبوا كلام الجن دا من فاضى .. ورينا قصص البنات
وخاصة القاعدين يكشحو المويه ويشوفهم واحد ذى سيد عبدالعزيز يتكهرب ويكتب الكلام السمح بتاع الحقيبه داك..

راجيك .. فى حى العرب


اسمع يا طبقة .. انته الناظر بتاعكم
كان .. التجاني ابو القاسم ..

mohamed merghani
13-07-2006, 10:43
والله يا ميرغني للاسف هسه جمب المسجد في سوبرماركت و محل فواكي
لكن ماسسا كده .. لانو اغلى محل في شارع الوادي .. ومحلات سلا هسه قافلين
بس الفاتح ابو جبة وعلى قولتك .. اول ما يفتحوا بكونوا رهيبين لكن بعد كده الله لا يوريك ..
سينما الوطنية لسه نفس اللون والشكل .. ما تغيرت ..
الله على امدر ..
حليل شارع الوادي من مستشفي امدرمان ولحد أحمد شرفي والشهداء وصيصة للمناسبات وعبد الله بك خليل وجامع النحاس وحوش الكسرة وعمك السليني بتاع المرطبات وبيت ابراهيم أحمد عمر وبدور القلعة وجوهرا والشيخ عوض عمر الإمام وزاوية الأحمدية عمك شيخ مرسي وناس كردمان ومدرسة الركابية ومسجد الأمين وخور الشيخ قريب الله أبا صالح وبيوت ناس عثمان صالح وحشمت النقادي بتاع الفول وإسماعيل مجذوب أشهر طهار علي نطاق العاصمة وأزياره البااااردة التي كان رحمه الله حريصآ علي نظافتها وملئها بنفسه وصينية الدومة وخيرات حي الدومة والسوق الجديد وصيدلية البشري والقسم الشمالي والمركز الصحي واستاد ود نوباوي وأالمغالق وأبوجبة ومسجد الشيخ الفاتح ...وكلية التربية ... كل نقطة هناك لي فيها ذكريات لا تنسي رغم دورة السنوات وتعاقب الفصول

mohamed merghani
13-07-2006, 10:46
اسمع يا طبقة .. انته الناظر بتاعكم
كان .. التجاني ابو القاسم ..
وللا الريح أبوالزين الله يرحمو ?

mohamed merghani
13-07-2006, 10:50
نسيبنا ود الخليفة .. فردتى من زمن المليم والتعريفه والقرش والشلن والريال والطراده والخمسين والجنيه .. حليلو الجنيه لمن كان الجنيه الواحد بيساوى 25ر3 دولار أمريكى ..
هييييييييييييه يازمن ..

يا طبقة هووووي ... إنت قايلني دفعة محجوب الخليفة وللا شنو ??? sss1

طبقة الأزون
13-07-2006, 10:52
وللا الريح أبوالزين الله يرحمو ?


ولا دا ولا دا .. حى العرب سوكارتا ..
ونجت برسـوم .. :trrr1:

fulla
13-07-2006, 10:55
طبقة .. طبعا زي ماعارف انا بسعى شديد .. عشان اوفر ليكم المعلومات
ومع انو المعلومة دي ما بتوفي طلبك الا اني اوعدك اني اوفرة ليك ..
عن الشاعر خالد ابو الروص :
دي من حكاوي حبوبة الله يرحمه..
كان بيتسيب من المدرسة طوالي فكل ما يشوفه الشيخ حمد وهو كان مفتش تعليم امدرمان
فلم يلاقيه كان دايما بيزجرة .. فالبرغم من ده لمن نقلواالشيخ حمد لمدرية التعليم العالي
كتب فيه قصيدة :
مالي اليه شايف امدر كئيبة حزينه
والهم انتشر في قلوبنا صار غازينا
منقول شيخ حمد وين يا صبر عزينا

والبقية .. في الطريق
عذرا على بطء الخدمة ..

طبقة الأزون
13-07-2006, 10:59
يا طبقة هووووي ... إنت قايلني دفعة محجوب الخليفة وللا شنو ??? sss1


خلى روحك رياضيه .. عرس وعرست وكمان من الرابعه .. أغتراب وإغتربته .. والحمد الله
باقى عليك الحج وحسن الخاتمه بعد عمر طويل إنشاء الله .. دفعة ود الخليفه ولادفعة حسـن دفع الله حاتأثر فى شنو ؟؟؟ وبعدين ماشاء الله عينى بارده .. الصوره أبلغ وصف .. عامل قميصك السمح دا

mohamed merghani
13-07-2006, 11:14
خلى روحك رياضيه .. عرس وعرست وكمان من الرابعه .. أغتراب وإغتربته .. والحمد الله
باقى عليك الحج وحسن الخاتمه بعد عمر طويل إنشاء الله .. دفعة ود الخليفه ولادفعة حسـن دفع الله حاتأثر فى شنو ؟؟؟ وبعدين ماشاء الله عينى بارده .. الصوره أبلغ وصف .. عامل قميصك السمح دا
روحي دايمآ رياضية وزي ما قلت ما بتفرق بعد دا عرس وعرسنا يا قول ابتسام زوجة عوض حسن ... ودي جارتنا هنا في مرة كدة اتقاودن هي ومرتي مشن الكوفير وما قدرن يقولن بالإنجليزي هن دايرات يسرحن وللا يقصن شعرن استايل لمت فيهن الكوفيرة معط حسب ما فهمت .. فقامت السيدة ابتسام تتحسس بقايا شعرها المزعوط وتقول مافي مشكلة ... عرس وعرست ...
وأنا كمان ما عندي مشكلة إن شاء الله بعد دا أبقي دفعة عمك الشفيع زاتو ...

fulla
13-07-2006, 11:16
خلى روحك رياضيه .. عرس وعرست وكمان من الرابعه .. أغتراب وإغتربته .. والحمد الله
باقى عليك الحج وحسن الخاتمه بعد عمر طويل إنشاء الله .. دفعة ود الخليفه ولادفعة حسـن دفع الله حاتأثر فى شنو ؟؟؟ وبعدين ماشاء الله عينى بارده .. الصوره أبلغ وصف .. عامل قميصك السمح دا

طبقة بالغته مع الراجل خااااااااااااااااالص
الشباب شباب الروح .. ولا شنو يا مرغيني الخليفة .. :c030:

mohamed merghani
13-07-2006, 11:26
طبقة بالغته مع الراجل خااااااااااااااااالص
الشباب شباب الروح .. ولا شنو يا مرغيني الخليفة .. :c030:
لا كمان يا فلة ما وصلنا الدرجة دي ... :trrr1:

mohamed merghani
13-07-2006, 11:29
هيييي يا ناسنا أدوني تلاتة نجمات وللا عيوني كعبات ???

قرقور
13-07-2006, 11:36
نسيبنا ود الخليفة .. فردتى من زمن المليم والتعريفه والقرش والشلن والريال والطراده والخمسين والجنيه .. حليلو الجنيه لمن كان الجنيه الواحد بيساوى 25ر3 دولار أمريكى ..
هييييييييييييه يازمن ..

سلام كتير ليك من الرابعه .. ريحة الحبايب .. من مربع بيت ناس ود أيوب .. وإنته متجه لمحطة المواسير .. الناصيه الثانيه .. البيت الزاويه .. البفتح شمال شرق .. ريحة الحبايب الجد جد .. أهلك ونسابتك .. وبالمناسبة دى وين هاشم زكريا .. دا كان صديقنا شديد والله
بالله لمن تتصل سلم عليهو شديد ..

أسع فله باسطه تجى داخله وتقول ليك .. والله أنا بعرف هناك بيت ناس الزرافه .. ولا بيت
ناس كامل متخير ..

غيب .. وتعال .. قرقور .. الحكايه شنو ؟؟ زعلان من ونسة ولاد الرابعه دى ولاشنو ؟؟


الاخ اوزون جد مستمتع بونسة اولاد الرابعة ومتابع معاكم وجايكم بالرد

بس الصبر اليبل الابري

طبقة الأزون
13-07-2006, 11:40
روحي دايمآ رياضية وزي ما قلت ما بتفرق بعد دا عرس وعرسنا يا قول ابتسام زوجة عوض حسن ... ودي جارتنا هنا في مرة كدة اتقاودن هي ومرتي مشن الكوفير وما قدرن يقولن بالإنجليزي هن دايرات يسرحن وللا يقصن شعرن استايل لمت فيهن الكوفيرة معط حسب ما فهمت .. فقامت السيدة ابتسام تتحسس بقايا شعرها المزعوط وتقول مافي مشكلة ... عرس وعرست ...
وأنا كمان ما عندي مشكلة إن شاء الله بعد دا أبقي دفعة عمك الشفيع زاتو ...


والله ياود الخليفه نسوان ديل فاضحيننا عديل كدا فى أمريكا .. مره عروس جديده لنج جايبنها ليك من الشماليه ترانزيت الخرطوم يوم واحد بس .. وصلت أمريكا الصباح وزوجها شغال .. قالت تديها بوخه .. البت عروس ومادايره تفشل وصايا الخالات والعمات .. عليك بالدخان .. فهو قاتل لنظر الرجل لإمراه أمريكية أخرى .. كالبف باف .. قاتل الصراصير .. وفتشت لقت علبة نيدو .. وولعت الدخان .. وقبل ماتقعد .. تسمع .. صوت منبه ضعيف .. ماإهتمت وجهزت نفسها للدخان .. وصوت المنبه يزيد .. دقت الطناش والصوت يعلو .. ويعلو مع علو الدخان .. لحظات مافى تسمع حركه غريبه وعينك ماتشوف الا النور .. جماعة المطافىء للطابق الثالث بالشباك جو نابلين ليك .. إتخمخمى وإتلملى وهاك يافرد جريه للغرفه .. بعد شويه جاء الزوج وهو يضحك .. حارس العماره عارف الزوج فى العمل وماعارف إنو زوجته وصلت لبلد العجايب .. أفتكر الشقه حرقت . منها حلفت الزوجه يمين وكمان فوقه طلاق مافى دخان ولا دلكه .. الا فى المناسبات وباشراف وحراسة الزوج العريس .. اها دى حاله دى

قرقور
13-07-2006, 11:41
حي العرب ..

يعتبر من اقدم الاحياء في منطقة امدرمان .. فهواشتهر بالفنون بمختلف انواعها..
فحتوى على الشعراء والادباء والفنانين وحتى لاعبي الكرة ..
من اشهر الشعراء : عبدالرحمن الريح ,سيدعبدالعزيز
سيف الدين الدسوقي, العبادي ...
ومن الفنانين : ابراهيم عوض , احمد الجابري ,ميرغني المامون و حسن جمعة ,
التاج مصطفى , زنقار ( رحمهم الله ) ...
ومن الاعبين : حسن عطية .
من الدكاكين المشهورة : محل لندن عزة, دكان محمدحسين اليماني , دكان انسي ,
دكان النمير ...
ومن بعض الاسر المعروفة : حمد احمد الحاج , محمد علي الناظر , حوش حسن جمعة , حوش عكاري , حسب الرسول عبدالعزيز , قرشي مصطفى , بلاى الخياط , حوش سليمان محمد سليمان , حوش ناس ملا , عمر عبد السلام , القاضي , محمد صالح الشنقيطي
ابراهيم افندي ...




فلة الرائعة

حي العرب زريبة العيش
حي العرب اول صيدلية بيطرة في امدرمان
حي العرب صحبى حسام فاروق ذكريات قضيتها معه في حي العرب طبعا كما زكرتي حي العرب ابراهيم عوض وعبدالرحمن الريح وسيف الدين الدسوقي
بجيك برواقة لي زكريات حلوة هناك

قرقور
13-07-2006, 11:45
طبقة لما تجي للعباسية بجيك لاني عارف عندك ناس هناك

هناك بجدع فيك ههههههههههههههههههههههه

طبقة الأزون
13-07-2006, 11:51
نسيبنا ود الخليفه

الليله معزوم شاى عند زوجة صاحبنا عوض حسن .. وأهم شىء فى الشاى التورته أبو ثلاثه نجمات .. لم لى أولاد الرابعه من ناس تكساس وبالله طق الحنك عشان نقدر نخليهم ليك أربعه وعقبال تطفى الشمعه الميه .. وماتنسانا من الصور

mohamed merghani
13-07-2006, 12:11
حي العرب صحبى حسام فاروق
تحياتي عبرك لحسام فاروق صديق صديقي صفوت حامد

mohamed merghani
13-07-2006, 12:14
نسيبنا ود الخليفه

الليله معزوم شاى عند زوجة صاحبنا عوض حسن .. وأهم شىء فى الشاى التورته أبو ثلاثه نجمات .. لم لى أولاد الرابعه من ناس تكساس وبالله طق الحنك عشان نقدر نخليهم ليك أربعه وعقبال تطفى الشمعه الميه .. وماتنسانا من الصور
إن شاء الله دايمآ ملمومين في الأفراح ...

قرقور
13-07-2006, 12:18
تحياتي عبرك لحسام فاروق صديق صديقي صفوت حامد


عزيزى ود الخليفة

حسام صديق دراسة في الثانوي المؤتمر الثانوية وصفوت برضو زول صديق عزيز

زقاق

حليل ايام باسطة عمك محمد ادم في الاهلية المتوسطة يادفعة
ما قلتا ليك قريت عمر ولا نور ولا سوار ولا منعم

fulla
13-07-2006, 12:19
فلة الرائعة

حي العرب زريبة العيش
حي العرب اول صيدلية بيطرة في امدرمان
حي العرب صحبى حسام فاروق ذكريات قضيتها معه في حي العرب طبعا كما زكرتي حي العرب ابراهيم عوض وعبدالرحمن الريح وسيف الدين الدسوقي
بجيك برواقة لي زكريات حلوة هناك


صباح الفل قرقور ..
انته حسام فاروق .. ده ود فاروق بشرى ..

قرقور
13-07-2006, 12:36
صباح الفل قرقور ..
انته حسام فاروق .. ده ود فاروق بشرى ..


فلة لا والله اسمو حسام فاروق عبد الفتاح

طبقة الأزون
13-07-2006, 12:37
الاهلية المتوسطة



قرقور .. إنته هنا دخلت فى وجعه شديده بالحيل .. أمدرمان الأهليه المتوسطه للبنين .. وبيت الزعيم الراحل إسماعيل الأزهرى .. والملازمين وماأدراك ماالملازمين ..

دى مقالات جديده فى البوسات دا .. فى الاسبوع القادم

إجازه سعيده ..

قرقور
13-07-2006, 12:46
قرقور .. إنته هنا دخلت فى وجعه شديده بالحيل .. أمدرمان الأهليه المتوسطه للبنين .. وبيت الزعيم الراحل إسماعيل الأزهرى .. والملازمين وماأدراك ماالملازمين ..

دى مقالات جديده فى البوسات دا .. فى الاسبوع القادم

إجازه سعيده ..


الاخ اوزون

الاهلية المتوسطة انا دفعة ودالخليفة اتخرجتا منها سنة 86

وناس حبوبتى جنب المدرسة الاهلية
اها مستنيك

mohamed merghani
13-07-2006, 22:38
الاخ اوزون

الاهلية المتوسطة انا دفعة ودالخليفة اتخرجتا منها سنة 86

وناس حبوبتى جنب المدرسة الاهلية
اها مستنيك
يا حليل زمن الأهلية المتوسطة وأنا يا قرقور كنت في منعم حاجة كدة بين حناكيش سوار وشفاتة عمر ولخبتة نور ...
أكتر شي بهرني لما دخلت تلك المدرسة كان عم خليفة وهو يتحدث الإنجليزي أو يعرف بعض العبارات يصر دائمآ علي ترديدها أمامنا ... فنستغرب نحن من عمك بتاع الشاي وهو يمد صدره ويقول إمممباسيبول .... ونقول بيننا ان عم خليفة زول قديم في المدرسة ولو رخي أضانو كل يوم بالشباك حق الفصل في حصة الإنجليزي كان حيكون مستر بلاك إنقليش مان ...
كان عم خليفة حريصآ علي كبابيه بتاعت الشاي فلا تخرج واحدة منهن إلا بوضع أمنية وغالبآ ما تكون الشارة الخاصة بشعار المدرسة آو مفتاح الطوق حق العجلة ... فنشرب الشاي جالسين علي السور مقاصدين بيت ازهري نشاغل دريج ونقول ليهو حركة يا دريج ...أو نؤكد للطاهر إنه لا أحد زعلان منه ..

قرقور
16-07-2006, 08:06
الموردة


حي الموردة هو مدخل مدينة امدرمان من الناحية الجنوبية لمدينة امدرمان من ناحية كبري النيل الأبيض القديم

وتمتد شمالا حتى صينية المجلس البلدي وتمتد شمالا في موازاة النيل حتى بوابة عبد القيوم تحيط بها بعض الأحياء

من ناحية الشمال الغربي حي العباسية ويفصل بينها وبين حي بانت شرق خور ابوعنجة وأيضا خور ابوعنجة يفصل بينها وبين حي الضباط .

اسم الموردة نابع من كونها ميناء امدرمان النهري حيث كانت البضائع ترد لمدينة امدرمان عن طريق ميناء الموردة النهري .

اشتهرت الموردة غيرها من أحياء امدرمان بالتميز في كافة المجلات أنجبت الموردة المبدعين في كافة المجالات ( السياسة – الرياضة – الفن – الشعر والأدب وغيرها من مجالات الإبداع ) .

ومن خلال البوست ده حاخدكم في جولة سريعة في حي الموردة نتجول في شوارعها وزقاقاتها نتعرف على أوجهه الجمال والإبداع فيها

قرقور
16-07-2006, 08:08
الموردة قسمت في داخلها إلي أحياء صغيرة

الموردة حي المواليد – الموردة السوق (الموردة غرب ) – فريق ريد (الموردة شرق ) والهشماب ( الموردة شمال )

حي المواليد يقع حي المواليد جنوب حي الموردة بعد ما تقطع كبري ابوريش وهو كبري صغير يقع بين حديقة الجندول ومدرسة المؤتمر من أشهر المعالم في حي المواليد شوايات الموردة مطاعم السمك الفاتحة في حديقة الموردة من أشهر المطاعم في امدرمان تقدم وجبات السمك والصير
ميدان حسن حسين يقع خلف تلك المطاعم ميدان صغير يلعب فيه صغار الموردة صباحا وشباب الموردة عصرا

سكن بهذه المنطقة أناس يسمون بالمواليد لأنهم جاءوا من خارج السودان وتوالودو وانصهر مع تركيبة المجتمع السوداني

من أشهر الأسر في هذه المنطقة أسرة الحاج زكي رحمة الله إمام مسجد حسن حسين سابقا وأبناءه عمر وخليل وسليمان طه وبابكر بيتهم يفتح في مسجد حسن حسين والدهم رحمه الله من أوائل خريجي الأزهر الشريف

يسكن في هذا الحي أسرة المغفور له خلف الله بابكر وهو من العمراب وهو من السياسيين الذين اثروا الحركة السياسية في السودان

كذلك يسكن في هذا الحي أسرة المرحوم محمد احمد ومن أبناءة عثمان محمد احمد (عثمان كنب ) والد الصاوي والصادق – ومن أبناءة فتح الله – عبدا لرحيم وحسن محمدا حمد – سليمان محمد احمد وحامد محمد احمد والد لاعب الموردة السابق حسن حامد .

ومن أشهر سكان هذه المنطقة حبوبتنا الروضة الداية ولد على يدها معظم أبناء حي الموردة ولازال بيتها علما من معالم حي المواليد وهي تنتمي للعمراب أيضا ومن أحفادها المعز – ومدثر والرشيد احمد فضل الله من أقدم فنيي الإذاعة السودانية

أبناء هوم من أقدم الميكانيكية في المنطقة وأبناءه عبد الرحيم وإبراهيم هوم

يوجد أيضا الإداري المحنك في مجال الرياضة السيد كمال الفيل سوف نتعرض لأسرة الفيل لاحقا لأنها أسرة كبيرة ويسكن بجواره البروفيسور حسن خطاب الدكتور البيطري المشهور.

يسكن أيضا في هذه المنطقة عصفور السودان المغرد إبراهيم عبدا لجليل وأخيه التوم عبد الجليل سوف نتعرض لهم لما نتعرض لأهل الفن في الموردة وأخيم حقي

يسكن أيضا لاعب الموردة السابق عصام عباس ذلك اللاعب الفنان الذي صال وجال في وسط الموردة

توجد أيضا عائلة مصطفى العمرابي وعائلة إبراهيم العوض وعائلة حاج حسن وعائلة الكرنكي وهي من العائلات الكبيرة في الموردة

طبقة الأزون
16-07-2006, 08:32
قرقور

أثبت لينا فعلا" إنك قرقور من قراقير .. وراحة ضمير المورده ..

واصل .. مدرسة المؤتمر الثانويه العليا .. حديقة المورده .. الطابيه .. نادى الفنانين

نادى المورده ......

مستنين الجميل والرائع من .. السمك فى المورده ..

قرقور
16-07-2006, 08:41
قرقور

أثبت لينا فعلا" إنك قرقور من قراقير .. وراحة ضمير المورده ..

واصل .. مدرسة المؤتمر الثانويه العليا .. حديقة المورده .. الطابيه .. نادى الفنانين

نادى المورده ......

مستنين الجميل والرائع من .. السمك فى المورده ..




الاخ الرائع اوزوووون دي بداية عكس بعض ملامح الموردة كجزئية من ملامح امدرمان

وبيكم وبي محاورتكم نعكس ابداعات وثقافةاهل امدرمان

طبقة الأزون
16-07-2006, 08:54
يادا .. يادا .. الكوره فى الرابعه كدا ..

أجمل مافى الرابعة الكورة .. الدافورى .. فتجد الشباب سابقا" وحاليا فى المربعات الفاضيه داقين الدافورى .. حتى فى الاجازه ولدى الصغير مؤيد والذى لم يتعدى السبع سنوات من العصر محزم ومجزم للدافورى مع أولاد الحله ..

توجد بالحاره الرابعه ثلاثة فرق كبيره .. فريق النجمه .. وهو يحتل الجزء الشمالى الشرقى من الحارة الرابعه ( حله ود الشهيد ياودالخليفه .. ريحة الحبايب ) وفريق الشعله .. والذى يحتل الجزء الشمالى الغربى ( حلتنا ) وفريق الشباب .. الذى يشارك فريق الشعله أيضا" فى الجزء الشمالى الشرقى ..

من أصعب وأخطر المباريات التى كان يشهدها ليق المهديه هى مباراة فريق الشعله وفريق الشباب والتى غالبا" ماتنتهى بمشاجرات سببها التعصب الشديد والحساسيه المفرطه فى اللعب بين أبناء الحى الواحد وتمتد هذه المشاحنات والمشاجرات حتى بعد إنتهاء المباراه وتستمر لمدة يومين أو ثلاثة أيام ولولا عقلاء الفريقين لاصبحت حربا" أشبه بحرب البسوس .

من أشهر لاعبين هذه الفرق .. عادل أمين والذى بدأ حياته الكرويه بفريق النجمه وكذلك عبود .. محمد ود أيوب .. إبراهيم الطيب .. حسن الشايقى .. ودياسين .. بدرالدين خضر ( جنقله ) .. سلمون ( سليمان غندور ) وراق .. الطاهر النعيم .. خضره .. مجدى عثمان ( سنتر ) .. عماد تلجه .. وغيرهم

همس الشوق
16-07-2006, 10:02
قرقور ازيك وازي المورده اللذيذه والله والواحد مشتاق لى ليالي المورده الجميلة والله نفسي بس في سمك المورده العجيب داك بس اموت وافطر بيهو معاهو صحن سلطة خضره وصحن شطة بي ليمون حار كده . رايك شنو

همس الشوق
16-07-2006, 10:09
قرقور احيك علي التذكرة بحي المورده العريق والله دائما كل ما يجي اسم المورده انا بتزكر حاجة واحده بس سرويس سمك حار من المورده ومعاهو صحن سلطة وصحن شطة بي ليمون حار كده والرغيف يكون من الطابونه راس اتخيلوا معاي الفطره دي حتكون كيف ....

همس الشوق
16-07-2006, 10:24
يا سلام يا شباب والله والواحد كأنه في امدرمان اتذكر كله ركن فيها يا حليل امدرمان القديمة بس هسه اتغيرت فيها ملامح كثيره وحتى الناس للاسف كلهم ما ناس امدرمان الاصليين يعني اختلفت كل الوجوه القديمة المعروفة زمان كان الواحد من يطلع من اي حي في امدرمان لحدي ما يصل السوق انت في سلام .هسه تفتش ليك على زول تعرفه ما تلقاهو كل الناس هجرت امدرمان (حليل ام در حليل ناسها )

قرقور
16-07-2006, 10:54
قرقور ازيك وازي المورده اللذيذه والله والواحد مشتاق لى ليالي المورده الجميلة والله نفسي بس في سمك المورده العجيب داك بس اموت وافطر بيهو معاهو صحن سلطة خضره وصحن شطة بي ليمون حار كده . رايك شنو


همس الشوق شكرا كتير لطلتك الحلوة

طبعا صحن سمك بالشطة والبصل في الموردة شي ابداااااااع

قرقور
16-07-2006, 10:56
الموردة وسط وهي منطقة سوق الموردة يوجد بها أهم معلم من معالم الموردة وهو سوق الموردة العتيق وسق الموردة سوق يحمل ارث وتاريخ حي الموردة يوجد به الجزارين والخضرجية والحلاقين والفراشات ( باعة الخردوات والمحاصيل ) الترزية والمطاعم

الجزارين في سوق الموردة اشتهر العمراب بأنهم جزارين سوق الموردة من أشهرهم عمنا المرحوم كمال محمد احمد بائع الكمونية والكرشة ومسك بعده ابنه خالد الكد وإخوانه يلقبون بكمونية أخوه الكبير الحاج كمونية ومعاوية
عمنا السر يوسف اخو المدرب صلاح ليبيا وعمنا الله يديه الصحة والعافية عبدا لوهاب سلمان والد أسطورة الملاعب ودكتور الكورة السودانية كمال عبدا لوهاب

وعمنا مبارك ام مارقيط وهو اصلا من سكان الفتيحاب لكن ناسب عمنا حامد محمد احمد . ومن الجزارين عمنا احمد الحاج وهو شيخ الجزارين

نجي خلف الجزارين نجد الخضرجية عمنا كباشي الله يرحموا وعمنا حاج حسن الله يرحموا وعمنا أنور الفكي ومن

الحلاقين عمنا كابو يعتبر من أشهر الحلاقين في سوق الموردة ودكانه نادي يجمع كل سكان الموردة تطلع من دكانه القفشات الحلوة والنكات الرائعة

الترزية من أشهر الترزية عبد القادر توتو الترزي الافرنجي المشهور وهو مشهور في سوق الموردة بقفشاته واشتهر عمنا توتو بتجهيز القبور يعنى اول ما تحصل وفاة بيرسلو اتنين واحد الإذاعة عشان يذيعو الخبر والتاني لعمك توتو عشان يجهز القبر
ومن اشهر الترزية جدنا المرحوم اسطى بشير الترزي البلدي المشهور كم خيطنا عندو الجلاليب والعراريق

عثمان الترزي ترزي نسائي امهاتنا واخواتنا خيطو عندو وهو من اشهر الترزية في سوق الموردة
نجي لي نص السوق نجد عمنا السكى بتاع السمك وهو من اشهر مشاهير سوق الموردة امتاز بالسمك بالخلطة السرية الناس بيجو ليهو من كل انحاء امدرمان يعنى العايز يفطر فطور مدنكل يوم الجمعة يشيل سمك من سكي في الموردة

قرقور
17-07-2006, 06:19
العجلاتية
من اشهر العجلاتية في سوق الموردة عبدالعظيم العجلاتي ومحمد نور العجلاتي زمان ونحنا صغار بنأجر العجلات منهم .

المطاعم
مطعم الحاج – مطعم الوسيلة – سيف بطة – وغيرها من المطاعم التى تقدم الفول والكبدة والجقاجق والكباب

عمنا عبدالرحمن قرشي بتاع الليمون شقيق حسن قرشي بتاع الليمون في سوق امدرمان يقع محلو في ناصية مسجد سوق الموردة

ده سوق الموردة باختصار شديد بجيكم راجع تاني للسوق ....

من الأسر التي تسكن بالقرب من سوق الموردة أسرة ناس باعبود هم أصلا حضارمة جو السودان زمان واستقروا في الموردة وتمازجوا مع التركيبة السكانية لحي الموردة وصاروا من الأسر الكبيرة في الموردة

أسرة الفيل
هم اصلا من العمراب ومن أشهر الأسر في الموردة ولهم شارع كبير باسمهم في الموردة اسمو شارع الفيل منهم السيد الفيل محافظ بنك السودان السابق من أبناءه هشام ود. أسامة الفيل وحسين الفيل
وأيضا كمال سليمان الفيل الإداري المحنك لنادي الموردة اشتهر بالحنكة والذكاء في إدارة نادي الموردة العملاق ومن أبناءة صديقي هيثم الفيل .

وعمنا المرحوم حامد الفيل حامد حريقه لانو كان عميد في شرطة المطافي

أيضا نجد الصحفي المحنك عوض ابشر ذلك الصحفي الرياضي الذي له دور وباع طويل في مجال الصحافة الرياضية وكمان أخوه كمال ابشر وهم من الأسر الكبيرة في حي الموردة.

من سكان الموردة ناس أبو صالح أسرة سليمان ابوصالح يعتبر من أقدم المساعدين الطبيين في السودان من أبناءه حسين سليمان ابوصالح استشاري المخ والأعصاب ووزير الصحة والخارجية السابق وعبد المحمود ابوصالح رئيس نادي الموردة السابق وهم أيضا من العمراب

وفي يسكن بجوار ناس ابوصالح ناس عقارب الأستاذ والمربي الفاضل عوض عقارب وهي أسرة كبيرة وهم أيضا من العمراب ويسكن أيضا في الموردة أسرة المغربي وهي الأسرة التي أتى منها الشاعر المبدع المرحوم مبارك المغربي شاعر الحب والجمال ومن الأسرة المذيعة المرحومة ليلى المغربي والمرحومة سهام المغربي . سوف نتعرض لهذه الأسرة بتوسع اكبر لما نجي للشعراء في الموردة

ومن الأسر ايضا أسرة بنده اصاحاب طرمبة بندة الشهيرة في شارع الموردة بالقرب من دار الرياضة امدرمان ومن أشهرهم الدكتور عبدالرحمن بنده والد الدكتور اشرف والدكتور محمد بندة وكمال بنده وعصام بنده واحمد بنده والدهم المرحوم عمر بنده .

طبقة الأزون
17-07-2006, 11:56
يديك العافيه ياقرقور .. ماخليت للمورده حاجه .. بإنتظار الروائع من ( بيت الكلاوى )

التحيه لك على هذا الإبداع التراثي

طبقة الأزون
17-07-2006, 12:02
يا سلام يا شباب والله والواحد كأنه في امدرمان اتذكر كله ركن فيها يا حليل امدرمان القديمة بس هسه اتغيرت فيها ملامح كثيره وحتى الناس للاسف كلهم ما ناس امدرمان الاصليين يعني اختلفت كل الوجوه القديمة المعروفة زمان كان الواحد من يطلع من اي حي في امدرمان لحدي ما يصل السوق انت في سلام .هسه تفتش ليك على زول تعرفه ما تلقاهو كل الناس هجرت امدرمان (حليل ام در حليل ناسها )


همس الشوق ..

مرحب بيك فى هذا البوست الرائع بطلتك .. السمك عرفانه فى السوكي .. وطلعتى روحنا بوصفك للفطور .. والنفس إتفتحت للأكل .. يااااااااااااااالله .. الله يعين .. دايرين نعرف منك .. المورده .. وذكريات المورده .. باالله ذى وصف الفطور .. وكان ختيتى معاهو بيبسى ..حانطق السكلى عديل ..

ابقى داخل ....

قرقور
17-07-2006, 12:30
يديك العافيه ياقرقور .. ماخليت للمورده حاجه .. بإنتظار الروائع من ( بيت الكلاوى )

التحيه لك على هذا الإبداع التراثي

تسلم اخوي اوزون وفي انتظار ذكرياتك في الموردة

والمن بيت الكلاوي جايك في الطريق

همس الشوق
17-07-2006, 12:33
اعزائي مررتم على كل احياء امدرمان الا حي الجميل والعريق هذا لماذا ....؟
المسالمة مدينة جميلة جدا وفيها تعايش ديني فريد في نوعه فالحياة بين الاقباط والمسلمين حياة جميله وهادئة فيها كمية من التواصل ما طبيعي وبتذكر كنا بننتظر يوم الاحد ده بفارغ الصبر علشان عندهم رغيف (لي زمان من كلمة رغيف ) بيخبزوه في البيت وبقسمه للجيران زغيف لذيذ جنس لذه ... بجد كانو ناس رائعين جدا ... يا سلام عليك يا المسالمة ..

قرقور
17-07-2006, 12:38
اعزائي مررتم على كل احياء امدرمان الا حي الجميل والعريق هذا لماذا ....؟
المسالمة مدينة جميلة جدا وفيها تعايش ديني فريد في نوعه فالحياة بين الاقباط والمسلمين حياة جميله وهادئة فيها كمية من التواصل ما طبيعي وبتذكر كنا بننتظر يوم الاحد ده بفارغ الصبر علشان عندهم رغيف (لي زمان من كلمة رغيف ) بيخبزوه في البيت وبقسمه للجيران زغيف لذيذ جنس لذه ... بجد كانو ناس رائعين جدا ... يا سلام عليك يا المسالمة ..


لي في المسالمة غزال جاهل بغني عليو جاهل وقلب قاسي ....

العزيز همس الشوق المسالمة من اجمل احياء امدرمان ونحن في انتظار راس الخيط منك حتى نلف ونتسكع معك ولي اصدقاء كمية في المسالمة بجيك ليهم

امسك عندك محمد مصطفى الامين عبدالرحمن بجيك ليهو برواقة

همس الشوق
18-07-2006, 07:47
يلا يا قرقور تعال نتسكع سوى انا لي زمان من التسكع في المسالمة بجد واحشاني موت طبعا من اول السوق زمان كان في العدني والمخبر دي لحدى كا تجي لي بيت ناس صاحبك ومن اشهر الاسر في التبيداب والكتياب وديل من الاسر القديمة استوديو بابو الهندي واهم شخصية في ذلك الشارع هو زوابع صاحب محل تصليح التلفزيونات ده كان شخصية جميله جدا كل الناس كانت بحبه وعندنا شخصيات اجتماعية لذيذه منهم وداعه وداعه ده كان رجل صاحب نكته واشهر نكاته بيقولوا انه هو رجل بتاع حفلات وسهر وسكر ودائماً في خلاف مع اخوه لانه اخوه رجل دين ومصلاحية وسبحه فمن الطرائف انه جاء وداعه يوم متأخر شديد وسكران لط فضرب الباب فاخوه ساله منو؟ قال ليهو وداعه .. قال جائي الساعة اربعة صباحا وسكران كمان امشي بيت محل كنته ... مسكها ليهو وبعد فتره اخوه بيمشي يأذن الصبح في الجامع وبعد الصلاة جاء لقى الباب مقفول فضرب الباب .. ساله وداعة منو .. قال ليهو فلان قال ليهو امشي بيت محل ما كنته ...............وحنواصل

طبقة الأزون
18-07-2006, 07:59
همس الشوق .. صباح معسل..

المسالمه .. النقاده .. الفرد .. ثياب الدبلان .. القرمصيص .. يوم الاحد .. الكنيسه .. غير الرغيف السمح داك .. كان فى الفطور .. وهل أصل سكان المسالمه هم من حلب مصر ؟؟؟ وكيف وصلوا لهذه المنطقه بالذات .. ليه مثلا" ماسكنوا الملازمين sss1 يمكن عشان المقابر .. والكنيسه اللى أصبحت شبه ملك ليهم .. مين من الأسر الشهيره فى هذا الحى .. سودانيين أو نقاده .. أو خلطه بين السودانيين والنقاده .. ؟؟

خش فى التسعه دى ....

mohamed merghani
18-07-2006, 08:36
يلا يا قرقور تعال نتسكع سوى انا لي زمان من التسكع في المسالمة بجد واحشاني موت طبعا من اول السوق زمان كان في العدني والمخبر دي لحدى كا تجي لي بيت ناس صاحبك ومن اشهر الاسر في التبيداب والكتياب وديل من الاسر القديمة استوديو بابو الهندي واهم شخصية في ذلك الشارع هو زوابع صاحب محل تصليح التلفزيونات ده كان شخصية جميله جدا كل الناس كانت بحبه وعندنا شخصيات اجتماعية لذيذه منهم وداعه وداعه ده كان رجل صاحب نكته واشهر نكاته بيقولوا انه هو رجل بتاع حفلات وسهر وسكر ودائماً في خلاف مع اخوه لانه اخوه رجل دين ومصلاحية وسبحه فمن الطرائف انه جاء وداعه يوم متأخر شديد وسكران لط فضرب الباب فاخوه ساله منو؟ قال ليهو وداعه .. قال جائي الساعة اربعة صباحا وسكران كمان امشي بيت محل كنته ... مسكها ليهو وبعد فتره اخوه بيمشي يأذن الصبح في الجامع وبعد الصلاة جاء لقى الباب مقفول فضرب الباب .. ساله وداعة منو .. قال ليهو فلان قال ليهو امشي بيت محل ما كنته ...............وحنواصل
سلام عليك يا همس الشوق ....
نحن طبعآ في حي الركابية أقرب الأقربين للمسالمة ... والنقادة الما ساكنين المسالمة ساكنين عندنا ... يا سلام عليهم من طيبتهم وحسن معشرهم ... وجمال بناتهم وتهذيبهم ...
وديل ناس رغم إنهم مسيحيين وحمر إلا إنهم نعم الجيرة بشاركونا ونشاركهم في الأفراح والأتراح والأعياد ... وأذكر عصفور النقادي وهو رجل نكتة وظريف جدآ كان في كل مأتم بيجي وبصوته العالي يقول الفاااااااتحة ويبسط يديه ويرفع الفاتحة زي العجب مرة كدة أخدتو بالجنبة وقلت ليهو يا عصفور ياخي إنت لمن ترفع الفاتحة بتقول شنو ?? قال لي .. ولا حاجة بس بعد من واحد لحد عشرة ...
أذكر من أهل المسالمة عم عبد القادر ميزري وهو يطوف بدراجته ويطعن الحقن ... يذهب لمن لا يستطيع الحضور ... وكذلك عم عبد الحميد الترزي البلدي جوار مدرسة الراهبات وطريقته العجيبة في أخذ مقاس الجلابية أو العراقي إذ تكون علامة المقاس مسحة من عرق جبينه ....
من أصدقائي هناك حسام عبد الفتاح ومحمد مصطفي الأمين وعلي مصطفي ....
أما زوابع والميرم نفيسة وذو النون والأستاذ كرف وعبد المجيد بتاع التلفزيونات وكل من جاور تقاطع الخور ومدرسة عثمان صالح بتاعت البنات ديل ناس حلتنا وحبايبنا ...
سلامي لأهل ام در جميعآ ... ويلا واصلوا الحوامة وكبروا اللفة ... واظهروا يا الغايبين

قرقور
18-07-2006, 10:31
يلا يا قرقور تعال نتسكع سوى انا لي زمان من التسكع في المسالمة بجد واحشاني موت طبعا من اول السوق زمان كان في العدني والمخبر دي لحدى كا تجي لي بيت ناس صاحبك ومن اشهر الاسر في التبيداب والكتياب وديل من الاسر القديمة استوديو بابو الهندي واهم شخصية في ذلك الشارع هو زوابع صاحب محل تصليح التلفزيونات ده كان شخصية جميله جدا كل الناس كانت بحبه وعندنا شخصيات اجتماعية لذيذه منهم وداعه وداعه ده كان رجل صاحب نكته واشهر نكاته بيقولوا انه هو رجل بتاع حفلات وسهر وسكر ودائماً في خلاف مع اخوه لانه اخوه رجل دين ومصلاحية وسبحه فمن الطرائف انه جاء وداعه يوم متأخر شديد وسكران لط فضرب الباب فاخوه ساله منو؟ قال ليهو وداعه .. قال جائي الساعة اربعة صباحا وسكران كمان امشي بيت محل كنته ... مسكها ليهو وبعد فتره اخوه بيمشي يأذن الصبح في الجامع وبعد الصلاة جاء لقى الباب مقفول فضرب الباب .. ساله وداعة منو .. قال ليهو فلان قال ليهو امشي بيت محل ما كنته ...............وحنواصل

الاخ همس الشوق

المسالمة مدارس كمبوني والنقادة وبيع المخلل والبيض

طبعا حي المسالمة مشهور بالمواتر الفيسبا لانو اغلب النقادة بيمتلكو مواتر فيسبا

المسالمة صحبي محمد مصطفى الامين
ود ناس الامين عبدالرحمن من صياغ سوق امدرمان

بجيك تاني يا همس الشوق

قرقور
18-07-2006, 10:35
سلام عليك يا همس الشوق ....
نحن طبعآ في حي الركابية أقرب الأقربين للمسالمة ... والنقادة الما ساكنين المسالمة ساكنين عندنا ... يا سلام عليهم من طيبتهم وحسن معشرهم ... وجمال بناتهم وتهذيبهم ...
وديل ناس رغم إنهم مسيحيين وحمر إلا إنهم نعم الجيرة بشاركونا ونشاركهم في الأفراح والأتراح والأعياد ... وأذكر عصفور النقادي وهو رجل نكتة وظريف جدآ كان في كل مأتم بيجي وبصوته العالي يقول الفاااااااتحة ويبسط يديه ويرفع الفاتحة زي العجب مرة كدة أخدتو بالجنبة وقلت ليهو يا عصفور ياخي إنت لمن ترفع الفاتحة بتقول شنو ?? قال لي .. ولا حاجة بس بعد من واحد لحد عشرة ...
أذكر من أهل المسالمة عم عبد القادر ميزري وهو يطوف بدراجته ويطعن الحقن ... يذهب لمن لا يستطيع الحضور ... وكذلك عم عبد الحميد الترزي البلدي جوار مدرسة الراهبات وطريقته العجيبة في أخذ مقاس الجلابية أو العراقي إذ تكون علامة المقاس مسحة من عرق جبينه ....
من أصدقائي هناك حسام عبد الفتاح ومحمد مصطفي الأمين وعلي مصطفي ....
أما زوابع والميرم نفيسة وذو النون والأستاذ كرف وعبد المجيد بتاع التلفزيونات وكل من جاور تقاطع الخور ومدرسة عثمان صالح بتاعت البنات ديل ناس حلتنا وحبايبنا ...
سلامي لأهل ام در جميعآ ... ويلا واصلوا الحوامة وكبروا اللفة ... واظهروا يا الغايبين


ود ميرغنى حسام عبدالفتاح ومحمد مصطفى الامين ديل دفعتى نفس الفصل في الاهلية قرينا النهر عمر
طبعا حسام شغال في وزارة الخارجية ومحمد مصطفى اخبارو مقطوعة منى تخيل كنت فترة كل يوم بجي بي جنب بيتهم شارع كرري

همس الشوق
18-07-2006, 11:49
نعم اصل نقاد بيقولوا هي منطقة في صعيد مصر وجو واستوطنوا في امدرمان وفي المسالمة بالذات من زمان لقربها من السوق والكنيسة معاً وطبعاً استوطانهم في المسالمة هي مسألة دينيه بحته نسبة لوجود الكنيسة وحتى مجلس الكنائس كان بدعم كل النقاده مادياً عشان يسكنوا قرب الكنيسة يعني اي نقادي بيلاقى بين في المسالمة بيع او ايجار بيمده مجلس الكنائس بالقروش اذا كان ميسور بيدفها على اقساط واذا كان فقير ممكن يشتروه ليهو ... عشان كده ما سكنوا الملازمين ....وبعدين مش الكنيسة بس لاصبحت ملك كل المنطقة اصبحت ملك يعني الان اصبح عدد السودانيين بسيط جداً بنسبة النقاده ........الناس دي يا جماعة عندهم تكافل اجتماعي ما طبيعي عشان كده بنلقى كل المسالمة يسكنوها النقاده (وعلى فكره هم ما بيرضوا كلمة نقاده بيعتبروها نبذه ) ما سكنو
وللحديث بقية .......

همس الشوق
18-07-2006, 12:02
يا سلاااااااااااااااااااااااااااام ياخي
مدرسة عثمان صالح دي ما مدرستي القريت فيها المرحلة الابتدائية يا سلام يا يا خالة التاية كانت بتبيع لينا الفطور وخالتي فاطمة وبرضو كانت عندكم في الركابية خاله بتبيع القنقليز بالدكور في بيتها كنا بنمشي ليها بعد اليوم الدراسي ونقعد لحدي الساعة اثنين ولمن نرجع البيت يسالونا ليه اتاخرتو نقول ليهم كانت عندنا واجب زمان والله يا عثمان صالح وست ام سلمة وهدى بشرى طبعا دي شقيقة الاستاذ ذو النون بشرى ايام وبيت حلاوة مولد في شارع الخور وبقالة ام ياسر والجكس الفيها ولا شنو
وللحديث مدد

همس الشوق
18-07-2006, 14:40
المسالمة مدارس كمبوني والنقادة وبيع المخلل والبيض
يا سلام يا جماعة والله حرام عليكم شهيتونا الاكل زاتو
دكان عمي بشارة ودكان عياد وعاطف حالياً وبرعي بتاع البوش وعبد العظيم بتاع الكراسي ودكان عمي عبدالله بتاع الفول العجيب والطعمية ربنا يرحمه وحنان بتاع الكراسي ياالله اكير و

قرقور
19-07-2006, 06:29
همس الشوق

زمان كانو بيرسلونا المسالمة نمشي نجيب الفرد ونجيب الخيوط من النقادة

همس الشوق
19-07-2006, 07:16
لكن ما لقيتك من زمن شخته
بيقولوا زمان النقاده كلهم بمارسوا مهنه الغزل دي لكن هسه تعال شوف اتطوره وبقوا اخر روقة وبيوت كيف وعربات كيف والغريبة انه ما بحبوا يقولوا ليهم الماضي ده ........تخيل

قرقور
19-07-2006, 07:59
لكن ما لقيتك من زمن شخته
بيقولوا زمان النقاده كلهم بمارسوا مهنه الغزل دي لكن هسه تعال شوف اتطوره وبقوا اخر روقة وبيوت كيف وعربات كيف والغريبة انه ما بحبوا يقولوا ليهم الماضي ده ........تخيل


فعلا النقادة هم اول من ادخلو مهنة الغزل في امدرمان
طبعا يا همس هم سلكو طريق التجارة ونجحو في ده
اها عايزين نعرف عظماء المسالمة في الشعر والغناء والسياسة والرياضة

طبقة الأزون
19-07-2006, 08:25
همس الشوق مدارس كمبوني والنقادة وبيع المخلل والبيض
يا سلام يا جماعة والله حرام عليكم شهيتونا الاكل زاتو
دكان عمي بشارة ودكان عياد وعاطف حالياً وبرعي بتاع البوش وعبد العظيم بتاع الكراسي ودكان عمي عبدالله بتاع الفول العجيب والطعمية ربنا يرحمه وحنان بتاع الكراسي ياالله اكير


إتخيل ياهمس الشوق أنحنا كنا بندق الكدارى من مدرسة محمد حسين عشان نأكل بوش عند عمك برعى .. طبعا" كان دائما" بنتأخر عندو عشان الزحمه بس فى أيام معدوده دى كنا مانبقدر نمشو ليهو عشان نحضر حصة الانجليزى خاصة عند الأستاذ الأديب والشاعر الكبير إبراهيم إسحاق .. وكذلك النور عثمان أبكر .. أما حصة العربى الخاصة بالاستاذ المعز ( شرح المعلقات السبع وعيون الأدب العربى ) فدى كان بيكون فيها شكل عديل لانو الفصل بيكون فيها ضعف العدد .. من الفصول الأخرى كان يشرفنا أخوننا لانها بصراحه كانت متعه لاتوصف .. شوف طلبة الزمن دا .. يشحدوهم شحده عشان يجوا المدرسه .. ههههههههههه يازمن ..:trrr1:

قرقور
19-07-2006, 08:40
همس الشوق مدارس كمبوني والنقادة وبيع المخلل والبيض
يا سلام يا جماعة والله حرام عليكم شهيتونا الاكل زاتو
دكان عمي بشارة ودكان عياد وعاطف حالياً وبرعي بتاع البوش وعبد العظيم بتاع الكراسي ودكان عمي عبدالله بتاع الفول العجيب والطعمية ربنا يرحمه وحنان بتاع الكراسي ياالله اكير


إتخيل ياهمس الشوق أنحنا كنا بندق الكدارى من مدرسة محمد حسين عشان نأكل بوش عند عمك برعى .. طبعا" كان دائما" بنتأخر عندو عشان الزحمه بس فى أيام معدوده دى كنا مانبقدر نمشو ليهو عشان نحضر حصة الانجليزى خاصة عند الأستاذ الأديب والشاعر الكبير إبراهيم إسحاق .. وكذلك النور عثمان أبكر .. أما حصة العربى الخاصة بالاستاذ المعز ( شرح المعلقات السبع وعيون الأدب العربى ) فدى كان بيكون فيها شكل عديل لانو الفصل بيكون فيها ضعف العدد .. من الفصول الأخرى كان يشرفنا أخوننا لانها بصراحه كانت متعه لاتوصف .. شوف طلبة الزمن دا .. يشحدوهم شحده عشان يجوا المدرسه .. ههههههههههه يازمن ..:trrr1:


طبقة دفعة كم شهادة سودانية
اوعى تكون قديم انا غايتو لغاية هسي دفعتي محمد مرغني شهادة سودانية 89

طبقة الأزون
19-07-2006, 08:40
سلام عليك يا همس الشوق ....
نحن طبعآ في حي الركابية أقرب الأقربين للمسالمة ... سلامي لأهل ام در جميعآ ... ويلا واصلوا الحوامة وكبروا اللفة ... واظهروا يا الغايبين


ودالخليفه .. وينك ياحلو .. مطول فى الغيبه إنشاء الله أمريكا ماتكون ماخداك مننا .. سلامنا لجميع الأخوان خاصة عوض حسن ومراته الإستايل .. وإنشاء الله الشعر سلك .. وقول ليها أرجعى لأيام زمان ..

تعال وتعال وطمئنى .. دا الأفارو المجننى ..

بعدين تعال إنته مالك مع الركابيه دى كاسره فيك رجل ولاشنو .. الرابعه عرفناها .. ريحة الحبايب .. المسالمه .. قولنا خير .. البنات الصفر السمحات .. الملازمين .. شلنا النفس وقولنا مدرسة أمدرمان الأهليه .. المره دى سيك .. سيك .. معلق فيك .. الركابية .. عمنا أحمد قدم الخير .. عيال برو .. أحمد الرفاعى .. الأخ الأديب المؤدب بأصله وفصله .. ياسر حسن سعد .. عيال عبدالتام .. أيمن .. معاويه .. الشيوخ .. الزوايات .. حرك ياعم .....

إنشاء الله العيال مايكونو تاعبنك فى الرطانه .. كان مابيعرفوا التنكليزى عيدل ..

mohamed merghani
19-07-2006, 10:28
لكن ما لقيتك من زمن شخته
بيقولوا زمان النقاده كلهم بمارسوا مهنه الغزل دي لكن هسه تعال شوف اتطوره وبقوا اخر روقة وبيوت كيف وعربات كيف والغريبة انه ما بحبوا يقولوا ليهم الماضي ده ........تخيل
سبحان مغير الأحوال .. بالله النقادة اتفلهموا كدة ??
والله لي زمن من امدرمان .. والناس ديل زمان بيوتهم مافي زول بقدر يدخلا من العفنة والضيق ... ولمن يجوا ينوموا برصوا سرايرهم وعناقريبهم زي صينية الرغيف .. مافي فرقة ... والزول السريرو في النص إلا يتلب فوق ريسين اخوانو ...
والبيت كلو تلقاه فد إويضة وحويش صغير مليان جداد وبط وأرانب وحتة مطبخ جنبو الفرن وبالزاوية كدة كم حفرة للنسيج ... كل زول بي حفرتو .. الأبو ... الأم ... الجد ... الست اللي هي الحبوبة .. وتنتشر براميل الفسيخ وصفايح المخلل هنا وهناك ...
كان النقادة شبه محتكرين شغل البارات زمان زمن الدنيا بي خيرا وما يرتبط بالشربة من مزة من مخلل وزيتون وفول مدمس وبيض مسلوق وطعمية وكان أمام كل بار نقادي بي قفتو وقراطيسو وأكياسو ..ومن ناس حلتنا في المجال دا عمك وقيم وهلال وفليب وعطاالله وجرجس ورمسيس وفادي وسمير ... والناس ديل كلهم بعد الشريعة بقوا تجار أقمشة وإسبيرات خاصة اسبيرات المواتر وكذلك الصيدليات ...
الشي المحيرني فيهم مافي زول منهم بموت بسهولة ومن هنا جاءت عبارة (عجوز النصاري) ووالله طيلة حياتي هناك ما ماتوا إلا نقاديين اتنين بس واحد فيهم اسمو مكين مات في حادث حركة في طريقو للبيت بعد ما قفل بارو في بحري والتانية ولية عجوووووزة اسمها أم إدوارد وإدوارد ولدها دا عمرو ما أقل من 65 سنة وهي ما ماتت إلا بعد ما كرعينها اتلولووا وراسا اتمعط وجلدها دا كرمش زي الدلقان المرقوهو من خشم بقرة ...

mohamed merghani
19-07-2006, 11:04
بعدين تعال إنته مالك مع الركابيه دى كاسره فيك رجل ولاشنو .. الرابعه عرفناها .. ريحة الحبايب .. المسالمه .. قولنا خير .. البنات الصفر السمحات .. الملازمين .. شلنا النفس وقولنا مدرسة أمدرمان الأهليه ..
طبقة حبيبنا ... ياخي الركابية دي قلب امدرمان القديمة ... حوالينها كل الأحياء العريقة دي .. المسالمة حي السوق الشهداء ودنوباوي القلعة مكي ود عروسة ود ارو وشوية شوية حي العرب والعرضة حي البوستة العباسية بيت المال الملازمين ابوروف سوق الشجرة العمدة شرق وغرب ومن بيتنا في الركابية لأي حي من الأحياء دي فركة كعب بس ...ولو اتسلبطت في أي حي منهن عندي حق ... لكن الموردة دي بعيدة مننا شوية ....
وحتي ريحة الحبايب الفي الرابعة كلهم مولودين في الركابية ...
وهنا الزوايا واصحاب الذكر والحوليات ابتداء بالخليفة مكي عربي جوار ميدان البيان ... ويوم الحولية بتاعت ناس الخليفة أحمد يوم مشهود أهلنا الختمية ديل يأتون من كل فج عميق وعلي رأسهم السيد محمد عثمان والسيد أحمد المرغني فتذبح الذبائح وتضرب نوبات الذكر والبيارق والأعلام فتضيق زقاقات الركابية بجموع البشر ..
وهنا أيضآ السادة الأحمدية وزاوية الشيخ مرسي الأحمدي المرازقي ناس زريبة الكاشف ويوم حوليتهم يغلق الشارع من شارع الوادي جوار منزل آل عمر الإمام غربآ قريبآ من شارع كرري ودكان عمك الصادق طه والزقاقات المتفرعة ... ولكم كان يطربني إنشاد السادة البرهانية والسادة السمانية ناس الشيخ العارف بالله الشيخ قريب الله أبا صالح ...
ولا ننسي زاوية السادة الرفاعية ناس شيخ ميطي والشيخ الرائع كمال ميطي أحسن من ينشد بردة الإمام البصيري بصوته الندي العذب ...
ولي عودة ..

طبقة الأزون
19-07-2006, 13:37
ود الخليفه .. ياروعة سحر الأسطوره..

تعجبنى كدا .. وبعد دا يحق ليك تتشعبط فى باصات الثوره بالنص بمزاج .. زريبه الكاشف .. ليه سموها كدا .. من أسرة الكاشف صديقنا وحبيبنا أنور الكاشف .. دفعه فى أمدرمان الثانويه العامه .. وكذك الأخ زكى وأخوه سلامه .. المداح .. الذكر .. النوبه .. الشيخ قريب الله .. عياله والطريق وأهل القوم ..

واصل الحكايه .. باين عليها الشغله إحلوت شديد .. ياشديد ..

همس الشوق
19-07-2006, 13:59
الله يجازي محنك يل ود الخليفة وبعدين انت من زمن الحاجات دي الناس ديل وصلوا مرحلة من التطور وحتى الفسيح الاسمو فسيخ النقاده بقوا ما بياكلوهو يعني نحن عشان ناكل فسيخ بنتعب شديد بس لسه لحدي الان في ناس (شمعه ) لو بتعرفها ديل ناسكم ناس الركابية قريبين لي ناس مساعد وناس حنفية لكن فعلا ديل روحهم طويلة خلاص ما عنده زول بموت بي هين استغفر الله العظيم يا زول ما تدخلنا في الحرام ....
لكن انت في الركابية ما عندكم نقاده كتار لكن عندكم ناس الزريبة والجكس العجيب موووووش

همس الشوق
19-07-2006, 14:08
المسالمة على حسب معلوماتي والله اعلم ما عندها نشاطات تذكر المسالمة فيها الغزلان وبس

وبرضو لانه غالبية السكان مسيحيين ماعندكم غير الكنيسة وبس لكن كان في مامون عوض ابو ذيد وعندنا ذو النون بشرى والجابري من هسه ما بستحضر لكن حاوعدك ان شاء الله

عثمان إدريس
19-07-2006, 14:28
تسجيل حضور ومتاوقة :D

متعة في السرد الله يديكم العافية شباب

نحنا أمدرمان دي بنجيها ضيوف بس بنعرف فيه الخطوط العريضة

من اسواق و مواقف .. زمااان كنا ساكنين في داخلية في الفتيحاب

محطة الكوبري بعد لفة المهندسين بي محطتين .. عندنا كان واحد

بتاع بوش وكوارع في المحطة دي بنجي عندنا 1200 جنية ونحنا

في أكثر من عشرة وطبعاً هي ياها الوجبة الوحيدة البناكلها كنا

الله يجازي الكان السبب :mad: المهم بنضرب البوش داك ونقعد

نكشف في الشارع لحد ما الكراع تخف بعداك بتفكفك علي الداخلية

.
.
.
.
المهم ترانا مصنقرين هنا عشان نستفيد منكم يا رائعين

56g58 56g58 56g58

قرقور
20-07-2006, 07:46
الله يجازي محنك يل ود الخليفة وبعدين انت من زمن الحاجات دي الناس ديل وصلوا مرحلة من التطور وحتى الفسيح الاسمو فسيخ النقاده بقوا ما بياكلوهو يعني نحن عشان ناكل فسيخ بنتعب شديد بس لسه لحدي الان في ناس (شمعه ) لو بتعرفها ديل ناسكم ناس الركابية قريبين لي ناس مساعد وناس حنفية لكن فعلا ديل روحهم طويلة خلاص ما عنده زول بموت بي هين استغفر الله العظيم يا زول ما تدخلنا في الحرام ....
لكن انت في الركابية ما عندكم نقاده كتار لكن عندكم ناس الزريبة والجكس العجيب موووووش


الجكس العجيب فعلا في الركابية وزريبة الكاشف

ومكي ود عروسة

المثل بيقول لو عايز الجكس مية المية حي مكي والركابية

قرقور
20-07-2006, 07:48
تسجيل حضور ومتاوقة :D

متعة في السرد الله يديكم العافية شباب

نحنا أمدرمان دي بنجيها ضيوف بس بنعرف فيه الخطوط العريضة

من اسواق و مواقف .. زمااان كنا ساكنين في داخلية في الفتيحاب

محطة الكوبري بعد لفة المهندسين بي محطتين .. عندنا كان واحد

بتاع بوش وكوارع في المحطة دي بنجي عندنا 1200 جنية ونحنا

في أكثر من عشرة وطبعاً هي ياها الوجبة الوحيدة البناكلها كنا

الله يجازي الكان السبب :mad: المهم بنضرب البوش داك ونقعد

نكشف في الشارع لحد ما الكراع تخف بعداك بتفكفك علي الداخلية

.
.
.
.
المهم ترانا مصنقرين هنا عشان نستفيد منكم يا رائعين

56g58 56g58 56g58


الاخ عثمان ادريس مرحب بيك ويلا نلف في ربوع امدرمان

طبقة الأزون
20-07-2006, 08:20
المهم ترانا مصنقرين هنا عشان نستفيد منكم يا رائعين

56g58 56g58 56g58


الرائع .. عثمان ود إدريس ..

أولا .. جيب ليك بنبر XXL وشرفنا بالمتاوقه والحضور .. الفتيحاب .. منطقه جديده من مناطق أمدرمان .. كان يسكنها سابقا" العرب حتى إنو كانوا بيطلقوا عليهم ( عرب الفتيحاب ) وغالبيه هؤلاء العرب جزارين . معظم سكان الفتيحاب حاليا" نازحين جدد لهذه المنطقه لكن هى منطقه ( لحم رأس ) عديل كميه من البشر والخلق مامعقوله أبدا" .. أصبح الآن غالبية سكان الفتيحاب من الدناقله وعلى ماأعتقد يرجع الفضل فى هذا للوالد على سراج والذى أطلق أسم عائلته على أول محطه وأنت داخل للفتيحاب ( محطة سراج ) وعمنا سراج كان تاجر أراضى كبير وقام ببيع كل القطع السمحه فى المربعات السمحه أيضا" لأهلنا الدناقله خاصة فى دول المهاجر .. الفتيحاب تنقسم الى عدة مربعات .....

للحديث بقيه .. بس أنتا ورينا من محطة الكوبرى دى بتعرف شنو فى هذه المنطقه أو فى طريقك للجامعه ماذا كان يلفت نظرك فى الطريق .. طبعا" غير الجكس ..

همس الشوق
20-07-2006, 10:04
اخونا عثمان مرحبك حبابك الف الما بنتلف ونحن سعيدين بك وبوجودك معانا في ام در امان ونحن الضيف بنشيلوا فوق الراس وصدقني لو صنقره قدر ما تقدر ما حتندم ........دي امدرمان ياخي .......ولا شنو يا الامدرمانجية (تعبير لذيذ موش)

وتاني مرحب بضيوفنا
تخريمة
معليش يا عثمان لاني انا جديد ما عرفتك من اي منطقة

mohamed merghani
20-07-2006, 10:24
الله يجازي محنك يل ود الخليفة وبعدين انت من زمن الحاجات دي الناس ديل وصلوا مرحلة من التطور وحتى الفسيح الاسمو فسيخ النقاده بقوا ما بياكلوهو يعني نحن عشان ناكل فسيخ بنتعب شديد بس لسه لحدي الان في ناس (شمعه ) لو بتعرفها ديل ناسكم ناس الركابية قريبين لي ناس مساعد وناس حنفية لكن فعلا ديل روحهم طويلة خلاص ما عنده زول بموت بي هين استغفر الله العظيم يا زول ما تدخلنا في الحرام ....
لكن انت في الركابية ما عندكم نقاده كتار لكن عندكم ناس الزريبة والجكس العجيب موووووش
يا همس الشوق زمان شمعة دي كانت بتكوي شعر البنات ...
وكنا لمن ندور ننبز النقادي لمن كنا شفع صغار نقول ليهو أمشي يا يا نقادي يا معفن يا كافر يا أكال الفسيخ الني ... غايتو حاجة كدة زي تقرير كوز أمنجي في واحد لمن كتب فيو .. فاسد في نفسه مفسد لغيره لا يرجي إصلاحه يسب العقيدة ويبول واقفآ ...
يا همس الشوق الركابية دي غير النقادة والحلب ونحن فيها منو ??? والله كانوا في زي خمسة ستة بيوت ببيعوا الفسيخ ابتداءآ من متيلدا و ست و وردة وآمال ونوال النقادية ...
وطبعآ ناس مساعد ديل المربوع البعدنا طوالي ودفعتي من أولاد مساعد الأخ حاجب مساعد ..
آآآآه يا همس من جكس النقادة والحلب البكسر الضلع ... ديل حاجة عجيبة خلاص ولمن قالوا فيهن بي عفتك صنت السفور ما كضبوا آآآآاه يا حليلكم يا ناس ميرفت ونيللي وسناء وجورجيت وفادية

الننو دا
20-07-2006, 10:30
مشواركم حلووو خلاااااااص :trrr6:
زحو لي انركب جمبكم وامشي معااااكم:trrr1:

mohamed merghani
20-07-2006, 10:53
يا سلاااااااااااااااااااااااااااام ياخي
مدرسة عثمان صالح دي ما مدرستي القريت فيها المرحلة الابتدائية يا سلام يا يا خالة التاية كانت بتبيع لينا الفطور وخالتي فاطمة وبرضو كانت عندكم في الركابية خاله بتبيع القنقليز بالدكور في بيتها كنا بنمشي ليها بعد اليوم الدراسي
طبعآ يا همس الشوق أخواتي كلهن خريجات مدرسة عثمان صالح زمن ست فاطمة اسماعيل مجذوب وآخر اخت اتخرجت سنة والله ما متذكر لكن هي مواليد 1984 .. لكن أخواتي الكبار بتذكر كانت عندهم ناظرة فقرية بتخوف المدرسة كلها اسمها ست نتلية وكنت لمن اتشاكل مع اختي الكبيرة وأدقها تقول لي بكلم ليك ست نتلية ورغم إنو مافي حاجة بتلمني معاها لكن كنت بخاف أسأل عليك الناس ..شغل جهل بس..
كان في اتنين ستات قنقليز ودقة بيوتهم فاتحة علي بعض واحدة فيهن اسمها التويمة بت الصباح الله يرحمها والتانية اسمها حاجة كلتوم الله يرحمها برضو .. وحاجة كلتوم دي بيتها أولو طرطشة وزقاقات ضيييييقة وجخانين كدة الزول لو ما عارفها كويس بطش بي جوة ...
وزمان كنت بحب أمشي لحاجة كلتوم عشان مرة مرة كانت بتديني قنقليز ودقة ساي ملح عشان كنت بترسل ليها

mohamed merghani
20-07-2006, 10:56
مشواركم حلووو خلاااااااص :trrr6:
زحو لي انركب جمبكم وامشي معااااكم:trrr1:
حبيبي الننو .. ويييييين يا اخوي ليك وحشة والله ...
يلا اركب وقول لينا من وين وماشي وين ..

قرقور
20-07-2006, 11:12
طبعآ يا همس الشوق أخواتي كلهن خريجات مدرسة عثمان صالح زمن ست فاطمة اسماعيل مجذوب وآخر اخت اتخرجت سنة والله ما متذكر لكن هي مواليد 1984 .. لكن أخواتي الكبار بتذكر كانت عندهم ناظرة فقرية بتخوف المدرسة كلها اسمها ست نتلية وكنت لمن اتشاكل مع اختي الكبيرة وأدقها تقول لي بكلم ليك ست نتلية ورغم إنو مافي حاجة بتلمني معاها لكن كنت بخاف أسأل عليك الناس ..شغل جهل بس..
كان في اتنين ستات قنقليز ودقة بيوتهم فاتحة علي بعض واحدة فيهن اسمها التويمة بت الصباح الله يرحمها والتانية اسمها حاجة كلتوم الله يرحمها برضو .. وحاجة كلتوم دي بيتها أولو طرطشة وزقاقات ضيييييقة وجخانين كدة الزول لو ما عارفها كويس بطش بي جوة ...
وزمان كنت بحب أمشي لحاجة كلتوم عشان مرة مرة كانت بتديني قنقليز ودقة ساي ملح عشان كنت بترسل ليها


ود مرغني انتا طوالي مفردن بتاعين العضة
في الاهلية محمد ادم وعمك بتاع الشاي
حتى مدارس اخواتك لحقتها
الجماعة ديل شغالين معاك بالخسارة
ولا شنو ياهمس sss1 sss1 sss1

mohamed merghani
20-07-2006, 11:48
ود مرغني انتا طوالي مفردن بتاعين العضة
في الاهلية محمد ادم وعمك بتاع الشاي
حتى مدارس اخواتك لحقتها
الجماعة ديل شغالين معاك بالخسارة
ولا شنو ياهمس sss1 sss1 sss1
يا قرقور ياخي هم الكانو مفردننني حب لله في الله لله كدا .. وحاجة كلتوم دي الله يرحمها كانت متعبة خلاص بس تشرك لي قدام بيتها ... وتعال يا ود مرغني أمشي البيان جيب لي ملوة فحم وملوتين دقة .... ومرات نكون داقين الدافوري تناديني ليك من دون الناس تديني مشوار للجزارة أجيب ليها ربع كيلو لحم ..
أما عمك محمد آدم دا صاحبني ليك لمن كنت بجمع الشيرنق حق البوش وهو كان مما يشوفني ليك يناولني المعلوم ( قدح البوش ) فوق الزحمة ....
هي يا قرقور مصالح مشتركة أكتر من كونها فردنة

mohamed merghani
20-07-2006, 11:51
ولا شنو ياهمس sss1 sss1 sss1
وبعدين دا شنو دا ??:mad:
داير تخرب علي مع الجنس اللطيف ??:trrr1:

الننو دا
22-07-2006, 15:37
حبيبي الننو .. ويييييين يا اخوي ليك وحشة والله ...
يلا اركب وقول لينا من وين وماشي وين ..
حبيبنا ميرغني انا عاوز اركب من جمب حاجة كلتوم دي وما ناااازل كلو كلو بس ماشي معااااكم محل ما ماشيييييييييييين sss1 sss1

عثمان إدريس
22-07-2006, 16:40
الرائع .. عثمان ود إدريس ..

أولا .. جيب ليك بنبر XXL وشرفنا بالمتاوقه والحضور .. الفتيحاب .. منطقه جديده من مناطق أمدرمان .. كان يسكنها سابقا" العرب حتى إنو كانوا بيطلقوا عليهم ( عرب الفتيحاب ) وغالبيه هؤلاء العرب جزارين . معظم سكان الفتيحاب حاليا" نازحين جدد لهذه المنطقه لكن هى منطقه ( لحم رأس ) عديل كميه من البشر والخلق مامعقوله أبدا" .. أصبح الآن غالبية سكان الفتيحاب من الدناقله وعلى ماأعتقد يرجع الفضل فى هذا للوالد على سراج والذى أطلق أسم عائلته على أول محطه وأنت داخل للفتيحاب ( محطة سراج ) وعمنا سراج كان تاجر أراضى كبير وقام ببيع كل القطع السمحه فى المربعات السمحه أيضا" لأهلنا الدناقله خاصة فى دول المهاجر .. الفتيحاب تنقسم الى عدة مربعات .....

للحديث بقيه .. بس أنتا ورينا من محطة الكوبرى دى بتعرف شنو فى هذه المنطقه أو فى طريقك للجامعه ماذا كان يلفت نظرك فى الطريق .. طبعا" غير الجكس ..

كررررررر كرب ... دا بنبري أها يا عمنا طبقا .. معليش حفرنا ليكم الواطة يا قرقور :D

والله ياعمنا طبقا زي ما قلت الفتيحاب لم راس ونحنا كنا زي ماتقول كدا طلبة وسكنا يادوب في تلك المنطقة ولكن لا أنسي تلك الزاوية للصلاة تقريباً غرفة 3.5 متر X 4.0 متر كنا بنصلي فيها المغرب والعشاء وعمنا (اسماعيل علي ما أظن) الله يطراهوا بالخير كان حي ووأكان مات الله يرحموا عندوا صوت شجي في التلاوة وهو كان كفيف ..
المهم منطقة هادية جداً وكنا بنمشي ندقها كداري لحد الاسلامية كلية الطب .. ونجي بي جاي مرات نمشي لحد بانت .. وطبعاً أكثر شي كان ملفت للنظر حينها (غير الجكس) تلك الأريحية في اهلها الطيبين نحنا جينا ولسع ما كملنا لينا شهر .. الجماعة كل مرة جايننا وهاك يا تراحيب .. كنا مستأجرين من عسكري بالمعاش وتخيل بيتو وأسرتو معانا يفصلنا حوش فقط !! شوف الدنيا دي كيف هسي هنا في السعودية الحي كلوا لمن يجي عذابي يسكن تلقاهو اتكفرن عليهو .. الله غالب بس

لكن يا طبقة شفت دفارات الفتيحاب زمان كانت كيف ...!!
مرة نحنا ثمانية طلاب عندنا امتحانات في جامعة السودان القسم الغربي وكانت زحمة ما عادية اليوم داك وما عندنا حق المواصلات المهم دافرنا كدااا خشينا جوة وكل ما الكمساري يجي لي واحد فينا يقول لي وراء لحد ما وصلني انا في السلم وطبعاً أخوك كان الشفت بتاع الشلة قلت يا أبو الشباب والله نحنا تمانية وطلاب وعندنا امتحان وما عندنا قروش وزي ما شايف الزحمة كيف في الطريق وعندنا امتحاب بعد ساعتين وكان قلنا ليك من تحت ما عندنا ما بتخلينا نركب .. دحين يا أخوي والله ما عندنا ولازم نمشي الجامعه ...آآآآآآخ زمن ,, بالرغم من المآسي الكانت مصاحبة ليهو ولكن الآن الواحد يتأسف عليهو بالنسبة لآلام الأيام دي في الغربة .. الله يرد غربة الجميع يا عمو

عثمان إدريس
22-07-2006, 17:00
اخونا عثمان مرحبك حبابك الف الما بنتلف ونحن سعيدين بك وبوجودك معانا في ام در امان ونحن الضيف بنشيلوا فوق الراس وصدقني لو صنقره قدر ما تقدر ما حتندم ........دي امدرمان ياخي .......ولا شنو يا الامدرمانجية (تعبير لذيذ موش)

وتاني مرحب بضيوفنا
تخريمة
معليش يا عثمان لاني انا جديد ما عرفتك من اي منطقة

هسه إنت جديد ولا جديدة يا همس الشوق .. لكن ما مشكلة جيناكم في بيتكم
بي هناك ورحبنا بيك ولا قولت شكراً علي الترحيب ما قلتوها :mad:

لكن أقول أنا من أم طرقاً عراض شايف مكتوبة هنا .. يمينك تحت الصورة دي
بي جاي تحت شوية أيوا شفتها وكان ما عرفتها وين في الخريطة أمشي لي
بوست عمنا مالك الحزين وحمل برنامج قوقل إيرث دا واكتبها في سطر البحث
طوالي بوديك هناك وعليك الله سلم لي علي ناس البيت وقول ليهم عثمان كويس
وبرسل ليكم سلامو :D

قرقور
23-07-2006, 08:35
مرحبا بيكم

يوم جديد ولف من جديد في حواري وزقاقات امدرمان

همس الشوق
23-07-2006, 09:41
اهلا يا الننو ومرحب بيك يا اخوي انت من ننويات وين
اعمل حسابك الركشات الايام دي حوادثهم كثيره اركب بس اعمل حسابك لانه شوارع امدرمان لذيذه وخصوصاً المسالمة

همس الشوق
23-07-2006, 09:43
وينك يا قراقيرو مشتاقين اها الليلة الفسحة وين نبدا من وين ايه رايك نمشي اب روف اقله الواحد يشوف اخر مستجدات الاثاث في البحر كيف

قرقور
23-07-2006, 10:58
وينك يا قراقيرو مشتاقين اها الليلة الفسحة وين نبدا من وين ايه رايك نمشي اب روف اقله الواحد يشوف اخر مستجدات الاثاث في البحر كيف
همس
يلا ارح ابوروف

ود الدر والزرايب

ههههههههههههههه النسوان بيمشو ابروف يشترو الشاف والحطب انا غايتو بوصلك قريب من الزرايب sss1

ابروف هاشم ميرغني ابوروف سكسك الفنان

همس الشوق
24-07-2006, 07:08
حقيقي احسن انواع الشاف والطلح هي في ابو روف يعني كل العاصمة المثلثة بتشتري من ابو روف يعني النسوان المدخنات دي كلهم من ابو روف وفي الفترة الاخيره دي تدخل اي بيت تلقى الاثاث من ابو روف .
طبعاً جغرافيا هي قريبة لينا شديد بس صدقني ما بعرف فيها اي حاجة عشان كده حبيت استفيد من البوست ده واعرف ما اجهله عنها
يلا يا ناس ابو روف ايدكم معانا

الننو دا
24-07-2006, 08:21
اهلا يا الننو ومرحب بيك يا اخوي انت من ننويات وين
اعمل حسابك الركشات الايام دي حوادثهم كثيره اركب بس اعمل حسابك لانه شوارع امدرمان لذيذه وخصوصاً المسالمة
هلا همس الشوووووق وطيب خاااااااااااااااااااااااااطر :trrr6:

انا من ننويات هنا ( المنتدي ) لقيتيني كيف ،،، وتصدقي عمري ما ركبت لي ركشة بركبوووها كيف :D

والله امدرمااااااااااااااااااااان فعلاً شوااااارعا لذيذة واللذة عندكم

قلتي لي نبدأ من المسالمة خلااااااس اوكي ::: :c030:
خصوصاً وانا عندي في المسالمة غزاااااال نافر بغني عليهو

قرقور
24-07-2006, 08:35
منطقة ابوروف ولمناطق المجاورة لها

ود البنا وهي منطقة تسكن فيها اسرة ود البنا ومنطقة سوق الشجرة العتيق
فعلا ابوروف مشهورة بسوق الاخشاب
كمان تشتهر منطقة ابوروف بصناعة المراكب الخشبية

ومنطقة ابوروف مشهورة بشجر اللبخ الذي يمتد عمرة منذ فترة طويلة يعطى شريط النيل منظر جميل وجذاب
ظهر من ابوروف الفنان المرحوم المغفور له باذن الله الفنان هاشم ميرغني

دي شوية معلومات عن ابوروف وفي انتظار شخص من ابوروووف يجي

قرقور
24-07-2006, 10:46
انا وود الخليفة عندا فرد درسو معانا في الاهلي المتوسطة

من اولاد ابوروف

التيمان سامي واسامة ووهيب عبدالكريم وامجد عبدالوهاب

من الاسر المشهورة في ابوروف ناس ابوسمرة

قرقور
25-07-2006, 06:59
صباح جميل بنكهه امدرمانية

صباح النور ... صباح الجمال

mohamed merghani
25-07-2006, 11:12
انا وود الخليفة عندا فرد درسو معانا في الاهلي المتوسطة

من اولاد ابوروف

التيمان سامي واسامة ووهيب عبدالكريم وامجد عبدالوهاب

من الاسر المشهورة في ابوروف ناس ابوسمرة
الله يطراك بالخير يا قرقور أخوي ...
بالله التيمان ديل أخبارهم شنو ? والله لي منهم ما يقارب العشرين سنة
وكمان وهيب عبد الكريم ... والده كان عنده دكان كنتين في محطة مكي جوار الطرمبة .. وكنا مرات بنمشي لوهيب هناك وكان من يصر علي تلك المشية نزار عز الدين وأحمد مرغني عمر الله يرحمو .. من أولاد الركابية .. ديل من دفعتك أولاد عمر ...

قرقور
26-07-2006, 07:53
الله يطراك بالخير يا قرقور أخوي ...
بالله التيمان ديل أخبارهم شنو ? والله لي منهم ما يقارب العشرين سنة
وكمان وهيب عبد الكريم ... والده كان عنده دكان كنتين في محطة مكي جوار الطرمبة .. وكنا مرات بنمشي لوهيب هناك وكان من يصر علي تلك المشية نزار عز الدين وأحمد مرغني عمر الله يرحمو .. من أولاد الركابية .. ديل من دفعتك أولاد عمر ...


والله ذكريات يا ود ميرغني

من الركابية برضو دفعتى امجد التوم وعلي احمد علي ديل اولاد حلتك طبعا

التيمان في الامارات بجيب ليك تلفونهم يا صديقي

وين نزار ياود الخليفة انا برضو لي منو قرابة العشرين سنة منو

رايك شنو نواصل في ذكريات الاهلية

mohamed merghani
26-07-2006, 10:34
حقيقي احسن انواع الشاف والطلح هي في ابو روف يعني كل العاصمة المثلثة بتشتري من ابو روف يعني النسوان المدخنات دي كلهم من ابو روف وفي الفترة الاخيره دي تدخل اي بيت تلقى الاثاث من ابو روف .
طبعاً جغرافيا هي قريبة لينا شديد بس صدقني ما بعرف فيها اي حاجة عشان كده حبيت استفيد من البوست ده واعرف ما اجهله عنها
يلا يا ناس ابو روف ايدكم معانا
ناس أبوروف شكلهم كدة مصيفين ..
طبعآ زماااان ود الطهور كانوا بمشوا بيهو سيرة للبحر ...وأنا شخصيآ قبل ما يزيد علي 30 سنة أخدت حظي في تلك السيرة الكنت بعتقد إنو الطهورة ما بتتم إلا بزيارة هذا البحر وأخذ التبريكات بغسل الوجه في هذا البحر المقدس ... وكنت أنظر للبيوت الفاتحة علي البحر وأحسد أهلها لقربهم من برج البركة ...
وعندما كبرت قليلآ تأكدت من وجود البركة في ابوروف في أجمل ما رأيت من بنات ... وعندما كنت بوادي سيدنا الثانوية كنت في طريق العودة للبيت (كداري طبعآ) أتعمد أن أشق موقف حافلات أبوروف خلف الجامع الكبير وقدام استديو نادر ومطبعة الذكري لأمتع نظري من الحور العين طالبات الثانوي ساكنات أبو روف ...وأثاقل الخطي ... وعند موقف مواصلات ناس كرري والحتانة قدام إجزخانة أبونخلة وناس الورنيش أجري جري ... عزابة ساااااي وشوالات وقفافة وعمم ما تديك الدرب ... لألحق باقي حمام أبوروف المشرك للحافلات جوار استديو الوادي ...
في خشم البحر في محل سمك عندي معاهو موقف طريف ... مرة مشيت أبوروف لزيارة صديقي أحمد حسين (بسطاوي) وكان عندي ورقة دينارية جديدة أم 250 جنيه كانت يا دوب طالعة فكرت إني اشتري بيها سمك من المحل المذكور ووقفت في الزحمة ناس وعالم وعربات ما ليها حد ... وعمك مشغول يشيل ويلف في السمك لي ناس العربات .. وكانت تقف جواري إمرأة شكلها كدة وقفتها زي طولت .. وقعدت تكورك .. ياخي ما ممكن .. أنحن من قبيل واقفين ... ما تمشينا حرام عليك ..
سيد المحل قال ليها أها عايزة شنو ? قالت ليهو عايزة سمك بي 500 جنيه ...
قال ليها .. وهو يا حاجة في سمك بي 500 ???
فطبقت ديناريتي وانسحبت موفور الكرامة ... وضربت واحد فول بي 150 جنيه في سوق الشجرة ...

قرقور
26-07-2006, 10:44
ناس أبوروف شكلهم كدة مصيفين ..
طبعآ زماااان ود الطهور كانوا بمشوا بيهو سيرة للبحر ...وأنا شخصيآ قبل ما يزيد علي 30 سنة أخدت حظي في تلك السيرة الكنت بعتقد إنو الطهورة ما بتتم إلا بزيارة هذا البحر وأخذ التبريكات بغسل الوجه في هذا البحر المقدس ... وكنت أنظر للبيوت الفاتحة علي البحر وأحسد أهلها لقربهم من برج البركة ...
وعندما كبرت قليلآ تأكدت من وجود البركة في ابوروف في أجمل ما رأيت من بنات ... وعندما كنت بوادي سيدنا الثانوية كنت في طريق العودة للبيت (كداري طبعآ) أتعمد أن أشق موقف حافلات أبوروف خلف الجامع الكبير وقدام استديو نادر ومطبعة الذكري لأمتع نظري من الحور العين طالبات الثانوي ساكنات أبو روف ...وأثاقل الخطي ... وعند موقف مواصلات ناس كرري والحتانة قدام إجزخانة أبونخلة وناس الورنيش أجري جري ... عزابة ساااااي وشوالات وقفافة وعمم ما تديك الدرب ... لألحق باقي حمام أبوروف المشرك للحافلات جوار استديو الوادي ...
في خشم البحر في محل سمك عندي معاهو موقف طريف ... مرة مشيت أبوروف لزيارة صديقي أحمد حسين (بسطاوي) وكان عندي ورقة دينارية جديدة أم 250 جنيه كانت يا دوب طالعة فكرت إني اشتري بيها سمك من المحل المذكور ووقفت في الزحمة ناس وعالم وعربات ما ليها حد ... وعمك مشغول يشيل ويلف في السمك لي ناس العربات .. وكانت تقف جواري إمرأة شكلها كدة وقفتها زي طولت .. وقعدت تكورك .. ياخي ما ممكن .. أنحن من قبيل واقفين ... ما تمشينا حرام عليك ..
سيد المحل قال ليها أها عايزة شنو ? قالت ليهو عايزة سمك بي 500 جنيه ...
قال ليها .. وهو يا حاجة في سمك بي 500 ???
فطبقت ديناريتي وانسحبت موفور الكرامة ... وضربت واحد فول بي 150 جنيه في سوق الشجرة ...


حبيبنا ود الخليفة ذكرتني موقف ابوروف فعلا كان بيكون فيهو الجكس الشديد

لكن يافردة انتى من الثانوي بتحب الجكس ههههههههههههههههههههه
فعلا ابوروف مليانة بالحسان

والمثل بيقول لو عايز عينك تشوف تعال لي جكس ابوروف
ولو عايز الجكس سليم الزوق الركابية وفريق السوق
ولو دير الجكس الحلووو ودالبنا ووداورو
والعباسية في الجكس ديما منسية
ولو عايز الجكس والطرب حي البوستة وحي العرب
ولو عايز الجكس المابشتنه تعال المورده
ولو عايز تبكي تعال شوف جكس مكي
ولو عايز راحة البال تعال شوف جكس بيت المال

قرقور
27-07-2006, 07:43
يوم جديد

ولف من جديد في امدرمان

طبقة الأزون
27-07-2006, 08:39
[QUOTE=قرقور]حبيبنا ود الخليفة

المثل بيقول لو عايز عينك تشوف تعال لي جكس ابوروف
ولو عايز الجكس سليم الزوق الركابية وفريق السوق
ولو دير الجكس الحلووو ودالبنا ووداورو
والعباسية في الجكس ديما منسية
ولو عايز الجكس والطرب حي البوستة وحي العرب
ولو عايز الجكس المابشتنه تعال المورده
ولو عايز تبكي تعال شوف جكس مكي
ولو عايز راحة البال تعال شوف جكس بيت المال[/QUOT


و لو داير جكس ميه فى الميه .. تعال الرابعه فى المهديه

عجبتك دى ياود الخليفه .. تتضحك ساى شايفك .. إنشاء الله ينفعك

قرقور
27-07-2006, 09:51
[QUOTE=قرقور]حبيبنا ود الخليفة

المثل بيقول لو عايز عينك تشوف تعال لي جكس ابوروف
ولو عايز الجكس سليم الزوق الركابية وفريق السوق
ولو دير الجكس الحلووو ودالبنا ووداورو
والعباسية في الجكس ديما منسية
ولو عايز الجكس والطرب حي البوستة وحي العرب
ولو عايز الجكس المابشتنه تعال المورده
ولو عايز تبكي تعال شوف جكس مكي
ولو عايز راحة البال تعال شوف جكس بيت المال[/QUOT


و لو داير جكس ميه فى الميه .. تعال الرابعه فى المهديه

عجبتك دى ياود الخليفه .. تتضحك ساى شايفك .. إنشاء الله ينفعك


الاخ اوزون

صاحبنا ودالخليفة الامية بتاعتو الرئيسية في الرابعة

عشان كده ضحك


اوزون صباحك ورد

قرقور
30-07-2006, 06:23
يوم جديد

ولف وتسكع من جديد

صباحكم لزيز بنكهه امدرمانية

قرقور
02-08-2006, 08:48
اخوتي الاعزاء

اليوم نلف ونتسكع بين زقاقات امدرمان دايرين نتكلم شوية عن الشعر والناء في امدرمان

نطرق لكل حقب الناء والفن في امدرمان بداية من الحقيبة والي وقتنا هذا

وفي انتظار مشاركاتكم

قرقور
03-08-2006, 08:56
http://shahss.com/song/haron-omdor.rm

Sokkara
11-08-2006, 12:29
حليل الناسا وناسا
طريت أم در حليل ناسا
وكيف أنساها وأتناسا
ومفتون بي ظبي كناسا

الشقي
12-08-2006, 13:27
لا يسعني الا ان اقدم تحياتي لصاحب هذا البوست الرائع المتجدد ...
ولان ام درمان تحتل موقعا مميزا في قلبي اثرت الا ان اتكلم عن احد الشعراء الامدرمانيين وهو الشاعر عبيد عبد الرحمن :
من مواليد 1908
من اشهر اعماله
رسايل ( حبيبي اكتب لي وانا اكتب ليك بالحاصل بي والحاصل بيك
الحاصل بي انا شوق وحنين واقيم الليل اهات وانين
اتوجع ما بين الجنبين فارقني حبيب الفني سنين )
......
الف واجيكم راجع...:trrr6:

قرقور
13-08-2006, 07:57
سكرا والشقي

مرحبا بكم في ربوع امدر وزقاقاتها

Sokkara
13-08-2006, 09:54
تسلم امدرمان الحنان ناسا

قرقور
13-08-2006, 09:59
تسلم امدرمان الحنان ناسا


الحنينة السكرة

فعلا تسلم امدرمان الحنان ناسها
http://shahss.com/song/sami-3aaza.rm

والاغنية اهداء لناس امدرمان الحنان

Sokkara
13-08-2006, 20:20
قرقور شكرا علي الترحاب
ياربي نبدا من وين في امدرمان حي الشهداء
ولا العرضة
ولا حي الامراء
من وين نبداك يا ام در امان


حليل ام در حليل ناسا يا عازة الفراق بي طال

قرقور
14-08-2006, 06:00
قرقور شكرا علي الترحاب
ياربي نبدا من وين في امدرمان حي الشهداء
ولا العرضة
ولا حي الامراء
من وين نبداك يا ام در امان


حليل ام در حليل ناسا يا عازة الفراق بي طال

الحنينة السكرة

نبدا من محل انتى عايزة من مسقط راسك ونبدا نلف في امدر

زقاق زقاق وشارع شارع

كتاحه
14-08-2006, 07:38
الحنينة السكرة
نبدا من محل انتى عايزة من مسقط راسك ونبدا نلف في امدر
زقاق زقاق وشارع شارع

فنقر فنقر ... فريق ريد ... بانت الخور .. طبعا لافي حولك صح
انا عارفك اناني بتحب حتتكم وشارع بيتكم ... والشارع السيافي لغاية الحيطة الكبيرة ... حيطة حجر

قرقور
14-08-2006, 07:43
فنقر فنقر ... فريق ريد ... بانت الخور .. طبعا لافي حولك صح
انا عارفك اناني بتحب حتتكم وشارع بيتكم ... والشارع السيافي لغاية الحيطة الكبيرة ... حيطة حجر


الحيطة حيطة جالوص
بابها باب زنك صغيروني

من جوة نفاج فاتح باب للمحنة جنبو راكوبة فيها الحاجة بتقيل فيها

الراكوبة جنبها زير مويتو صااااااقتة


دي ملامح امدرمانية

كتاحه
14-08-2006, 07:57
الحيطة حيطة جالوص
بابها باب زنك صغيروني
دي ملامح امدرمانية

انا قاصد حيطة الحجر .... تاني حيطة الحجر
وبيت الحجر كمان ... حجر الطواحين ... طواحين الكسره ... طبعا انا ما باكل الكسره
الحيطة القدر حيطكم مرتين واعرض مرتين والباب صغير صح
وكمان فيها سبورة
الموضوع بقي قلوتيه (بالقاف والا الغين)

قرقور
14-08-2006, 08:06
انا قاصد حيطة الحجر .... تاني حيطة الحجر
وبيت الحجر كمان ... حجر الطواحين ... طواحين الكسره ... طبعا انا ما باكل الكسره
الحيطة القدر حيطكم مرتين واعرض مرتين والباب صغير صح
وكمان فيها سبورة
الموضوع بقي قلوتيه (بالقاف والا الغين)


قصدك حيطة الحجر

الحارسها سواري راكب حصان

فيها سبورتين ما سبورة واحدة الناس بتتلم فيهو عصرية وبتفرتقو مغربية

فيها خرستو دايما لافي
وعمك علي للتسالي يوزع

كتاحه
14-08-2006, 08:19
قصدك حيطة الحجر
الحارسها سواري راكب حصان
فيها سبورتين ما سبورة واحدة الناس بتتلم فيهو عصرية وبتفرتقو مغربية
فيها خرستو دايما لافي
وعمك علي للتسالي يوزع

انت صحي عباس ركس توفي

قرقور
14-08-2006, 08:23
انت صحي عباس ركس توفي


يطرشنى ما سمعتا لكن بتأكد ليك

همس الشوق
14-08-2006, 10:18
ازيكم يا جماعة بعد غيبة طويلة نسبة لظروف العمل بس سمعتة شمار عباس ركس صحي مات

قرقور
14-08-2006, 10:33
الاخ همس الشوق

حمدالله على السلامة

معلومة عباس ركس دي اول مرة اسمعها من محمد ابوعاقلة

Sokkara
14-08-2006, 10:41
الحنينة السكرة

نبدا من محل انتى عايزة من مسقط راسك ونبدا نلف في امدر

زقاق زقاق وشارع شارع


نبدا بالمورده يا قرقور
بي ناس الادريسي وناس مكاوي
الشارع ده فيه زكريات حلوة زكريات الطفولة

قرقور
14-08-2006, 10:57
نبدا بالمورده يا قرقور
بي ناس الادريسي وناس مكاوي
الشارع ده فيه زكريات حلوة زكريات الطفولة


شارع الادارسة سيد محمد الله يرحمه وسيد احمد وابنه عابد وسيد التازي
ناس مكاوي زهير ( نسيبنا ) مكاوي ابوشنب - عبدالعظيم -

الشارع ده فيهو ناس النجومي ناس كيجا ونميري جقرو ملك العطالة

شارع الادريسي شارع الدافوري بتاعنا

نهاية الشارع خالد حمزة

بجيك راجع تاني

طبقة الأزون
15-08-2006, 10:45
شارع الادارسة سيد محمد الله يرحمه وسيد احمد وابنه عابد وسيد التازي
ناس مكاوي زهير ( نسيبنا ) مكاوي ابوشنب - عبدالعظيم -

الشارع ده فيهو ناس النجومي ناس كيجا ونميري جقرو ملك العطالة

شارع الادريسي شارع الدافوري بتاعنا

نهاية الشارع خالد حمزة

بجيك راجع تاني



عمدتنا الحبيب .. قرقور

أعود وبينى وبينك من الود مايعجز القلم عن قوله .. محبه لله فى لله .. شى لله يامرسى ..

الادارسه .. من هم .. أصلهم وهل هم صحيح من المغرب وجوا إستقرو فى السودان .. أم من السعوديه .. عندى صديقى فى الدوحه عابدين حسين حسن الإدريسى .. أهله نصهم فى المغرب ونصهم فى السعوديه ( عندهم كلهم الجنسيه السعوديه والمغربيه ) الإ هو السجمان ماخد القرين كارد السودانى .. على ماأعتقد كان عندهم خليفه كبير إسمه يوسف الإدريسى كان بيشتغل فى المخازن والمهمات العسكريه ببحرى .. صحح لى المعلومه إذا كانت غلط ..

فكينا العابد .. وشيخنا الساجد .. عمدتنا .. ليك الإحترام والتجله ..

قرقور
16-08-2006, 06:15
عمدتنا الحبيب .. قرقور

أعود وبينى وبينك من الود مايعجز القلم عن قوله .. محبه لله فى لله .. شى لله يامرسى ..

الادارسه .. من هم .. أصلهم وهل هم صحيح من المغرب وجوا إستقرو فى السودان .. أم من السعوديه .. عندى صديقى فى الدوحه عابدين حسين حسن الإدريسى .. أهله نصهم فى المغرب ونصهم فى السعوديه ( عندهم كلهم الجنسيه السعوديه والمغربيه ) الإ هو السجمان ماخد القرين كارد السودانى .. على ماأعتقد كان عندهم خليفه كبير إسمه يوسف الإدريسى كان بيشتغل فى المخازن والمهمات العسكريه ببحرى .. صحح لى المعلومه إذا كانت غلط ..

فكينا العابد .. وشيخنا الساجد .. عمدتنا .. ليك الإحترام والتجله ..

العزيز جدا اوزون

اول شي الادراسة هم اصلا من المغرب حتى الان عندهم جذور في المغرب
اما ادارسة السعودية ديل يا خوي مشو عمرة وكسرو هناك فعلا في ادارسة في السعودية قدمو من المغرب خلال رحلة الحج واستقروا في السعودية

شيخ يوسف ده ما بعرفو والله

mohyasser
22-08-2006, 15:48
السلام عليكم ورحمة الله وبركاته
شكراً لك اخي الكريم
كيف حالك إن شاء الله دائما بخير ؟
عندي استفسار انا من امبدة ام در بتشملنا نحنا الفي الضواحي وطرف المدائن

قرقور
23-08-2006, 07:23
السلام عليكم ورحمة الله وبركاته
شكراً لك اخي الكريم
كيف حالك إن شاء الله دائما بخير ؟
عندي استفسار انا من امبدة ام در بتشملنا نحنا الفي الضواحي وطرف المدائن

اخي العزيز

نحن نتكلم عن امدرمان بصورة عامة

امدرمان وضواحيها

بعدين امبدة بقت قلب امدرمان

قرقور
14-09-2006, 09:22
رجعة تاني للف في حواري امدرمان

قرقور
14-09-2006, 10:56
الخازوق

تعالي لي بجاي نلف في حواري امدر

الخازوق
14-09-2006, 11:11
الخازوق

تعالي لي بجاي نلف في حواري امدر


آآآآآآآآآخ يا قرقور، تورت علينا المواجع، ام در اصيلة.

والغناي قال

لو رمت ترويني ، ري العطيش في ابروف بي جرعة داويني
في قلبي كاويني حب ام عفاف أم در من قبل تكويني.

قرقور ، انا مارق من هنا ، عيوني رقرقن .

تحيااااااااتي

قرقور
14-09-2006, 11:32
آآآآآآآآآخ يا قرقور، تورت علينا المواجع، ام در اصيلة.

والغناي قال

لو رمت ترويني ، ري العطيش في ابروف بي جرعة داويني
في قلبي كاويني حب ام عفاف أم در من قبل تكويني.

قرقور ، انا مارق من هنا ، عيوني رقرقن .

تحيااااااااتي


الخازوق تمرق وين يا فردة

تاورك الحنين اللزيز

حليل امدر وحليل ناسها

ابوروف ود اللدر

امسك لي في ابوروف دي

العنقاء
14-09-2006, 11:35
حضور ومتابعة
العباسية وسط ,,,محطة سنادة,,,,,,غرب الشارع
الشارع الكبير
مرفعين الفقرا والجامع المشهور,,,,مزمل على دينار,,,,ناس عم ابشر,,,,,حسين مهدي ابوبكر,,,,عبيد النور وسعيده بدري,,,,,محمد عيساوي والد المخرج إسماعيل عيساوي
أحمد الطيب,,,,,اولاد آدم حسين,,,,,أحمد الجزولي,,,,جدك محمد نور ساتي
زقاق مشهور
حيدر دراج,,,,,بالفنان بادي محمد الطيب,,,ناس على الله,,,كاسر قسم السيد

قرقور
14-09-2006, 11:42
حضور ومتابعة
العباسية وسط ,,,محطة سنادة,,,,,,غرب الشارع
الشارع الكبير
مرفعين الفقرا والجامع المشهور,,,,مزمل على دينار,,,,ناس عم ابشر,,,,,حسين مهدي ابوبكر,,,,عبيد النور وسعيده بدري,,,,,محمد عيساوي والد المخرج إسماعيل عيساوي
أحمد الطيب,,,,,اولاد آدم حسين,,,,,أحمد الجزولي,,,,جدك محمد نور ساتي
زقاق مشهور
حيدر دراج,,,,,بالفنان بادي محمد الطيب,,,ناس على الله,,,كاسر قسم السيد


العنقاء اهم زول نسيتيهو كرولو المجنون الزول الفنان الرسام البرسم علي الحيط

العباسية زقاق زيدان - عمر الشاعر - التجاني الحاج موسى

بيت الامانة - مدرسة العباسية زقاق الرماد

وعباسية مية المية

العنقاء
14-09-2006, 11:47
العنقاء اهم زول نسيتيهو كرولو المجنون الزول الفنان الرسام البرسم علي الحيط
العباسية زقاق زيدان - عمر الشاعر - التجاني الحاج موسى
بيت الامانة - مدرسة العباسية زقاق الرماد
وعباسية مية المية
كرولو وقراشو الرهيب
وعمك برعي عمر سالم,,,,والإستيديو العجيب

وعباسية إيا إيا

قرقور
14-09-2006, 11:50
كرولو وقراشو الرهيب
وعمك برعي عمر سالم,,,,والإستيديو العجيب

وعباسية إيا إيا

عباسية صلاح بوكو وود الحجة

عباسية مكتبة الامراء

سنادة وعابدين ناس جلي وفرن مرغني

عباااااااااااااااااااااااااااااسية شدة قوية

طبقة الأزون
15-09-2006, 00:37
المجلس البلدى .. الدايات .. التجانى الماحى .. البوسته .. عباس رشوان .. التمنه .. هريدى
شارع ودالاغا .. شارع المهاتما غاندى .. شارع الدكاتره .. .. ..

الخازوق .. أبوروف .. عائلة العمرابى .. النيل .. المراكب .. الطلح الشاف .. ( والدخان .. والحنه والريحه .. وبنات أبوروف الحلوين طبيعه .. خلقه وأخلاق ) .. شجر اللبخ .. وصاحبنا سكسك ورفيق دربه مامون .. وأنا وانته والزمن طويل ..

الخازوق
16-09-2006, 09:48
المجلس البلدى .. الدايات .. التجانى الماحى .. البوسته .. عباس رشوان .. التمنه .. هريدى
شارع ودالاغا .. شارع المهاتما غاندى .. شارع الدكاتره .. .. ..

الخازوق .. أبوروف .. عائلة العمرابى .. النيل .. المراكب .. الطلح الشاف .. ( والدخان .. والحنه والريحه .. وبنات أبوروف الحلوين طبيعه .. خلقه وأخلاق ) .. شجر اللبخ .. وصاحبنا سكسك ورفيق دربه مامون .. وأنا وانته والزمن طويل ..

:eek: :eek: :eek:

قرقور
17-09-2006, 06:17
:eek: :eek: :eek:


الخازوق يا اخوي مالك منطط عيونك

اي سوق الحطب عندكم:c030: :c030:

طبقة الأزون
17-09-2006, 09:57
الخازوق يا اخوي مالك منطط عيونك

اي سوق الحطب عندكم:c030: :c030:


غايتو انحنا مابنعرفك من ابوروف إلا من قرقور صاحبك دا

عشان كدا .. أديناك بداية خيط .. عشان تحوم بينا فى حلتكم

وكان للطلح والشاف والله قاعدين نشتريه من عندكم .. بس أنا خايف .. تجى ساكينا بخشبه بتاعت طلحه عشان قولنا بناتكم حلوات .. خلقه واخلاق

قرقور
17-09-2006, 10:24
غايتو انحنا مابنعرفك من ابوروف إلا من قرقور صاحبك دا

عشان كدا .. أديناك بداية خيط .. عشان تحوم بينا فى حلتكم

وكان للطلح والشاف والله قاعدين نشتريه من عندكم .. بس أنا خايف .. تجى ساكينا بخشبه بتاعت طلحه عشان قولنا بناتكم حلوات .. خلقه واخلاق


هههههههههههههههههه والله دي بالغت فيها يا اوزون

ااااااااااااااااااااااااااي جكس ابوروف شديد وده المكسر اخوي الخازوق

اوزون يا اخوي صحبك الخازوق عندو زريبة حطب هناك تعال براعيك في لسعر

قرقور
19-09-2006, 07:19
يوم جديد ولف من جديد في حاري وزقاقات امدرمان

طبقة الأزون
21-09-2006, 00:11
هههههههههههههههههه والله دي بالغت فيها يا اوزون

ااااااااااااااااااااااااااي جكس ابوروف شديد وده المكسر اخوي الخازوق

اوزون يا اخوي صحبك الخازوق عندو زريبة حطب هناك تعال براعيك في لسعر


قرقور ..

يااخوى صاحبك الخازوق دا فرد شرده .. من ماجبنا سيرة الطلح والشاف والجكس النضيف
يااخى قول ليهو حانشترى بقروشنا .. بٍس يجى راجع .. من امريكا دى لأبوروف

قرقور
12-11-2006, 09:54
قرقور ..

يااخوى صاحبك الخازوق دا فرد شرده .. من ماجبنا سيرة الطلح والشاف والجكس النضيف
يااخى قول ليهو حانشترى بقروشنا .. بٍس يجى راجع .. من امريكا دى لأبوروف


هههههههههههههههه بجي يا غابة وبجيب لبينا معاو

قرقور
18-01-2007, 09:36
فوق عشان خاطر طبقة الاوزون

طارق سيد احمد
18-01-2007, 09:42
http://www.laptop10.com/jomlaPic.php?session=&jomla_id=3

طبقة الأزون
18-01-2007, 09:44
فوق عشان خاطر طبقة الاوزون


تفتكر .. طبقك يرد ليك طلب .. إنته على عينا ورأسنا يارائع .. بجيك راجع برواقه ..

قرقور
18-01-2007, 09:55
تفتكر .. طبقك يرد ليك طلب .. إنته على عينا ورأسنا يارائع .. بجيك راجع برواقه ..


منتظرك يا سيد الذوق

رايك اطفى ظمئ لامدر

طبقة الأزون
18-01-2007, 09:58
http://www.laptop10.com/jomlaPic.php?session=&jomla_id=3


تفتكر الشنطه دى تكون ملغومه ولاحاجه كدا .. أمسكها عندك .. لحدى مايجينا صاحبا راجع .. وطال ماهو معروف لدينا مامنو خوف .. حايفجر فينا مواضيع يمكن تحرق كروتنا دى كلها ...

قرقور
14-02-2007, 07:38
من جديد لف وتسكع في حواري امدر

تحسسا للجمال والابداع

قرقور
22-02-2007, 08:26
ناس امدر الحنينة وينكم

همس الشوق
22-02-2007, 09:03
هلا
نحن قاعدين
اها الليلة التسكع حيكون وين ؟؟؟؟؟؟؟؟؟؟ظ

قرقور
22-02-2007, 09:26
هلا
نحن قاعدين
اها الليلة التسكع حيكون وين ؟؟؟؟؟؟؟؟؟؟ظ

الليلة حنلف في سوق امدرمان

الملجة شارع العناقريب شارع العدني ميدان الاسكلا

همس الشوق
22-02-2007, 09:32
الليلة حنلف في سوق امدرمان

الملجة شارع العناقريب شارع العدني ميدان الاسكلا


شكلك خرماااااااااااااااااان يا قرقور

ارح اول شي اشتري ليك (امان) عشان راسك يتعدل وتعرف تتسكع


(الامان )
مره اخوي قال لي كيس السفه بسموهو الامان يعني قدام الجكس تقول لي صاحبك ادين الامان
بعرفك قصدك

قرقور
22-02-2007, 09:45
شكلك خرماااااااااااااااااان يا قرقور

ارح اول شي اشتري ليك (امان) عشان راسك يتعدل وتعرف تتسكع


(الامان )
مره اخوي قال لي كيس السفه بسموهو الامان يعني قدام الجكس تقول لي صاحبك ادين الامان
بعرفك قصدك

ارح نغشى احمد الباشا في شارع الجلوووود واعزمك كوز عرديب من بتاع العرديب الجنبو

بمناسبة الجلود يا همس

مرة صاحبنا اهلو تجار جلود اها زولك عزمنا فطور جاب لينا صحن دمعة غريبة مقطعة صغااااار

اها ضربنا لما الله غفر لينا وبعد ما شبعنا قلنا ليهو والله لحمتك دي ما عادية

ضحك وقال لينا دي لحمة الجلود لما نشتري الجلود بننظفها من اللحم الملصق فيها ونضبخها كده

اها من سمعنا كلامو كل زول على الشارع وهاك يا استفراغ

من اليوم داك كوز موية ما بشربو عندهم